Lukka 10:1-42 LGCB2014 - Bible AI

¹Awo oluvannyuma lwʼebyo Yesu nʼalonda abayigirizwa abalala nsanvu mu babiri[6], nʼabatuma babiri babiri bamukulembere bagende mu buli kibuga ekinene, na buli kifo mwe yali anaatera okutuuka.

²Nʼabagamba nti, “Ebyʼokukungula bingi, naye abakozi be batono. Noolwekyo musabe Mukama wʼamakungula, atume abakozi mu nnimiro ye.

³Kale, mugende. Kyokka mbatuma ngʼabaana bʼendiga mu misege.

⁴Temugenda na nsimbi era temutwala nsawo ya kusabiriza wadde omugogo gwʼengatto, ate temubaako gwe mulamusa mu kkubo.

⁵“Buli nnyumba gye muyingirangamu musookanga kugamba nti, ‘Emirembe gibeere mu nnyumba eno.’

⁶Ennyumba eyo bwʼeneebangamu omuntu owʼemirembe, emirembe ginaabeeranga ku ye, bwe kitaabenga bwe kityo, emirembe gyammwe ginaabaddiranga.

⁷Mu nnyumba omwo, mwe musookedde, munaalyanga era ne munywa nabo, kubanga omukozi asaanira empeera ye. Temuvanga mu nnyumba emu ne mudda mu ndala.

⁸Buli kibuga kye mutuukangamu ne babaaniriza, mulyenga ebyo bye babawadde okulya.

⁹Muwonyenga abalwadde abalimu, era mugambenga abantu abo nti, ‘Obwakabaka bwa Katonda bubasemberedde.’

¹⁰Naye bwe muyingiranga mu kibuga kyonna ne batabaaniriza, mulaganga mu nguudo zaakyo ne mugamba nti,

¹¹‘Nʼenfuufu ekwatidde ku bigere byaffe tugibakunkumulira. Naye mumanye kino nti Obwakabaka bwa Katonda busembedde.’

¹²Mbategeeza nti Ku lunaku luli, Sodomu kigenda kugumiikirizika okusinga ekibuga ekyo.

¹³“Zikusanze, ggwe Kolaziini! Naawe zikusanze, Besusayida! Kubanga ebyamagero ekyakolerwa mu mmwe, singa byakolerwa mu Ttuulo ne mu Sidoni, abantu baamu bandibadde beenenya dda, nga bambadde nʼebikutiya ebikadde nga batudde mu vvu okulaga nti beenenyezza.

¹⁴Naye Ttuulo ne Sidoni birisaasirwa okusinga mmwe ku lunaku olwʼokusalirako omusango.

¹⁵Ate ggwe Kaperunawumu, oligulumizibwa okutuuka mu ggulu? Nedda, ogenda kuserengesebwa wansi emagombe.

¹⁶“Buli abawuliriza mmwe aba awulirizza Nze, na buli abanyooma aba anyoomye Nze, nʼoyo anyooma Nze aba anyoomye eyantuma.”

¹⁷Awo abayigirizwa ensavu mu ababiri bwe baakomawo, nga basanyuka ne bategeeza Yesu nti, “Mukama waffe, ne baddayimooni baatugondera mu linnya lyo.”

¹⁸Yesu nʼabagamba nti, “Nalaba Setaani ngʼagwa okuva mu ggulu ngʼokumyansa kwʼeraddu!

¹⁹Laba mbawadde obuyinza okulinnya ku misota ne ku njaba ezʼobusagwa nʼokuwangula amaanyi gonna agʼomulabe. Era tewali kigenda kubakola kabi.

²⁰Naye temusanyuka nnyo kubanga baddayimooni babagondera, wabula mujaguze nti Amannya gammwe gawandiikiddwa mu ggulu.”

²¹Mu kiseera ekyo Yesu nʼajjula essanyu ku bwa Mwoyo Mutukuvu nʼagamba nti, “Nkutendereza Kitange, Mukama wʼeggulu nʼensi, kubanga wakweka ebintu bino abagezi nʼabayivu, naye nʼobibikkulira abaana abato. Weewaawo Kitange, bwʼotyo bwe wasiima.

²²Ebintu byonna Kitange yabinkwasa. Tewali amanyi Mwana wabula Kitange, era tewali amanyi Kitange wabula Omwana awamu naabo Omwana bʼalondamu okubamubikkulira.”

