Isaaya 39:1-8 LGCB2014 - Bible AI

¹Awo mu nnaku ezo Merodakubaladani mutabani wa Baladani kabaka wʼe Babulooni, nʼaweereza Keezeekiya ebbaluwa nʼekirabo, kubanga yawulira nti yali alwadde naye ngʼawonye.

²Keezeekiya nʼabasanyukira, nʼabalaga ennyumba ye eyʼebintu bye ebyʼomuwendo omungi, effeeza ne zaabu, nʼebyakaloosa, nʼamafuta agʼomuwendo omungi, nʼennyumba yonna eyʼebyokulwanyisa. Byonna ebyali mu bugagga bwe, tewaali kintu mu nnyumba ye newaakubadde mu bwakabaka bwe bwonna Keezeekiya kyʼataabalaga.

³Awo Isaaya nnabbi nʼajja eri kabaka Keezeekiya nʼamubuuza nti, “Abasajja banno bagamba ki? Era bavudde wa okujja gyʼoli?” Keezeekiya nʼamuddamu nti, “Bazze wange, bava mu nsi eyʼewala e Babulooni.”

⁴Nʼamubuuza nti, “Balabye ki mu nnyumba yo?” Keezeekiya nʼaddamu nti, “Byonna ebiri mu nnyumba yange babirabye, tewali kintu mu byobugagga bwange kye sibalaze.”

⁵Awo Isaaya nʼagamba Keezeekiya nti, “Wulira Mukama Katonda owʼEggye kyʼagamba,

⁶Laba, ennaku zijja, byonna ebiri mu nnyumba yo nʼebyo bajjajjaabo bye baaterekanga ebikyaliwo nʼokutuusa leero, lwe biritwalibwa e Babulooni, ne watasigala kintu na kimu, bwʼayogera Mukama.

⁷ⓩ Nʼabamu ku batabani bo, ggwe kennyini bʼozaala balitwalibwa mu lubiri lwa kabaka wʼe Babulooni ne balaayibwa.”

⁸ⓐ Awo Keezeekiya nʼagamba Isaaya nti, “Ekigambo kya Mukama kyʼoŋŋambye kirungi.” Kubanga yalowooza nti, “Kasita emirembe, nʼobutebenkevu binaabangawo mu mulembe gwange.”