Koseya 5:1-15 LGCB2014 - Bible AI

¹Muwulire kino mmwe bakabona! Musseeyo omwoyo, mmwe Isirayiri! Muwulirize, mmwe ennyumba ya Kabaka! Omusango guli ku mmwe: Mubadde kyambika e Mizupa, era ekitimba ekitegeddwa ku Taboli.

²Abajeemu bamaliridde okutta, naye ndi babonereza bonna.

³Mmanyi byonna ebikwata ku Efulayimu, so ne Isirayiri tankisibwa. Efulayimu weewaddeyo okukuba obwamalaaya, ne Isirayiri yeeyonoonye.

³

⁴Ebikolwa byabwe tebibaganya kudda eri Katonda waabwe, kubanga omwoyo ogwʼobwamalaaya guli mu mitima gyabwe, so tebamanyi Mukama.

⁵Amalala ga Isirayiri gabalumiriza; Abayisirayiri ne Efulayimu balyesittala olwʼomusango gwabwe; ne Yuda alyesittalira wamu nabo.

⁶Bwe baligenda nʼebisibo byabwe nʼamagana gaabwe okunoonya Mukama, tebalimulaba; abaviiridde, abeeyawuddeko.

⁷Tebabadde beesigwa eri Mukama; bazadde abaana aboobwenzi. Embaga ezʼomwezi ogwakaboneka kyeziriva zibamalawo, nʼennimiro zaabwe ne ziragajjalirwa.

⁷

⁸Mufuuwe eŋŋombe mu Gibea, nʼekkondeere mu Laama. Muyimuse amaloboozi e Besaveni; mutukulembere mmwe Benyamini.

⁹Efulayimu alifuuka matongo ku lunaku olwʼokubonerezebwa. Nnangirira ebiribaawo mu bika bya Isirayiri.

¹⁰Abakulembeze ba Yuda bali ngʼabo abajjulula ensalo, era ndibafukako obusungu bwange ngʼomujjuzo gwʼamazzi.

¹¹Efulayimu anyigirizibwa, era omusango gumumezze, kubanga yamalirira okugoberera bakatonda abalala.

¹²Kyenvudde nfuuka ngʼennyenje eri Efulayimu, nʼeri ennyumba ya Yuda nʼemba ngʼekintu ekivundu.

¹²

¹³“Efulayimu bwe yalaba obulwadde bwe, ne Yuda nʼalaba ekivundu kye, Efulayimu nʼaddukira mu Bwasuli, nʼatumya obuyambi okuva eri kabaka waayo omukulu. Naye tasobola kubawonya newaakubadde okubajjanjaba ebiwundu byabwe.

¹⁴Kyendiva mbeera ngʼempologoma eri Efulayimu, era ngʼempologoma eyʼamaanyi eri ennyumba ya Yuda. Ndibataagulataagula ne ŋŋenda; ndibeetikka ne mbatwala, ne babulwako ayinza okubawonya.

¹⁵Ndiddayo mu kifo kyange, okutuusa lwe balikkiriza omusango gwabwe. Balinnoonya, mu buyinike bwabwe, balinnoonya nʼomutima gwabwe gwonna.”