1 “Bwʼati Mukama bwʼagamba Kuulo gwe yafukako amafuta, oyo gwe mpadde amaanyi mu mukono gwe ogwa ddyo okujeemulula amawanga mu maaso ge era nʼokwambula bakabaka ebyokulwanyisa byabwe, okuggulawo enzigi ezimuli mu maaso, emiryango eminene gireme kuggalwawo.
2 Ndikukulembera ne ntereeza ebifo ebigulumivu. Ndimenyaamenya emiryango egyʼebikomo ne ntemaatema ebisiba ebyʼekyuma.
3 Era ndikuwa obugagga obwakwekebwa mu bifo ebyekusifu era nʼebintu ebyakwekebwa mu bifo ebyekyama olyoke omanye nga nze Mukama, Katonda wa Isirayiri akuyitira ddala erinnya lyo.
4 Ku lwa Yakobo omuweereza wange ne ku lwa Isirayiri omulonde wange kyenvudde nkuyita erinnya, ne nkuwa ekitiibwa wadde nga tonzisaako mwoyo.
5 Nze Mukama, tewali mulala. Tewali katonda mulala wabula nze. Ndikuwa amaanyi wadde nga tonzisaako mwoyo,
6 balyoke bamanye nga okuva enjuba gyʼeva okutuuka gyegenda tewali mulala wabula nze. Nze Mukama, tewali mulala.
7 Nze nteekawo ekitangaala nʼentonda ekizikiza. Nze ndeeta okukulaakulana nʼokubonaabona. Nze Mukama akola ebyo byonna.”
7
8 “Mmwe eggulu eriri waggulu, mutonnyese obutuukirivu. Ebire bitonnyese obutuukirivu. Ensi egguke nʼobulokozi bumeruke, ereete obutuukirivu. Nze Mukama nze nagitonda.
9 ⓨ Zimusanze oyo ayomba nʼomutonzi we!Zimusanze oyo oluggyo mu nzigyo zʼensi. Bbumba ki eribuuza oyo alibumba nti, ‘Obumba ki?’ Oba omulimu gwo okukubuuza nti, ‘Aliko emikono?’
10 Zimusanze oyo agamba kitaawe nti, ‘Wazaala ki?’ Oba nnyina nti, ‘Kiki kyʼozadde?’
11 Bwʼati bwʼayogera Mukama Omutukuvu wa Isirayiri era Omutonzi we nti, ‘Lwaki mumbuuza ebigenda okujja, oba ebikwata ku baana bange, oba okumpa ebiragiro ku bikwata ku mirimu gyʼemikono gyange?’
12 Nze nakola ensi ne ngitonderamu abantu. Emikono gyange gyʼennyini gye gyayanjuluza eggulu, era ne ndagira ebyʼomu bwengula byonna bitondebwewo.
13 Ndiyimusa Kuulo mu butuukirivu era nditereeza amakubo ge gonna. Alizimba ekibuga kyange nʼasumulula abantu bange abaawaŋŋangusibwa; naye si lwa mpeera oba ekirabo,” bwʼayogera Mukama Katonda owʼEggye.
14 Bwʼati bwʼayogera Mukama nti, “Ebiva mu Misiri nʼebyamaguzi bya Kuusi birireetebwa, nʼabo Abasabeya abawanvu balijja babeere abaddu bo, bajje nga bakugoberera nga basibiddwa mu njegere. Balikuvuunamira bakwegayirire nga bagamba nti, ‘Ddala Katonda ali naawe, ye Katonda yekka, tewali Katonda mulala.’ ”
15 Ddala oli Katonda eyeekweka, ggwe Katonda wa Isirayiri era Omulokozi we.
16 Bonna abakola bakatonda abakole nʼemikono baliswazibwa, balikwatibwa ensonyi, bonna balikwata ekkubo limu nga baswadde.
17 Naye Isirayiri alirokolebwa Mukama nʼobulokozi obutaliggwaawo. Temuukwatibwenga nsonyi, temuuswalenga emirembe gyonna.
18 Kubanga bwʼatyo bwʼayogera Mukama eyatonda eggulu, ye Katonda eyabumba ensi nʼagikola. Ye yassaawo emisingi gyayo. Teyagitonda kubeera nkalu naye yagikola etuulwemu. Ye yagamba nti, Nze Mukama so tewali mulala.
19 Soogereranga mu kyama, oba mu nsi eyeekizikiza. Sigambanga bazzukulu ba Yakobo nti, “Munoonyeze bwereere.” Nze Mukama njogera mazima, mbuulira ebigambo ebyʼensonga.
19
20 “Mwekuŋŋaanye mujje, mukuŋŋaane, mmwe abasigaddewo mu mawanga. Tebalina magezi abo abasitula ebifaananyi ebibajje, abasaba eri katonda atasobola kubalokola.
21 Mukuŋŋaane muleete ensonga zammwe. Muteese muyambagane. Ani eyayogera nti kino kiribaawo? Ani eyakyogerako edda? Si nze Mukama? Tewali Katonda mulala wabula nze, Katonda omutuukirivu era Omulokozi, tewali mulala wabula nze.”
21
22 “Mudde gye ndi, mulokoke, mmwe mwenna abali ku nkomerero zʼensi, kubanga nze Katonda so tewali mulala.
23 ⓩ Neerayiridde,ekigambo kivudde mu kamwa kange mu mazima so tekiriggibwawo mu maaso gange. Buli vviivi lirifukamira, na buli lulimi lulirayira!
24 Balinjogerako nti, ‘Mu Mukama mwokka mwe muli obutuukirivu nʼamaanyi.’ ” Bonna abaamusunguwalira balijja gyʼali nga baswadde.
25 Naye mu Mukama ezzadde lyonna erya Isirayiri mwe liriweerwa obutuukirivu era mwe liryenyumiririza.
© 2014 by Biblica, Inc.® All rights reserved worldwide.