Isaaya 46:1-13 LGCB2014 - Bible AI

¹Beri avunnama, Nebo akutamye! Ebifaananyi bya bakatonda baabwe biteekeddwa ku nsolo ezʼomu nsiko, era ne ku nte. Ebifaananyi bya bakatonda baabwe migugu mizito ddala ku ndogoyi ezikooye.

²Bikutamye byonna bivuunamye. Tebiyinza kuyamba ku mbeera, byo byennyini bitwaliddwa mu busibe.

³“Mumpulire mmwe, ennyumba ya Yakobo nʼabantu bonna abasigaddewo mu nnyumba ya Isirayiri. Mmwe be nnalera okuva lwe mwava mu lubuto, be nasitula okuva lwe mwazaalibwa.

⁴ⓐ Ne mu bukadde bwammwe nzija kusigala nga ye nze Nzuuyo. Ne bwe muliba mulina envi nnaabasitulanga. Nze nabakola era nze nnaabawekanga. Nnaabasitulanga era nnaabanunulanga.

⁴

⁵“Ani gwe mulinfaananya era gwe mulinnenkanya era gwe mulingerageranyaako tufaanane?

⁶Eriyo abaggya zaabu ennyingi mu nsawo zaabwe ne bapima ne ffeeza ku minzaani. Olwo ne bapangisa omuweesi wa zaabu nʼagiweesaamu katonda waabwe, ne bagwa wansi ne basinza.

⁷ⓑ Katonda waabwe ne bamusitulira ku kibegabega, ne bamuwa ekifo wʼanaayimiriranga. Nʼayimirira awo, nʼatava mu kifo kye. Oli ne bwʼamukaabirira tayinza kumuddamu, tayinza kumuwonya mu mitawaana gye.

⁷

⁸“Mujjukire kino mmwe, mulowooze mu mitima gyammwe. Mwekube mu kifuba, mmwe abajeemu.

⁹Mujjukire ebigambo ebyasooka ebyʼedda ennyo. Kubanga nze Katonda, teri mulala. Nze Katonda, teri ali nga nze;

¹⁰ⓒ alanga ku ntandikwa ebigenda okubaawo. Okuva ku mirembe egyʼedda ennyo, nalanga ebintu ebitannabaawo, nga ŋŋamba nti, ‘Enteekateeka zange zijja kubaawo era ndituukiriza byonna bye nategeka.’

¹¹Mpita ekinyonyi ekikwakkula ebiramu ebirala. Omusajja[29] ava e buvanjuba mu nsi eyewala, anaakola bye njagala. Weewaawo njogedde era nnaatuukiriza. Nga bwe nategeka bwe nnaakola.

¹²Mumpulirize mmwe abalina emitima emikakanyavu, abakyama ennyo ne bava mu kkubo lyʼobutuukirivu.

¹³Nsembeza kumpi obutuukirivu bwange, tebuli wala. Nʼobulokozi bwange tebuulwewo. Ndireeta obulokozi mu Sayuuni, ne nzizaawo ekitiibwa kyange mu Isirayiri.”