Kaggayi 2:1-23 LGCB2014 - Bible AI

¹Awo ku lunaku olwʼamakumi abiri mu olumu mu mwezi ogwʼomusanvu, ekigambo kya Mukama ne kijjira nnabbi Kaggayi nti,

²“Yogera ne Zerubbaberi mutabani wa Seyalutyeri, owʼessaza lya Yuda ne Yoswa mutabani wa Yekozadaaki kabona asinga obukulu, nʼabantu abaasigalawo, obabuuze nti,

³ⓑ ‘Ani mu mmwe akyasigaddewo eyalaba ku kitiibwa kyʼennyumba eno? Ebafaananira etya kaakano? Tebafaananira ngʼeteriimu kaabuntu?

⁴Kale nno guma omwoyo, ggwe Zerubbaberi, bwʼayogera Mukama; guma omwoyo, ggwe Yoswa mutabani wa Yekozadaaki kabona asinga obukulu; mugume omwoyo mmwe mwenna abantu abʼomu nsi,’ bwʼayogera Mukama, ‘Mukole, kubanga ndi wamu nammwe,’ bwʼayogera Mukama owʼEggye.

⁵‘Kino kye nalagaana nammwe bwe mwali muva mu Misiri, ngʼOmwoyo wange anaabeeranga nammwe. Temutya.’

⁶ⓒ “Bwʼatyo bwʼayogera Mukama owʼEggye nti, ‘Mu bbanga eritali lyʼewala ndikankanya eggulu nʼensi, nʼennyanja nʼolukalu.

⁷Ndikankanya amawanga gonna, nʼamawanga gonna ge njagala galijja, ne nzijuza ennyumba eno ekitiibwa,’ bwʼayogera Mukama owʼEggye.

⁸‘Effeeza yange, ne zaabu yange,’ bwʼayogera Mukama owʼeggye.

⁹‘Ekitiibwa ekyʼennyumba eriwo kaakano, kirisinga ekitiibwa kyʼeri eyasooka era mu kifo kino ndizzaawo emirembe,’ bwʼayogera Mukama owʼEggye.”

¹⁰Awo ku lunaku olwʼamakumi abiri mu ennya olwʼomwezi ogwʼomwenda mu mwaka ogwokubiri ogwʼokufuga kwa Daliyo, ekigambo kya Mukama ne kijjira nnabbi Kaggayi nti,

¹¹“Bwʼatyo bwʼayogera Mukama owʼEggye nti, ‘Buuza bakabona etteeka kye ligamba.

¹²Omuntu bwʼasitulira ennyama eyatukuzibwa mu kirenge ekyʼekyambalo kye, ekirenge ne kikoma ku mugaati oba ku supu, oba ku wayini, oba ku mafuta oba ku mmere endala yonna, bitukuzibwa?’ ”

¹²Bakabona ne baddamu nti, “Nedda.”

¹³ⓓ Awo Kaggayi nʼabuuza nti, “Omuntu atali mulongoofu olwʼomulambo, bwʼakoma ku bintu ebyo, bifuuka ebitali birongoofu?” Bakabona ne baddamu nti, “Bifuuka ebitali birongoofu.”

¹⁴Kaggayi nʼaddamu nti, “Kale nno bwe batyo bwe bali abantu bano nʼeggwanga lino. Buli kye bakola ne buli kye bawaayo ngʼekiweebwayo, si kirongoofu,” bwʼayogera Mukama.

¹⁵“ ‘Kale nno, mweddeko okuva ku lunaku lwa leero, mujjukire ebiseera biri bwe byali, nga nʼejjinja erimu terinnateekebwa ku linnaalyo mu yeekaalu ya Mukama.

¹⁶Omuntu yenna bwe yatuukanga ku ntuumu eyandibadde eyʼebipimo amakumi abiri, yassangawo ebipimo kkumi. Omuntu yenna bwe yalaganga mu ssogolero okusenamu lita amakumi ataano, yasangangamu amakumi abiri.

¹⁷Nakolimira emirimu gyonna egyʼemikono gyammwe nʼokugengewala nʼobukuku, nʼomuzira, naye ne mutakyuka kudda gye ndi,’ bwʼayogera Mukama.

¹⁸Okuva olunaku lwa leero, olwʼamakumi abiri mu ennya mu mwezi ogwʼomwenda, mujjukire olunaku lwe baazimba omusingi gwa yeekaalu ya Mukama. Mwebuuze nti,

¹⁹Wakyaliwo ensigo eyasigala mu tterekero? Mulabe, emiti gino egimenyeddwa, ogwʼomuzabbibu nʼogwʼomutiini, nʼogwʼomukomamawanga, nʼogwʼomuzeeyituuni tegibalangako bibala.

¹⁹“ ‘Naye okuva ne leero ndibawa omukisa.’ ”

²⁰Awo ekigambo kya Mukama ne kijjira Kaggayi omulundi ogwokubiri ku lunaku olwʼamakumi abiri mu ennya olwʼomwezi ogwo nga kigamba nti,

²¹“Tegeeza Zerubbaberi gavana wa Yuda nti Ndikankanya eggulu nʼensi.

²²Ndisulika entebe ezʼobwakabaka ne nzigyawo obuyinza bwʼobwakabaka obunnaggwanga. Ndiwamba amagaali nʼabavuzi baago, nʼembalaasi na buli abazeebagala, balittibwa baganda baabwe.

²³“ ‘Ku lunaku olwo, ggwe omuweereza wange Zerubbaberi mutabani wa Seyalutyeri, ndikufuula ngʼakabonero, kubanga nkulonze,’ bwʼayogera Mukama owʼEggye.”