Kaabakuuku 2:1-20 LGCB2014 - Bible AI

¹Kale ndiyimirira mu kifo kyange we ntera okubeera ntunule nga ndi waggulu eyo ku ggulumu nnindirire kyʼaliŋŋamba, era ne kye ndimuddamu ekikwata ku kwemulugunya kwʼabantu.

²Awo Mukama nʼanziramu nʼayogera nti, “Wandiika okwolesebwa okwo. Kuwandiike bulungi ate omubaka gwe banaatuma, akutwale bunnambiro.

³ⓑ Kubanga okwolesebwa okwo kujja mu kiseera kyakwo ekigere. Kwogera ku byʼenkomerero ate si kwa bulimba. Bwe kunaaba ngʼokuluddewo, mukulindirire, kujja kutuukirira, tekugya kulwa.

⁴ⓒ Laba oyo owʼemmeeme eteri nnongoofu wa kugwa, naye omutuukirivu aliba mulamu olwʼokukkiriza kwe.”

⁵Weewaawo, omwenge mulimba guleetera omuntu amalala, ate taguwummulako. Ate olwokubanga gwa mululu ngʼemagombe, mu butakkuta gufaanana okufa. Era okufaanana ngʼolumbe, tegukkuta, amawanga gonna gugeekuŋŋanyizaako ne gugafuula abasibe.

⁶“Bano bonna si be balimugererako engero bamusekerere nga bagamba nti, ‘Zimusanze oyo eyeyongeza ebitali bibye! Oyo eyeetuumako obugagga obuva mu nguzi!’

⁷Abakubanja tebalikuyimukirako nga tomanyiridde, era tebalizuukuka ne bakweraliikiriza? Oliba togudde mu mikono gyabwe?

⁸Kubanga onyaze amawanga mangi, abantu abasigaddewo balikunyaga; Oyiye omusaayi gwʼabantu, nʼoyonoona ensi nʼebibuga nʼabantu bonna ababibeeramu.”

⁸

⁹Zimusanze oyo azimbira amaka ge ku bikolwa ebibi, azimba ekisu kye waggulu, okwekuuma obutatuukwako kabi!

¹⁰Wategeka okuzikirira kwʼabantu bangi, nʼoswaza ennyumba yo ne weefiiriza obulamu bwo.

¹¹Amayinja gʼoku bbugwe galikaaba, nʼemikiikiro gyʼebibajje girikyasanguza.

¹¹

¹²Zimusanze oyo azimba ekibuga nʼomusaayi, atandika ekibuga nʼobutali butuukirivu.

¹³Tekyategekebwa Mukama owʼEggye nti okutegana kwʼabantu nku buku za muliro, nʼamawanga geemalamu ensa olwʼebintu ebitaliimu?

¹⁴ⓓ Kubanga ensi erijjula okumanya ekitiibwa kya Mukama, ngʼamazzi bwe ganjaala ku nnyanja.

¹⁴

¹⁵Zimusanze oyo awa baliraanwa be ekitamiiza nʼakibafukira okuva mu kita nʼabawa banywe okutuusa lwe batamiira asobole okutunuulira ensonyi zaabwe!

¹⁶Olijjuzibwa ensonyi mu kifo kyʼekitiibwa. Naawe olinywa nʼoswala. Ekikompe ekyʼomu mukono gwa Mukama ogwa ddyo kirikyusibwa kidde gyʼoli, nʼensonyi ezʼobuwemu zisaanikire ekitiibwa kyo.

¹⁷Ebikolwa ebyʼobukambwe bye watuusa ku Lebanooni, nʼokutta ensolo, birikutiisa. Osse abantu nʼozikkiriza ensi nʼebibuga nʼabantu ababibeeramu.

¹⁷

¹⁸“Ekifaananyi ekyole kigasa ki? Anti kibajje bubazzi. Oba ekifaananyi ekyʼekyuma, ekisomesa obulimba? Kubanga omuweesi yeesiga mirimu gya mikono gye nga akola ebifaananyi ebitayogera!

¹⁹Zimusanze oyo agamba omuti nti, ‘Lamuka;’ agamba ejjinja nti, ‘Golokoka!’ Kino kisobola okuluŋŋamya? Kibikiddwa zaabu ne ffeeza, so tekiriimu bulamu nʼakatono.

²⁰Naye Mukama ali mu yeekaalu ye entukuvu: ensi zonna zisiriikirire mu maaso ge.”