Kaggayi 1:1-15 LGCB2014 - Bible AI

¹ⓐ Mu mwaka ogwokubiri ogwʼokufuga kwa kabaka Daliyo, ku lunaku olusooka mu mwezi ogwʼomukaaga, ekigambo kya Mukama ne kijjira nnabbi Kaggayi okutegeeza Zerubbaberi mutabani wa Seyalutyeri, owʼessaza lya Yuda, ne Yoswa mutabani wa Yekozadaaki kabona asinga obukulu nti;

²Bwʼati bwʼayogera Mukama owʼeggye nti, “Abantu bano boogera nti, ‘Ekiseera tekinnatuuka okuddaabiriza ennyumba ya Mukama.’ ”

³Awo ekigambo kya Mukama ne kijjira nnabbi Kaggayi nga kyogera nti;

⁴“Kino kye kiseera mmwe okubeera mu nnyumba zammwe enkole obulungi, naye ennyumba eyo nʼerekebwa nga kifulukwa?”

⁵Kale nno bwʼati bwʼayogera Mukama owʼEggye nti, “Mweddeko ku neeyisa yammwe.

⁶Musimbye bingi naye ne mukungula bitono; mulya naye temukkuta; munywa naye ennyonta tebaggwaako; mwambala naye temubuguma; mukolera empeera naye ze mukoze muziteeka mu nsawo ejjudde ebituli.”

⁷Bwʼati bwʼayogera Mukama owʼEggye nti, “Mweddeko ku neeyisa yammwe.

⁸Mwambuke mu nsozi muleeteyo embaawo muzimbe ennyumba ngisanyukire, ngulumizibwe,” bwʼayogera Mukama.

⁹“Mwasuubira bingi, naye mulaba bwe muvuddemu ebitono. Bye mwaleeta eka, nabifuumuula. Mumanyi ensonga? bwʼayogera Mukama owʼEggye. Kubanga buli muntu afa ku nnyumba ye naye ennyumba yange mugigayaaliridde.

¹⁰Eggulu kyerivudde liziyizibwa okuleeta omusulo, nʼettaka nʼokuleeta ne litaleeta bibala byalyo.

¹¹Nasindika ekyeya ku nnimiro ne ku nsozi, ku mmere eyʼempeke ne ku wayini omuggya, ku mafuta ne ku buli bibala ebyʼettaka, ku bantu ne ku nsolo, ne ku mirimu gyonna egyʼengalo.”

¹²Awo Zerubbaberi mutabani wa Seyalutyeri, ne Yoswa mutabani wa Yekozadaaki, ye yali kabona asinga obukulu, nʼabantu bonna abaasigalawo ne bagondera eddoboozi lya Mukama Katonda waabwe, nʼobubaka bwa nnabbi Kaggayi, kubanga Mukama Katonda waabwe ye yamutuma. Abantu ne batya Mukama.

¹³Awo Kaggayi omubaka wa Mukama nʼategeeza abantu obubaka obwava eri Mukama nti, “Ndi wamu nammwe,” bwʼayogera Mukama.

¹⁴Awo Mukama nʼakubiriza omutima gwa Zerubbaberi mutabani wa Seyalutyeri, owʼessaza lya Yuda, nʼomutima gwa Yoswa mutabani wa Yekozadaaki, kabona asinga obukulu, nʼemitima egyʼabantu bonna abaasigalawo, ne bajja ne batandika omulimu ku nnyumba ya Mukama owʼEggye, Katonda waabwe,

¹⁵ku lunaku olwʼamakumi abiri mu ennya mu mwezi ogwʼomukaaga mu mwaka ogwokubiri ogwʼokufuga kwa kabaka Daliyo.