Lukka 1:1-80 LGCB2014 - Bible AI

¹Abantu bangi bagezezzaako okuwandiika ebyafaayo ebyatuukirizibwa mu ffe,

²ngʼabo abaasooka edda bwe baabitubuulira, nga be baali abajulirwa era abaweereza bʼEkigambo okuviira ddala ku lubereberye.

³Bwe ntyo bwe mmaze okukakasiza ddala buli kintu nʼobwegendereza okuva ku byʼolubereberye okutuukira ddala ku byasembayo, ne ndaba nga kirungi okukuwandiikira ggwe Teefiro owʼekitiibwa ennyo, ndyoke mbikuwandiikire nga bwe byaliraanagana.

⁴Olyoke omanye amazima gʼebyo bye wayigirizibwa.

⁵Awo mu biro Kabaka Kerode we yafugira Obuyudaaya, waaliwo kabona erinnya lye Zaakaliya, nga wa mu kitongole kya Abiya, nga mukyala we naye yali wa mu kika kya Alooni, erinnya lye Erisabesi.

⁶Abantu abo bombi baali batuukirivu mu maaso ga Katonda, era nga batambulira mu mateeka ga Katonda gonna, ne mu biragiro bya Mukama, nga tebaliiko kya kunenyezebwa.

⁷Bombi baali bakaddiye nnyo, era tebaalina mwana, kubanga Erisabesi yali mugumba.

⁸Awo lwali lumu, Zaakaliya bwe yali ngʼali ku mulimu gwe ogwʼobwakabona mu maaso ga Katonda, kubanga kye kyali ekiseera ekyʼoluwalo lwe,

⁹nʼalondebwa okwoteza obubaane mu yeekaalu ya Mukama, ngʼemirimu gyʼobwakabona bwe gyabanga.

¹⁰Mu ssaawa eyo eyʼokwoteza obubaane ekibiina kyonna ekyʼabantu baali bakuŋŋaanidde mu luggya lwa Yeekaalu.

¹¹Awo malayika wa Mukama nʼalabikira Zaakaliya, nʼayimirira ku luuyi olwa ddyo olwʼekyoto okwoterezebwa obubaane!

¹²Zaakaliya nʼatya nnyo bwe yalaba malayika, entiisa nʼemukwata.

¹³Naye malayika nʼamugamba nti, “Totya Zaakaliya! Kubanga okusaba kwo kuwuliddwa, era mukazi wo Erisabesi ajja kukuzaalira omwana wabulenzi. Olimutuuma erinnya Yokaana.

¹⁴Mwembi mulisanyuka nnyo ne mujaguza. Era bangi abalibasanyukirako olwʼokuzaalibwa kwe.

¹⁵Kubanga aliba mukulu mu maaso ga Katonda. Talinywa mwenge wadde ekitamiiza kyonna. Era alijjuzibwa Mwoyo Mutukuvu ngʼakyali mu lubuto lwa nnyina.

¹⁶Era alireetera abaana ba Isirayiri bangi okudda eri Mukama Katonda waabwe.

¹⁷Aliweerereza mu mwoyo ne mu maanyi aga nnabbi Eriya, nʼakyusa emitima gyʼaba kitaabwe okudda eri abaana baabwe, nʼokukyusa emitima gyʼabajeemu okudda eri amagezi gʼabatuukirivu alyoke ateeketeeke abantu okulindirira Mukama.”

¹⁸Zaakaliya nʼagamba malayika nti, “Ekyo nnaakimanya ntya? Kubanga nze ndi mukadde, ne mukazi wange naye akaddiya nnyo.”

¹⁹Malayika nʼamugamba nti, “Nze Gabulyeri ayimirira mu maaso ga Katonda, era yʼantumye okwogera naawe nʼokukuleetera amawulire gano.

²⁰Naye olwʼokuba nga tokkirizza bigambo byange, ojja kuziba omumwa, era togenda kuddamu kwogera okutuusa ngʼebintu ebyo bimaze okubaawo. Kubanga ebigambo byange byonna birimala kutuukirira mu kiseera kyabyo.”

²¹Abantu abaali balindirira ebweru wa Yeekaalu okulaba Zaakaliya ne beewuunya nnyo ekyamulwisaayo ennyo bwʼatyo.

²²Oluvannyuma ennyo bwe yavaayo, yali tasobola kwogera nabo, ne bategeera nga mu Yeekaalu afuniddeyo okwolesebwa. Nʼasigala ngʼazibye omumwa naye ngʼabategeeza mu bubonero.

