Isaaya 51:1-23 LGCB2014 - Bible AI

¹“Mumpulirize, mmwe abanoonya obutuukirivu, mmwe abanoonya Mukama: Mutunuulire olwazi lwe mwatemebwako, nʼobunnya bwʼekirombe gye mwasimibwa.

²Mulowooze ku Ibulayimu jjajjammwe ne Saala eyabazaala. Kubanga we namuyitira yali bwʼomu ne mmuwa omukisa ne mmwaza.

³Kubanga ddala Mukama alikubagiza Sayuuni; akwatirwe ekisa ebifo byakyo byonna ebyazika era afuule olukoola lwe lwonna okuba Adeni, nʼeddungu libeere ngʼennimiro ya Mukama; Essanyu nʼokujaguza biryoke bibeere omwo, okwebaza nʼamaloboozi agʼokuyimba.”

³

⁴ⓤ “Mumpulirize, mmwe abantu bange; era muntegere okutu mmwe ensi yange. Kubanga etteeka lifuluma okuva gye ndi, obwenkanya bwange bubeere omusana eri amawanga.

⁵Obutuukirivu bwange busembera mangu nnyo, obulokozi bwange buli mu kkubo. Era omukono gwange gujja kuleeta obwenkanya eri amawanga. Ebizinga birinnindirira era birindirire nʼessuubi omukono gwange okubirokola.

⁶Muyimuse amaaso gammwe eri eggulu, mutunuulire ensi wansi! Kubanga eggulu lirivaawo ngʼomukka nʼensi ekaddiwe ngʼekyambalo. Abagituulamu balifa ngʼensowera. Naye obulokozi bwange bunaabeereranga emirembe gyonna, so nʼobutuukirivu bwange tebujjulukukenga.”

⁶

⁷ⓥ “Mumpulirize, mmwe abamanyi obutuukirivu, eggwanga eririna amateeka gange mu mitima gyammwe. Temutya kuvumibwa bantu wadde okukeŋŋentererwa olwʼokuyomba kwabwe.

⁸Kubanga ennyenje ziribalya nga bwe zirya ebyambalo. Nʼobuwuka bubalye ngʼobulya ebyoya byʼendiga. Naye obutuukirivu bwange bunaabeereranga ennaku zonna. Obulokozi bwange bunywere emirembe gyonna.”

⁸

⁹ⓦ Zuukuka, zuukuka oyimuke otuyambe Ayi Mukama Katonda. Kozesa amaanyi go otuyambe. Gakozese nga edda. Si ggwe wuuyo eyatemaatemamu Lakabu obufiififi? Si ye ggwe eyafumita ogusota?

¹⁰Si ggwe wuuyo eyakaliza ennyanja, amazzi agʼobuziba obuwanvu ennyo ne gafuuka ekkubo abantu be wanunula bayitewo?

¹¹Nʼabo Mukama be wawonya balikomawo ne bajja mu Sayuuni nga bayimba. Essanyu eryʼemirembe nʼemirembe liriba nga ngule ku mitwe gyabwe. Balisanyuka ne bajaguza; ennaku nʼokusinda bibadduke.

¹²“Nze, nze mwene, nze nzuuno abawa amaanyi. Mmwe baani abatya omuntu alifa, nʼomwana wʼomuntu ali ngʼomuddo,

¹³ne weerabira Mukama Omutonzi wo eyabamba eggulu, nʼateekawo nʼemisingi gyʼensi, ebbanga lyonna ne mubeera mu kutya obusungu bwʼabo abakunyigiriza, oyo eyemalidde mu kuzikiriza? Kubanga kale buliruddawa obulabe bwʼoyo abanyigiriza?

¹⁴Abo be bawamba ne basibibwa banaatera okuteebwa, tebalifiira mu bunnya, era tebalibulwa mmere gye balya.

¹⁵Kubanga nze Mukama Katonda wo, asiikuula amayengo gʼennyanja ne gawuluguma: Mukama owʼEggye lye linnya lye.

¹⁶Ntadde ebigambo byange mu kamwa ko, era nkubisse mu kisiikirize kyʼomukono gwange. Nze nakola eggulu ne nteekawo emisingi gyʼensi; era nze wuuyo agamba Sayuuni nti, ‘Muli bantu bange!’ ”

¹⁷ⓧ Zuukuka, zuukuka, oyimirire ggwe Yerusaalemi eyanywa okuva eri Mukama ekikompe ekyʼobusungu bwe, eyanywa nʼomaliramu ddala ekibya ekitagaza.

¹⁸Ku baana aboobulenzi bonna be yazaala tewali nʼomu wa kumukulembera. Ku baana bonna aboobulenzi be yakuza tewali nʼomu wa kumukwata ku mukono.

¹⁹Ebintu bino ebibiri bikuguddeko ani anaakunakuwalirako? Okuzika nʼokuzikirira, enjala, nʼekitala, ani anaakubeesabeesa?

²⁰Batabani bo bazirise, bagudde ku buli nsonda yʼoluguudo ngʼengabi egudde mu kitimba. Babuutikiddwa ekiruyi kya Mukama, nʼokunenyezebwa kwa Katonda wo.

²⁰

²¹Noolwekyo wulira kino ggwe, atamidde naye si lwa mwenge.

²²Bwʼatyo bwʼayogera Mukama Ayinzabyonna, Katonda wo alwanirira abantu be. “Laba mbaggyeeko ekikompe kye nabawa olwʼekiruyi kye nalina, ekyabatagaza. Temuliddayo kukinywa nate.

²³Ndikiteeka mu mikono gyʼabo abaababonyaabonya abaabagamba nti, ‘Mugwe wansi mwegolole tubatambulireko.’ Emigongo gyammwe gibe ngʼettaka, ngʼoluguudo olwʼokulinnyirira.”