Isaaya 8:1-22 LGCB2014 - Bible AI

¹Awo Mukama Katonda nʼaŋŋamba nti, “Kwata ekipande ekinene okiwandiikeko nʼekkalaamu nti, ‘Kya Makerusalalukasubazi’.

²Era ndyeyitira abajulirwa abeesigwa, Uliya kabona, ne Zekkaliya omwana wa Yeberekiya.”

³Ne ŋŋenda eri nnabbi omukazi, nʼaba olubuto, nʼazaala omwana wabulenzi. Mukama Katonda nʼalyoka agamba nti, “Mmutuume erinnya Makerusalalukasubazi.

⁴Kubanga omwana nga tannamanya kugamba nti, ‘Taata’, oba ‘Maama’, obugagga bwʼe Ddamasiko nʼomunyago gwe Samaliya birinyagibwa kabaka wʼe Bwasuli.”

⁵Mukama Katonda nʼaddamu nʼayogera nange nti,

⁶“Kubanga abantu bano bagaanye amazzi gʼe Sirowa agakulukuta empolampola,[9] ne bajaguza olwa Lezini ne mutabani wa Lemaliya,

⁷kale nno Mukama anaatera okubaleetako amazzi agʼOmugga, agʼamaanyi era amayitirivu, ye kabaka wʼe Bwasuli nʼekitiibwa kye kyonna; galisukka ensalosalo zonna, ne ganjaala ku ttale lyonna.

⁸Era galyeyongera ne ganjaala mu Yuda, galyanjaala ne gamuyitamu gakome ne mu bulago, nʼemikutu gyago gyegolole okujjuza ensi yo, ggwe Emmanweri.”

⁸

⁹Muyimbe ennyimba zʼentalo mmwe amawanga naye mwekaabire. Mutege amatu mmwe mwenna abʼensi ezeewala; mwenyweze naye mwekaabire; mwenyweze naye mwekaabire.

¹⁰Muteese enkola yammwe, naye yakugwa butaka, mwogere ekigambo naye tekirituukirira.

¹¹Kubanga Mukama Katonda yayogera nange ngʼantaddeko omukono gwe ogwʼamaanyi, ngʼandabula nneme okugoberera ekkubo lyʼabantu bano, ngʼaŋŋamba nti,

¹²ⓦ “Ebintu byonna abantu bano bye bayita enkwe, temubiyita nkwe, era temutya bye batya, wadde okutekemuka[10] omutima.

¹³Naye mujjukire nti nze Mukama Katonda owʼEggye, nze Mutukuvu, nze gwe muba mutya, era gwe muba mwekengera.

¹⁴ⓧ Olwʼobutukuvu eri ennyumba zombi eza Isirayiri aliba ejjinja era olwazi kwe bagwa, era alibeera omutego era ekyambika eri abʼomu Yerusaalemi.

¹⁵Era bangi abaliryesittalako, bagwe, bamenyeke, bategebwe bakwatibwe.”

¹⁵

¹⁶Nyweza obujulirwa okakase amateeka mu bayigirizwa bange.

¹⁷ⓨ Nange nnaalindirira Mukama Katonda akwese amaaso ge okuva ku nnyumba ya Yakobo, mmunoonye nʼessuubi.

¹⁸ⓩ Laba, nze nʼabaana Mukama Katonda bampadde tuli bubonero nʼebyewuunyo mu Isirayiri obuva eri Mukama Katonda owʼEggye, abeera ku lusozi Sayuuni.

¹⁹Abantu bwe babagamba nti Mwebuuze ku abo abaliko emizimu, nʼabasamize abakaaba ngʼennyonyi era abajoboja, eggwanga tekirigwanira kwebuuza ku Katonda waalyo? Lwaki ebikwata ku balamu mubibuuza abafu?

²⁰Tudde eri amateeka nʼobujulirwa! Bwe baba teboogera bwe batyo, mazima obudde tebugenda kubakeerera.

²¹Era baliyita mu nsi nga beeraliikirira nnyo nga balumwa enjala; era enjala bweriyitirira okubaluma ne banyiiga era nga batunudde waggulu balikolimira kabaka ne Katonda waabwe.

²²Era bwe balitunula ku nsi baliraba nnaku na kizikiza, nʼentiisa eyʼokubonaabona basuulibwe mu kizikiza ekikutte zigizigi.