²³Nʼabeera mu Yeekaalu okutuusa ennaku ze ezʼoluwalo lwe zaggwaako nʼalyoka addayo eka.

²⁴Ennaku ezo bwe zaayitawo, mukazi we Erisabesi nʼaba olubuto, ne yeekwekera ebbanga lya myezi etaano.

²⁵Nʼagamba nti, “Mukama nga wa kisa kingi, kubanga anziggyeeko ensonyi olwʼobutaba na mwana.”

²⁶Awo mu mwezi ogwʼomukaaga, Katonda nʼatuma malayika Gabulyeri mu kibuga Nazaaleesi ekyʼomu Ggaliraaya

²⁷eri omuwala erinnya lye Maliyamu, nga tamanyi musajja, eyali ayogerezebwa omusajja erinnya lye Yusufu, owʼomu lulyo lwa Dawudi.

²⁸Awo Gabulyeri nʼalabikira Maliyamu nʼamulamusa nti, “Mirembe! Ggwe aweereddwa omukisa! Mukama ali naawe!”

²⁹Maliyamu nʼatya, nʼabulwa nʼekyokwogera, ngʼokulamusa okwo kumutabudde, nga nʼamakulu gaakwo tagategeera.

³⁰Awo malayika nʼamugamba nti, “Totya, Maliyamu, kubanga olabye ekisa mu maaso ga Katonda.

³¹Kubanga, laba, olibeera olubuto, olizaala omwana wabulenzi era olimutuuma erinnya, Yesu.

³²Agenda kuba mukulu, wa kitiibwa, era aliyitibwa Omwana wʼOyo Ali Waggulu Ennyo, era Mukama Katonda alimuwa entebe eyʼobwakabaka eya jjajjaawe Dawudi.

³³Alifuga ennyumba ya Yakobo emirembe gyonna, era nʼobwakabaka bwe tebulikoma.”

³⁴Awo Maliyamu nʼabuuza malayika nti, “Ekyo kiriba kitya? Kubanga simanyi musajja.”

³⁵Malayika nʼamuddamu nti, “Mwoyo Mutukuvu alikukkako, nʼamaanyi gʼOyo Ali Waggulu Ennyo galikubuutikira, nʼomwana alizaalibwa aliba mutukuvu, Omwana wa Katonda.

³⁶Laba, muganda wo Erisabesi eyayitibwanga omugumba, kati ali lubuto lwa myezi mukaaga mu bukadde bwe.

³⁷Kubanga buli kigambo kiyinzika eri Katonda.”

³⁸Maliyamu nʼaddamu nti, “Nze ndi muweereza wa Mukama, kibe ku nze nga bwʼogambye.” Malayika nʼava wʼali, nʼagenda.

³⁹Awo mu biro ebyo, Maliyamu nʼayanguwa okugenda mu nsi ya Buyudaaya eyʼensozi, mu kibuga kyayo.

⁴⁰Nʼayingira mu nnyumba ya Zaakaliya nʼalamusa Erisabesi.

⁴¹Naye Maliyamu bwe yalamusa Erisabesi, omwana eyali mu lubuto lwa Erisabesi nʼabuukabuuka era nʼajjuzibwa Mwoyo Mutukuvu.

⁴²Erisabesi nʼalyoka ayogerera mu ddoboozi eryʼomwanguka nti, “Oweereddwa omukisa, ggwe mu bakazi, era nʼomwana ali mu lubuto lwo aweereddwa omukisa.

⁴³Nga nfunye ekitiibwa kinene ggwe nnyina wa Mukama wange okujja okunkyalira!

⁴⁴Kubanga bwʼoyingidde nʼonnamusa, omwana ali mu lubuto lwange oluwulidde ku ddoboozi lyo ne yeekyusakyusa olwʼessanyu!

⁴⁵Oweereddwa omukisa bwʼokkirizza nti ebintu ebyo Mukama bya kwogeddeko birituukirizibwa.”

⁴⁶Maliyamu nʼagamba nti,

⁴⁷“Emmeeme yange etendereza Mukama. Nʼomwoyo gwange gusanyukidde Katonda omulokozi wange,

⁴⁸Kubanga alabye obuwombeefu bwʼomuweereza we. Kubanga laba, okuva kaakano, abʼemirembe gyonna banaampitanga eyaweebwa omukisa.

⁴⁹Kubanga Owaamaanyi ankoledde ebikulu; Nʼerinnya lye ttukuvu.

⁵⁰Nʼokusaasira kwe kwa mirembe na mirembe eri abo abamutya.

