Isaaya 60:1-22 LGCB2014 - Bible AI

¹Yimuka, oyake, kubanga ekitangaala kyo kizze kyase era ekitiibwa kya Mukama kikwakirako.

²Kubanga laba ensi eribikkibwa ekizikiza era nʼekizikiza ekikutte ennyo kibikke abantu baamawanga gonna, naye ggwe Mukama alikwakirako era ekitiibwa kye kikulabikeko.

³Amawanga galijja eri omusana gwo ne bakabaka eri okumasamasa okunaakubangako ngʼojja.

³

⁴Yimusa amaaso go olabe; abantu bo bonna bakuŋŋaana okujja gyʼoli batabani bo abava ewala ne bawala bo abasituliddwa mu mikono.

⁵Kino oli wakukirabako ojjule essanyu, omutima gwo, gujjule okweyagala nʼokujaguza. Obugagga bwʼamawanga bulyoke bukuleetebwe, era nʼebirungi byonna ebyʼomu nnyanja birikweyuna.

⁶Ebisibo byʼeŋŋamira birijjula ensi yammwe, eŋŋamira ento ezʼe Midiyaani ne Efa.[33] Era ne zonna ezʼe Seba zirijja nga zeetisse zaabu nʼobubaane okulangirira ettendo lya Katonda.

⁷Nʼebisibo byonna ebyʼe Kedali birikukuŋŋanyizibwa, endiga ennume ezʼe Nebayoosi zirikuweereza. Zirikkirizibwa ngʼekiweebwayo ku kyoto kyange era ndyolesa ekitiibwa kyange mu yeekaalu yange.

⁷

⁸“Bano baani abaseyeeya nga ebire, ngʼamayiba agadda mu bisu byago?

⁹Ddala ddala ebizinga bitunuulidde nze; ebidyeri byʼe Talusiisi bye bikulembedde bireete batabani bammwe okubaggya ewala awamu ne zaabu yaabwe ne ffeeza, olwʼekitiibwa kya Mukama Katonda wammwe, Omutukuvu wa Isirayiri, kubanga akufudde owʼekitiibwa.”

⁹

¹⁰“Abaana ba bamawanga amalala balizimba bbugwe wo, era bakabaka baabwe bakuweereze; Olwʼobusungu bwange, nakukuba, naye mu kusaasira kwange ndikukwatirwa ekisa.

¹¹ⓒ Emiryango gyo ginaabanga miggule bulijjo, emisana nʼekiro tegiggalwenga, abantu balyoke bakuleeterenga obugagga obwʼamawanga gaabwe nga bakulembeddwamu bakabaka baabwe.

¹²Kubanga eggwanga oba obwakabaka ebitakuweereze byakuzikirira. Ensi ezo zijja kuggweerawo ddala.”

¹²

¹³“Ekitiibwa kya Lebanooni kirikujjira, emiti egyʼettendo egyʼenfugo, omuyovu ne namukago gireetebwe okutukuza ekifo ekya watukuvu wange, ekifo ebigere byange we biwummulira ekyʼettendo.

¹⁴ⓓ Batabani baabo abaakunyigirizanga balijja okukuvuunamira; era bonna abaakusekereranga balivuunamira ku bigere byo. Balikuyita kibuga kya Katonda, Sayuuni eyʼOmutukuvu wa Katonda.”

¹⁴

¹⁵“Wadde nga wali olekeddwa awo ngʼokyayibbwa, nga tewali nʼomu akuyitamu, ndikufuula owʼettendo, essanyu eryʼemirembe gyonna.

¹⁶Olinywa amata agʼamawanga. Ku mabeere ga bakungu kwʼonooyonkanga, era olimanyira ddala nti, Nze, nze Mukama, nze Mulokozi wo era Omununuzi wo, owʼAmaanyi owa Yakobo.

¹⁷Mu kifo kyʼekikomo ndireeta zaabu, mu kifo kyʼekyuma ndireeta effeeza, mu kifo kyʼomuti ndireeta kikomo, ne mu kifo kyʼamayinja ndeete ekyuma. Emirembe gye girifuuka omufuzi wo nʼobutuukirivu ne buba omukulembeze wo.

¹⁸Okutabukatabuka tekuddeyo kuwulirwa mu nsi yo, wadde okwonoona nʼokuzikiriza munda mu nsalo zo. Ebisenge byo olibiyita Bulokozi, Era nʼenzigi zo, Kutendereza.

¹⁹ⓔ Enjuba si yeenekumulisizanga emisana, oba omwezi okukumulisizanga ekiro. Kubanga Mukama yʼanaabeeranga ekitangaala kyo ekyʼemirembe nʼemirembe, era Katonda wo yʼanaabeeranga ekitiibwa kyo.

²⁰Enjuba yo terigwa nate, nʼomwezi gwo tegulibula; Mukama yʼanaabeeranga ekitangaala kyo ekyʼemirembe nʼemirembe era ennaku zo ezʼokukungubanga zikome.

²¹Abantu bo babeere batuukirivu, ensi ebeere yaabwe emirembe nʼemirembe. Ekisimbe kye nnesimbira; omulimu gwʼemikono gyange, olwʼokulaga ekitiibwa kyange.

²²Asembayo okuba owa wansi alyala nʼaba lukumi, nʼasembayo obutono afuuke eggwanga eryʼamaanyi. Nze Mukama, ndikyanguya mu biseera byakyo.”