Kaabakuuku 3:1-19 LGCB2014 - Bible AI

¹Okusaba kwa nnabbi Kaabakuuku, okwʼEkisigiyonosi.

²Ayi Mukama, mpulidde ebigambo byo; mpulidde ettutumu lyo Ayi Mukama, ne ntya. Bizze buggya mu nnaku zaffe, bimanyise mu biro bino, era mu busungu jjukira okusaasira.

²

³Katonda yajja ngʼava e Temani, Omutukuvu oyo ngʼava ku lusozi Palani. Ekitiibwa kye kyatimbibwa ku ggulu, ensi nʼeryoka ejjula ettendo lye.

⁴Okumasamasa kwe ne kulyoka kubeera ngʼenjuba evaayo. Ebimyanso byayakanga okuva mu mukono gwe, era omwo mwe mwasinziiranga amaanyi ge agʼekitalo.

⁵Kawumpuli ye yakulembera, Endwadde endala zinaamutta ne zigoberera.

⁶Yayimirira nʼanyeenyanyeenya ensi; Yatunula nʼakankanya amawanga. Ensozi ezʼedda za merenguka, obusozi obwʼedda ne buggwaawo. Engeri ze, za mirembe na mirembe.

⁷Nalaba eweema zʼe Kusani nga ziri mu nnaku: nʼentimbe ezʼensi ya Midiyaani nga zijugumira.

⁷

⁸Ayi Mukama, wanyiigira emigga? Obusungu bwo bwali ku bugga obutono? Wanyiigira ennyanja bwe weebagala embalaasi zo, nʼolinnya ku magaali go agʼobuwanguzi?

⁹Wasowolayo akasaale ko, wategeka okulasa obusaale; ensi nʼogyawulayawulamu nʼemigga.

¹⁰Ensozi zaakulaba, ne zeenyogootola; Amataba ne gayitawo mbiro, obuziba bwʼennyanja ne buwuluguma, ne busitula amayengo gaayo waggulu.

¹⁰

¹¹Enjuba nʼomwezi ne biyimirira butengerera mu bifo byabyo, olwʼokumyansa kwʼobusaale bwo nga buwenyuka, nʼolwʼokumyansa kwʼeffumu lyo eritemagana.

¹²Watambula okuyita mu nsi ngʼojjudde ekiruyi, wasambirirasambirira amawanga mu busungu bwo.

¹³Wavaayo oleetere abantu bo obulokozi, olokole gwe wafukako amafuta; Wabetenta omukulembeze wʼensi ekola ebibi, ngʼomwerulira ddala okuva ku mutwe okutuuka ku bigere.

¹⁴Wafumita omutwe gwe nʼeffumu lye ye, abalwanyi be bwe baavaayo okutugoba, nga bali ngʼabanaatumalawo, ffe abaali baweddemu essuubi nga twekwese.

¹⁵Walinnyirira ennyanja nʼembalaasi zo, nʼotabangula amazzi amangi.

¹⁶Nawulira, nʼomutima gwange ne gukankana nʼemimwa gyange gijugumira olwʼeddoboozi eryo; Obuvundu ne buyingira mu magumba gange, amagulu gange ne gakankana. Naye nnaalindirira nʼobugumiikiriza olunaku olwʼokulabiramu ennaku bwe lulijjira eggwanga eritulumba.

¹⁷Wadde omutiini tegutojjera, so nʼemizabbibu nga tegiriiko bibala, amakungula gʼemizeeyituuni ne gabula, ennimiro ne zitabala mmere nʼakamu, endiga nga ziweddemu mu kisibo, nga nʼente tezikyalimu mu biraalo,

¹⁸kyokka ndijaguliza Mukama, ne nsanyukira mu Katonda Omulokozi wange.

¹⁸

¹⁹ⓔ Mukama Katonda, ge maanyi gange; afuula ebigere byange okuba ngʼebyʼempeewo, era ansobozesa okutambulira mu bifo ebigulumivu.

¹⁹Ya Mukulu wʼAbayimbi, ku bivuga byange ebirina enkoba.