⁵¹Akoze ebyʼamaanyi nʼomukono gwe. Asaasaanyizza abʼemitima egyʼamalala.

⁵²Awanudde abafuzi ku ntebe zaabwe ezʼobwakabaka nʼagulumiza abawombeefu.

⁵³Abali mu kwetaaga abakkusizza ebirungi. Naye abagagga nʼabagoba nga tabawaddeeyo kantu.

⁵⁴Adduukiridde omuweereza we Isirayiri, nʼajjukira okusaasira,

⁵⁵nga bwe yayogera ne bajjajjaffe, eri Ibulayimu nʼezzadde lye emirembe gyonna.”

⁵⁶Maliyamu nʼamala ewa Erisabesi muganda we, ngʼemyezi esatu, nʼalyoka addayo ewuwe.

⁵⁷Awo ekiseera kya Erisabesi ekyʼokuzaala ne kituuka, nʼazaala omwana wabulenzi.

⁵⁸Baliraanwa ba Erisabesi nʼabʼekika kye ne bawulira nga Mukama bwʼamulaze ekisa, ne basanyukira wamu naye.

⁵⁹Awo omwana bwe yaweza ennaku omunaana, ne bajja okumukomola, bonna nga balowooza nti Ajja kutuumibwa erinnya lya kitaawe Zaakaliya.

⁶⁰Naye Erisabesi nʼabagamba nti, “Nedda, ajja kutuumibwa Yokaana.”

⁶¹Ne bamuwakanya nga bagamba nti, “Mu kika kyo kyonna tetuwulirangayo yatuumibwa linnya eryo.”

⁶²Ne babuuza kitaawe wʼomwana erinnya lyʼayagala atuumibwe.

⁶³Nʼabasaba ekyʼokuwandiikako, nʼawandiikako nti, “Erinnya lye ye Yokaana!” Bonna ne beewuunya nnyo!

⁶⁴Amangwago akamwa ka Zaakaliya ne kagguka, nʼolulimi lwe ne lusumulukuka, nʼatandika okwogera nʼokutendereza Katonda.

⁶⁵Abantu bonna abʼomu kitundu ekyo ne batya nnyo, era ebigambo ebyo ne bibuna mu nsi yonna eyʼe Buyudaaya eyʼensozi.

⁶⁶Buli eyawulira ebigambo ebyo nʼabirowoozaako nnyo mu mutima gwe, ne yeebuuza nti, “Naye omwana ono bwʼalikula aliba atya?” Kubanga awatali kubuusabuusa, omukono gwa Mukama gwali wamu naye.

⁶⁷Awo Zaakaliya kitaawe, nʼajjula Mwoyo Mutukuvu nʼawa obunnabbi nti,

⁶⁸“Atenderezebwe Mukama Katonda wa Isirayiri, kubanga akyalidde abantu be, era abanunudde.

⁶⁹Yatuyimusiriza obuyinza obwʼobulokozi, mu nnyumba yʼomuddu we Dawudi.

⁷⁰Nga bwe yasuubiriza mu bigambo bya bannabbi be abatukuvu abʼedda ennyo,

⁷¹Okulokolebwa mu balabe baffe, nʼokuva mu mukono gwʼabo bonna abatukyawa,

⁷²Okulaga bajjajjaffe ekisa, nʼajjukira nʼendagaano ye entukuvu,

⁷³ekirayiro kye yalayirira jjajjaffe Ibulayimu,

⁷⁴okukituukiriza, nʼokulokolebwa okuva mu mukono gwʼabalabe baffe awatali kutya, tulyoke tuweereze mu maaso ge,

⁷⁵mu butukuvu ne mu butuukirivu ennaku zonna ezʼobulamu bwaffe.”

⁷⁵

⁷⁶“Naawe, mwana wange, oliyitibwa nnabbi wʼOyo Ali Waggulu Ennyo; kubanga gwʼolikulembera Mukama okumuteekerateekera amakubo ge.

⁷⁷Okumanyisa abantu be obulokozi, obwʼokusonyiyibwa ebibi byabwe.

⁷⁸Byonna birituukirira olwʼekisa kya Katonda waffe ekingi. Emmambya esala eritukyalira okuva mu ggulu,

⁷⁹okwakira abo abatudde mu kizikiza ne mu kisiikirize ekyʼokufa, okuluŋŋamya ebigere byaffe mu kkubo eryʼemirembe.”

⁸⁰Omwana nʼakula nʼayongerwako amaanyi mu mwoyo, nʼabeera mu malungu okutuusa ku lunaku lwe yayolesebwa eri Isirayiri.