Isaaya 38:1-22 LGCB2014 - Bible AI

¹ⓦ Mu nnaku ezo Keezeekiya nʼalwala nnyo, katono afe. Nnabbi Isaaya mutabani wa Amozi nʼajja gyʼali nʼamugamba nti, “Bwʼati bwʼayogera Mukama nti, Teekateeka ennyumba yo, kubanga togenda kulama, ogenda kufa.”

²Awo Keezeekiya nʼakyuka nʼatunuulira ekisenge nʼasaba ne yeegayirira Mukama

³ⓧ ngʼagamba nti, “Jjukira kaakano, Ayi Mukama, nkwegayiridde, engeri gye natambuliranga mu maaso go nʼamazima nʼomutima ogutuukiridde, ne nkola ebisaanidde mu maaso go.” Era Keezeekiya nʼakaaba nnyo amaziga.

⁴Awo Ekigambo kya Katonda ne kijja eri Isaaya,

⁵nga Mukama agamba nti, “Genda ogambe Keezeekiya nti, ‘Bwʼati bwʼayogera Mukama Katonda wa Dawudi kitaawo nti, Mpulidde okusaba kwo, ndabye amaziga go: laba nzija kwongera ku nnaku zo emyaka kkumi nʼettaano.

⁶Era ndikuwonya ggwe nʼekibuga kino mu mukono gwa kabaka wʼe Bwasuli: Era ndikuuma ekibuga kino.

⁷“ ‘Era kano ke kabonero kʼonoofuna okuva eri Mukama nti Mukama alikola ekigambo kyʼayogedde.

⁸Laba nzija kuzza emabega ekisiikirize ebigere kkumi enjuba bwʼeneeba egwa, kyʼeneekola ku madaala kabaka Akazi ge yazimba.’ ” Bwʼetyo enjuba nʼedda emabega ebigere kkumi.

⁹Awo Keezeekiya Kabaka wa Yuda bwe yassuuka, nʼawandiika ebigambo bino;

¹⁰Nayogera nti, “Mu maanyi gʼobulamu bwange mwe nnali ŋŋenda okufiira nnyingire mu miryango gyʼemagombe, nga simazeeyo myaka gyange egisigaddeyo.”

¹¹Ne ndyoka njogera nti, “Sigenda kuddayo kulaba Mukama, mu nsi yʼabalamu. Sikyaddamu kulaba bantu mu nsi abantu mwe babeera.

¹²Obulamu bwange buzingiddwako ngʼeweema yʼomusumba wʼendiga bwʼenzigibwako. Ngʼolugoye lwe babadde balanga ate ne balusala ku muti kwe babadde balulukira, bwe ntyo bwe nawuliranga emisana nʼekiro nga obulamu bwange obumalirawo ddala.

¹³Ekiro kyonna nakaabanga olwʼobulumi nga ndi ngʼempologoma gwʼemmenyaamenya amagumba, ekiro nʼemisana nga ndowooza nga Mukama yali amalawo obulamu bwange.

¹⁴Nakaabanga ngʼakasanke oba akataayi, nʼempuubaala ngʼenjiibwa, amaaso gange ne ganfuyirira olwʼokutunula mu bbanga eri eggulu. Ne nkaaba nti, Ayi Mukama, nga nnyigirizibwa, nziruukirira.”

¹⁴

¹⁵Naye ate nga naagamba ki? Yali ayogedde nange nga ye yennyini ye yali akikoze. Nʼatambulanga nʼobwegendereza mu bulumi buno obwʼobulamu bwange.

¹⁶Ayi Mukama, olwʼebyo, abantu babeera abalamu, era mu ebyo omwoyo gwange mwe gubeerera omulamu. Omponye, mbeere mulamu.

¹⁷Ddala laba okulumwa ennyo bwe ntyo kyali ku lwa bulungi bwange, naye ggwe owonyezza obulamu bwange okugwa mu bunnya obwʼokuzikirira. Kubanga otadde ebibi byange byonna emabega wo.

¹⁸Kubanga tewali nʼomu mu nsi yʼabafu ayinza kukutendereza, abafu tebayinza kukusuuta; tebaba na ssuubi mu bwesigwa bwo.

¹⁹Akyali omulamu, yʼakutendereza nga nze bwe nkola leero; bakitaabwe bʼabaana babategeeza nga bwʼoli omwesigwa ennyo.

¹⁹

²⁰Mukama alindokola, kyetunaavanga tuyimba ne tukuba nʼebivuga ebyʼenkoba ennaku zonna ezʼobulamu bwaffe, mu nnyumba ya Mukama.

²¹ⓨ Isaaya yali agambye nti, “Baddire ekitole kyʼettiini bakisiige ku jjute, liwone.”

²²Kubanga Keezeekiya yali abuuzizza nti, “Kabonero ki akalaga nga ndiwona ne ntuuka okulagako mu nnyumba ya Mukama?”