Isaaya 57:1-21 LGCB2014 - Bible AI

¹Abantu abatuukirivu bazikirira, naye tewali akirowoozako nʼakatono. Abantu abeewaddeyo eri Katonda batwalibwa nga tewali nʼafuddeyo kukirowoozaako. Kubanga omutuukirivu aggyibwawo olwʼakabi akagenda okujja.

²Ayingira mu mirembe nʼafuna okuwummulira mu kufa kwe, ne bawummula ga beebase, abo abatambulira mu bugolokofu.

³“Naye mmwe mujje musembere wano batabani bʼomukazi omufumu ezzadde lyʼomwenzi omukazi eyeetunda.

⁴Muzannyira ku ani? Ani gwe mukongoola ne mumusoomooza? Temuli baana ba bujeemu, ezzadde eryobulimba?

⁵Mwaka ne mwegombera wansi wʼemivule na buli wansi wa buli muti oguyimiridde; mmwe abasaddaaka abaana bammwe mu biwonvu ne wansi wʼenjatika zʼenjazi.

⁶Bakatonda bo ge mayinja amaweweevu[31] gosinziza mu biwonvu, abo be babo, obusika bwo; abo bʼofukira ekiweebwayo ekyokunywa era nʼebiweebwayo ebyʼempeke. Nga weemalidde mu kukola bino byonna, olowooza nnyinza okusanyuka?

⁷Mwambuka ku ntikko zʼensozi okwenda nga mugenze okuwaayo ssaddaaka.

⁸Emabega wʼenzigi zammwe we muteeka ebibumbe ebyʼobuwemu bye musinza. Mwandeka ne mukola ebyʼobuwemu mu bitanda byammwe ebigazi. Eyo gye mweyambulira ne mukola endagaano nʼabo be mwagala be muleeta mu bitanda byammwe.

⁹Ne weekuba kalifuuwa omuyitirivu ngʼogenda okutwala amafuta agʼomuzeeyituuni ewa Moleki katonda wo, nʼotuma ababaka bo ewala ennyo banoonye bakatonda, kumpi batuuke nʼemagombe.

¹⁰Amakubo go gonna gakuteganya ne gakukooya nnyo naye teweegamba nako nti, ‘Nteganira ki atalina kyeŋŋanyurwa?’ Singa tewanoonya bikuzaamu maanyi, wandizirise.”

¹⁰

¹¹“Bʼani abo be watya nʼotekemuka nʼobawuliriza, nʼolyoka olimba, nze nʼotonzijukira nʼakatono wadde okundowoozaako? Olwʼokubanga nsirise nʼesikunyega kyʼekikuyinudde nʼonneerabira nʼompisaamu amaaso.

¹²Nnaayolesa obutuukirivu bwo ne byʼokola, naye tebigenda kukugasa.

¹³Bwʼokaabanga nga weetaaga obuyambi, leka bakatonda bo be wakuŋŋaanya bakununule; naye empewo eribatwala, omukka obukka abantu gwe bassa gulibaggirawo ddala bonna. Naye oyo anfuula ekiddukiro kye alirya ensi era alitwala olusozi lwange olutukuvu.”

¹⁴Era kiryogerwa nti, “Muzimbe, muzimbe, mulongoose ekkubo! Muggyeewo enkonge zonna mu kkubo lyʼabantu bange.”

¹⁵Kubanga bwʼatyo bwʼayogera oyo ali waggulu omugulumivu omulamu emirembe nʼemirembe, owʼerinnya ettukuvu nti, “Ntuula mu kifo ekigulumivu ekitukuvu awamu nʼoyo alina omwoyo oguboneredde ogwetoowaza, okuzzaamu amaanyi omwoyo gwʼabakkakkamu, era nʼogwʼabo ababoneredde.

¹⁶Kubanga sirirumiriza bantu bange emirembe nʼemirembe era siribasunguwalira bbanga lyonna. Kubanga omutima gwʼomuntu gwandigwereddewo mu maaso gange nga ndaba, emmeeme yʼomuntu nze gye nakola.

¹⁷Olwʼokwegomba kwe okwʼobutali butuukirivu nnali nzijjudde obusungu. Namubonereza ne nkweka amaaso gange olwʼobusungu obungi naye yeeyongera okugenda mu maaso mu makubo amabi.

¹⁸Nalaba byʼakola, naye ndimuwonya. Ndimuluŋŋamya ne muddiza emirembe era ne mbeesabeesa abo abakungubaga.

¹⁹ⓥ Mirembe, era mirembe, eri abo abali ewala nʼeri abo abali okumpi, era ndibawonya,” bwʼayogera Mukama.

²⁰Naye ababi bali ngʼennyanja esiikuuse, eteyinza kutereera, eyʼamayengo agasiikuula ebitosi nʼebitaka.

²¹ⓦ “Tewali mirembe, eri aboonoonyi,” bwʼayogera Katonda wange.