Isaaya 9:1-21 LGCB2014 - Bible AI

¹ⓐ Naye tewaliba kizikiza eri oyo eyali mu kubonaabona. Edda yatoowaza ensi ya Zebbulooni nʼensi ya Nafutaali, naye mu kiseera ekijja aliwa Ggaliraaya ekitiibwa, ensi eyʼabamawanga emitala wa Yoludaani, awali ekkubo erigenda ku nnyanja.

²ⓑ Abantu abaatambuliranga mu kizikiza balabye ekitangaala ekyʼamaanyi, abo abaatuulanga mu nsi eyʼekizikiza ekingi, omusana gubaakidde.

³Oyazizza eggwanga, obongedde essanyu, basanyukira mu maaso go ngʼabantu bwe basanyuka mu biseera ebyʼamakungula, ngʼabasajja bwe basanyuka nga bagabana omunyago.[11]

⁴Nga ku lunaku Abamidiyaani lwe baawangulwa, omenye ekikoligo ekyamuzitoowereranga, nʼekiti ekyʼoku kibegabega kye, nʼoluga lwʼoyo amunyigiriza.

⁵Kubanga buli ngatto ya mulwanyi ekozesebwa mu lutalo na buli kyambalo ekibunye omusaayi, biriba bya kwokebwa, bye birikozesebwa okukoleeza omuliro.

⁶Kubanga omwana atuzaaliddwa ffe, omwana owoobulenzi atuweereddwa ffe, nʼokufuga kunaabanga ku bibegabega bye. Nʼerinnya lye aliyitibwa nti, Wa kitalo, Omuwi wʼamagezi, Katonda Ayinzabyonna, Kitaffe owʼEmirembe Gyonna, Omulangira wʼEmirembe.

⁷ⓒ Okufuga kwe nʼemirembe biryeyongeranga obutakoma. Alifugira ku ntebe ya Dawudi ne ku bwakabaka bwe, nʼokubuwanirira nʼobwenkanya nʼobutuukirivu okuva leero okutuusa emirembe gyonna. Obumalirivu bwa Mukama Katonda owʼEggye bulikituukiriza ekyo.

⁸Mukama yaweereza obubaka obukwata ku Yakobo,[12] ku birituuka ku Isirayiri.

⁹Era abantu bonna balibumanya, Efulayimu nʼabantu bʼomu Samaliya aboogera nʼamalala nʼomutima omukakanyavu,

¹⁰nti, “Amatoffaali gagudde wansi naye tulizimbya amayinja amateme, emisukamooli gitemeddwawo naye tulizzaawo emivule.”

¹¹Mukama Katonda kyaliva awa abalabe ba Lezini amaanyi bamulumbe; alibakumaakuma bamulumbe.

¹²ⓓ Abasuuli balisinziira mu buvanjuba, nʼAbafirisuuti bave e bugwanjuba, balyoke basaanyeewo Isirayiri nʼakamwa akaasamye.

¹²Newaakubadde nga biri bityo, obusungu bwa Mukama buliba tebunnavaawo era omukono gwe guliba gukyagoloddwa.

¹³Kubanga abantu tebakyuse kudda wadde okunoonya Mukama Katonda owʼEggye eyabakuba.

¹⁴Bwʼatyo Mukama Katonda kyaliva asala ku Isirayiri, omutwe nʼomukira, ettabi nʼolukindu mu lunaku lumu.

¹⁵Omutwe be bakadde nʼabantu abʼekitiibwa, nʼomukira be bannabbi abayigiriza ebyʼobulimba.

¹⁶Kubanga abakulembera abantu bano bababuzaabuuza, nʼabo abakulemberwa babuzibwabuzibwa.

¹⁷Noolwekyo, Mukama tajja kusanyukira bavubuka, wadde okukwatirwa ekisa abo abataliiko ba kitaabwe wadde bannamwandu; kubanga buli omu mukozi wa bibi, era buli kamwa konna kogera ebyʼobuwemu.

¹⁷Olwa bino byonna, obusungu bwa Mukama tebunakyusibwa kubavaako, era omukono gwe gukyagoloddwa.

¹⁸Ddala ekibi kyokya ngʼomuliro; gumalawo emyeramannyo nʼobusaana. Era gukoleeza ebyʼomu kibira, omukka ne gunyooka ne gutumbiira waggulu.

¹⁹Olwʼobusungu bwa Mukama Katonda owʼEggye ensi eggiiridde ddala, era nʼabantu bali ngʼenku ezʼokukuma omuliro, tewali muntu alekawo muganda we.

²⁰Balimalawo ebyʼoku mukono ogwa ddyo, naye balisigala bayala; balirya nʼebyʼoku kkono, naye tebalikkuta. Buli omu alirya ku mubiri gwʼezzadde lye.

²¹ⓔ Manase alirya Efulayimu ne Efulayimu nʼalya Manase ate bombi ne balya Yuda.

²¹Naye wadde nga biri bityo, obusungu bwa Mukama buliba tebunnavaawo, era nʼomukono gwe guliba gukyagoloddwa.