²³Awo nʼakyukira abayigirizwa be nʼabagamba mu kyama nti, “Mulina omukisa mmwe okulaba bino bye mulaba.

²⁴Kubanga mbagamba nti, bannabbi bangi ne bakabaka bangi abaayagala okulaba bye mulaba nʼokuwulira bye muwulira naye tekyasoboka.”

²⁵Kale laba omunnyonnyozi wʼamateeka nʼasituka, ngʼayagala okugezesa Yesu, nʼamubuuza nti, “Omuyigiriza, nsaana nkole ki okusikira obulamu obutaggwaawo?”

²⁶Yesu nʼamuddamu nti, “Kyawandiikibwa kitya mu mateeka? Gagamba gatya?”

²⁷ⓙ Omunnyonnyozi wʼamateeka nʼaddamu nti, “ ‘Yagalanga Mukama Katonda wo nʼomutima gwo gwonna, nʼemmeeme yo yonna, nʼamaanyi go gonna, nʼamagezi go gonna.’ Era ‘yagalanga muliraanwa wo nga naawe bwe weeyagala.’ⓚ ”

²⁸Yesu nʼamugamba nti, “Ozzeemu bulungi. Kale kolanga bwʼotyo oliba mulamu.”

²⁹Naye omunnyonnyozi wʼamateeka okwagala okulaga nga bwʼali omutuufu nʼagamba Yesu nti, “Muliraanwa wange ye ani?”

³⁰Yesu nʼamuddamu nti, “Waaliwo omuntu eyali ava e Yerusaalemi ngʼaserengeta e Yeriko, nʼagwa mu banyazi, ne bamukwata ne bamwambulamu engoye ze ne bazimutwalako, ne bamukuba nnyo, ne bamuleka awo ku kkubo ngʼabulako katono okufa.

³¹Awo kabona eyali tategedde nʼajjira mu kkubo eryo, naye bwe yatuuka ku musajja ngʼagudde awo ku kkubo nʼamwebalama bwebalami nʼamuyitako.

³²Omuleevi naye yamutuukako nʼamulaba, nʼadda ku ludda olulala olwʼoluguudo, nʼamuyitako buyisi

³³Naye Omusamaliya bwe yali ngʼali ku lugendo lwe mu kkubo eryo, nʼatuuka omusajja we yali; bwe yamulaba nʼamukwatirwa ekisa,

³⁴nʼajja wʼali, nʼamunyiga ebiwundu ngʼayiwako amafuta, ne wayini ebiwundu nʼabisibako ebiwero. Awo nʼateeka omusajja ku nsolo ye nʼamutwala mu nnyumba esulwamu abatambuze, nʼamujjanjaba.

³⁵Enkeera Omusamaliya nʼaddira ddinaali bbiri nʼaziwa nannyini nnyumba. Nʼamugamba nti, ‘Nkusaba omujjanjabe, era ensimbi ezizo zonna zʼolikozesa nga zino ze nkulekedde ziweddewo, ndizikuddizaawo nga nkomyewo.’ ”

³⁶“Kale olowooza, ku bantu abo abasatu aluwa eyali muliraanwa wʼomusajja oli eyagwa mu banyazi?”

³⁷Omunnyonnyozi wʼamateeka nʼaddamu nti, “Oyo eyamukolera ebyekisa.” Yesu nʼamugamba nti, “Naawe genda okole bwʼotyo.”

³⁸Awo Yesu nʼabayigirizwa be nga bali ku lugendo lwabwe, ne batuuka mu kabuga akamu, omukazi erinnya lye Maliza nʼasembeza Yesu mu maka ge.

³⁹Yalina muganda we erinnya lye Maliyamu. Nʼatuula awo wansi ku bigere bya Yesu, ngʼawuliriza ebigambo Yesu bye yali ayogera.

⁴⁰Naye Maliza yali yeetawula mu mirimu ngʼategekera abagenyi, nʼajja awali Yesu nʼamugamba nti, “Mukama wange, tofaayo ngʼolaba muganda wange andekedde emirimu nzekka?”

⁴¹Naye Mukama waffe nʼamuddamu nti, “Maliza, Maliza, ebintu ebikutawaanya bingi,

⁴²naye waliwo ekintu kimu kyokka ekyetaagibwa, Maliyamu alonze omugabo omulungi ogutagenda kumuggyibwako.”