Isaaya 47:1-15 LGCB2014 - Bible AI

¹ⓓ “Omuwala wa Babulooni embeerera, kakkana wansi otuule mu nfuufu, tuula wansi awatali ntebe ya bwakabaka, ggwe omuwala wʼAbakaludaaya. Ekibuga ekitawangulwangako. Toliddayo nate kuyitibwa kyatika oba nnalulungi.

²Ddira olubengo ose obutta. Ggyako akatimba ku maaso, situla ku ngoye zʼoku magulu oyite mu mazzi.

³Obwereere bwo bulibikkulwa; obusungu bwo bulyeraga. Nzija kuwoolera eggwanga; tewali muntu yenna gwe ndirekawo.”

⁴Omununuzi waffe Mukama Katonda owʼEggye lye linnya lye, ye Mutukuvu wa Isirayiri.

⁴

⁵“Tuula mu kasirise yingira mu kizikiza ggwe omuwala wʼAbakaludaaya, tebakyakuyita kabaka omukazi afuga obwakabaka obungi.

⁶Nnali nsunguwalidde abantu bange, ne nyonoonesa omugabo gwange. Nabawaayo mu mikono gyo, nʼotobasaasira nʼakatono. Nʼabakadde wabateekako ekikoligo ekinene ennyo.

⁷Wayogera nti, ‘Nzija kubeera kabaka omukazi emirembe gyonna,’ naye nʼotolowooza ku bintu bino wadde okulowooza ku kyali kigenda okubaawo.”

⁷

⁸ⓔ “Kale nno kaakano wuliriza kino, ggwe awoomerwa amasanyu ggwe ateredde mu mirembe gyo, ngʼoyogera mu mutima gwo nti, ‘Nze ndiwo era tewali mulala wabula nze. Siribeera nnamwandu wadde okufiirwa abaana.’

⁹Ebintu bino byombi birikutuukako mangu nnyo mu lunaku lumu, ekyʼokufiirwa abaana nʼokufuuka nnamwandu. Birikutuukako mu kigera kyabyo ekituufu, newaakubadde obulogo bwo nga bungi okuyitirira, nʼebyʼobufumu byo nga bigenze wala.

¹⁰Weesiga obutali butuukirivu bwo, nʼolowooza nti, ‘Siriiko annondoola.’ Amagezi go era nʼokumanya kwo byakuwabya, bwe wayogera nti, ‘Nze ndiwo, era teri mulala wabula nze.’

¹¹ⓕ Kyokka ensasagge erikujjira era tolimanya ngeri yakugyeggyako; nʼokuzikirira kwʼotoliyinza kweggyako na muwendo gwa nsimbi; akabi kʼotolirabirawo kalikutuukako amangu ddala.”

¹¹

¹²“Weeyongere nno nʼobulogo bwo nʼobufumu bwo obwayinga obungi, bwe wanyiikiriramu okuva mu buto bwo. Oboolyawo olibaako kyoggyamu, oboolyawo olikolawo ekyobulabe.

¹³Amagezi ago gʼofuna gakukooya bukooya. Abalagulira ku munyeenye basembera, nʼabo abakebera emmunyeenye, era aboogera ebiribaawo buli mwezi, babadduukirire mu bigenda okubatuukako.

¹⁴ⓖ Laba, bali ngʼebisusunku era omuliro gulibookya! Tebalyewonya maanyi ga muliro. Tewaliiwo manda ga kukubugumya wadde omuliro ogwʼokwota!

¹⁵Ekyo kye bayinza okukukolera kyokka; bʼobonyeebonye nabo bʼoteganidde okuva mu buto bwo. Buli muntu alikwata ekkubo lye nga yeeyongera okukola ebibi bye era tewali nʼomu ayinza okukulokola.”