Kaabakuuku 1:1-17 LGCB2014 - Bible AI

¹Buno bwe bubaka bwa Mukama, Kaabakuuku nnabbi bwe yafuna.

²Ayi Mukama, ndituusa ddi okukukaabirira naye nga tompuliriza? Lwaki nkukaabirira nti, “Ebikolwa ebyʼobukambwe bimpitiriddeko,” naye nʼotonnyamba?

³Lwaki ondaga obutali bwenkanya era lwaki ogumiikiriza obukyamu? Kubanga okuzikiriza nʼebikolwa ebyʼobukambwe biri mu maaso gange, empaka nʼennyombo byeyongede.

⁴Amateeka kyegavudde gatagonderwa era nʼobwenkanya ne butakolebwa. Ababi be basinga abatuukirivu obungi era babeebunguludde, nʼobwenkanya ne bulinnyirirwa.

⁵ⓐ “Mutunuulire amawanga, mwetegereze. Mwewuunyize ddala nnyo. Kubanga ŋŋenda kukola omulimu mu nnaku zammwe gwe mutalikkiriza newaakubadde nga mugubuuliddwa.

⁶Kubanga laba, nkuyimusiza Abakaludaaya, eggwanga eryo eririna ettima era ekkambwe, ababunye ensi eno nʼeri nga bawamba amawanga agatali gaabwe.

⁷Ba ntiisa, batiibwa, be beetekera amateeka gaabwe era be bagassa mu nkola, nga balwanirira ekitiibwa kyabwe.

⁸Embalaasi zaabwe zidduka okukira engo, era mu bukambwe zikira emisege egyʼekiro. Abasajja abeebagala embalaasi bava mu nsi eyʼewala era bajja beesaasaanyizza ne banguwa okutuuka ngʼensega bwʼerumba kyʼeneerya.

⁹Bajja nʼeryanyi bonna, ebibinja byabwe birumba ngʼembuyaga eyʼomu ddungu; ne balyoka bayoola abawambe abangi ngʼomusenyu.

¹⁰Weewaawo, basekerera bakabaka ne baduulira nʼabakungu. Basekerera buli kibuga ekiriko ekigo ne bakituumako ebifunfugu ne balinnyira okwo, ne bakiwamba.

¹¹Awo ne bayita nga bakunta ngʼembuyaga; abantu bano omusango be gwasinga, eryanyi lyabwe ye katonda waabwe.”

¹²Ayi Mukama toli wa mirembe na mirembe, ggwe Mukama Katonda wange, si ggwe Mutukuvu wange? Tetulifa. Ayi Mukama ggwe wabateekawo nʼobawa amaanyi batusalire emisango. Era ggwe Olwazi, wabateekawo kubonereza.

¹³Amaaso go gajjudde obulongoofu tegatunula ku kibi, so toyinza kugumiikiriza bukyamu. Kale lwaki ggwe ogumiikiriza abʼenkwe, nʼosirika ngʼomubi amalirawo ddala omuntu amusinga obutuukirivu?

¹⁴Kubanga abantu obafudde ngʼebyennyanja ebyʼomu nnyanja, ngʼebitonde ebyʼomu nnyanja ebitaliiko abifuga.

¹⁵Omulabe omubi abakwata bonna ngʼeddobo, oluusi nʼabawalula mu katimba ke, nʼabakuŋŋaanya mu kiragala kye nʼalyoka asanyuka nʼajaguza.

¹⁶Kyava awaayo ssaddaaka eri akatimba ke nʼayotereza nʼekiragala kye obubaane; akatimba ke kamuwa obulamu obwʼokwejalabya, nʼalya emmere eyʼekigagga.

¹⁷Kale, bwe batyo bwe banaalekebwa okutikkula obutimba bwabwe, nʼokusaanyaawo amawanga awatali kusaasira?