Lukka 12:1-59 LGCB2014 - Bible AI

¹Mu kiseera ekyo ekibiina kyʼabantu bangi nnyo, ne bakuŋŋaana nʼokulinnyaganako ne balinnyaganako. Awo Yesu nʼakyukira abayigirizwa be, nʼabalabula ngʼagamba nti, “Mwekuume ekizimbulukusa bwe bannanfuusi bwʼAbafalisaayo.

²Tewali ekyabikkibwa ekitalibikkulwa, newaakubadde ekyakwekebwa ekitalizuulibwa.

³Noolwekyo bye mwogeredde mu kizikiza biriwulirwa mu musana, nʼebyo bye mwogedde mu kaama, nga muli mu kisenge nʼenzigi nga nzigale, bigenda kulangirirwa ku busolya bwʼennyumba.

⁴“Kaakano mikwano gyange, temubatyanga abo abatta omubiri, naye ne batabaako kirala kye bayinza kukola.

⁵Naye nzija kubalaga gwe musaanidde okutya. Mutyenga oyo alina obuyinza okutta ate nʼokusuula mu ggeyeena. Weewaawo mbagamba nti Oyo gwe musaanye okutyanga.

⁶Enkazaluggya ettaano tezigula sente amakumi abiri gokka? Naye Katonda tazeerabira wadde emu bwʼeti.

⁷Era amanyi enviiri eziri ku mutwe gwo nga bwe zenkana obungi. Temutya kubanga mmwe muli ba muwendo nnyo okusinga enkazaluggya ennyingi.

⁸“Era mbategeeza nti Buli anjatula mu maaso gʼabantu, nʼOmwana wʼOmuntu, alimwatula mu maaso ga bamalayika ba Katonda.

⁹Naye oyo anneegaanira mu maaso gʼabantu, nʼOmwana wʼOmuntu alimwegaanira mu maaso ga bamalayika ba Katonda.

¹⁰Na buli muntu alyogera ekigambo ku Mwana wʼOmuntu alisonyiyibwa, naye oyo alivvoola Mwoyo Mutukuvu tagenda kusonyiyibwa.

¹¹“Bwe banaabatwalanga mu makuŋŋaaniro, ne mu maaso gʼabafuzi ne mu bʼobuyinza temweraliikiriranga kye mulyogera mu kuwoza,

¹²kubanga Mwoyo Mutukuvu agenda kubawa ekyʼokwogera mu kiseera ekyo kyennyini.”

¹³Awo omuntu omu mu kibiina nʼavaayo nʼagamba Yesu nti, “Omuyigiriza, gamba muganda wange angabanyize ku byʼobusika bwaffe.”

¹⁴Naye Yesu nʼamuddamu nti, “Owange, ani eyanfuula omulamuzi wammwe oba owʼokubamaliranga empaka zammwe?”

¹⁵Nʼabagamba nti, “Mwekuume! Temululunkananga. Kubanga obulamu bwʼomuntu tebugererwa ku bugagga bwʼabeera nabwo.”

¹⁶Awo nʼabagerera olugero luno nti, “Waaliwo omusajja omugagga eyalina ennimiro nʼabaza ebibala bingi.

¹⁷Nʼalowooza munda mu ye ngʼagamba nti, ‘Nnaakola ntya? Kubanga sirina we nnaakuŋŋaanyiza bibala byange?’

¹⁸“Kwe kugamba nti, ‘Ntegedde kye nnaakola, nzija kumenyawo amawanika gange gano, nzimbewo agasingako obunene! Omwo mwe nnaakuŋŋaanyiza ebibala byange byonna nʼebintu byange.

¹⁹Era nzija kugamba emmeeme yange nti, “Emmeeme, weeterekedde bingi mu mawanika go okukuyisa mu myaka mingi egijja. Wummula, olye, onywe era weesanyuse!” ’

²⁰“Naye Katonda nʼamugamba nti, ‘Musirusiru ggwe! Ekiro kino emmeeme yo eneekuggibwako. Kale ebyo bye weetegekedde binaaba byʼani?’

²¹“Bwe kityo bwe kiriba eri buli muntu eyeeterekera, so nga mwavu eri Katonda.”

²²Awo Yesu nʼagamba abayigirizwa be nti, “Noolwekyo temweraliikiriranga lwa bulamu bwammwe oba mmere gye munaalya oba engoye ezʼokwambala.

²³Kubanga omwoyo gusinga wala emmere nʼomubiri gusinga ebyokwambala.

²⁴Mulowooze ku namuŋŋoona, tezisiga so tezikungula, era tezirina na mawanika mwe zitereka mmere yaazo, naye Katonda aziriisa. Naye mmwe muli ba muwendo nnyo okukira ennyonyi ezo!

²⁵Ani ku mmwe bwe yeeraliikirira ayinza okwongera ku myaka gye akatundu nʼakamu?

²⁶Obanga temusobola kukola kantu katono ngʼako, kale kikugasa ki okweraliikirira ebintu ebirala?

²⁷“Mutunuulire amalanga bwe gakula! Tegategana wadde okulanga ewuzi zʼengoye, naye mbategeeza nti Ne Sulemaani mu kitiibwa kye kyonna teyagenkana mu kwambala.

²⁸Kale, obanga Katonda ayambaza bwʼatyo omuddo ogwʼomu nsiko, omuddo obuddo ogubaawo leero ate enkeera ne gwokebwa mu kyoto, naye ate talisingawo nnyo okwambaza mmwe abʼokukkiriza okutono!

²⁹Temunoonyanga kye munaalya oba kye munaanywa, era temweraliikiriranga nʼakatono.

³⁰Kubanga ebintu ebyo byonna amawanga ge biyaayaanira, naye Kitammwe amanyi nga mubyetaaga.

³¹Naye munoonye obwakabaka bwe, nʼebintu ebyo mulibyongerwako.

³²“Temutya, mmwe ekisibo ekitono, kubanga Kitammwe asiimye okubawa obwakabaka.

³³Mutunde ebintu byammwe, ensimbi ze muggyamu muzigabire abo abeetaaga, mwetungire ensawo ezitakaddiwa era mweterekere mu ggulu mu tterekero eritaggwaamu bintu, omubbi gyʼatasembera wadde ennyenje gye zitayonoonera.

³⁴Kubanga obugagga bwammwe gye buli, nʼomutima gwammwe gye gunaabeeranga.

³⁵“Mube beetegefu olwʼobuweereza, era mukuume ettabaaza zammwe nga zaaka.

³⁶Mube ngʼabasajja abalindirira mukama waabwe; bwʼakomawo okuva mu mbaga yʼobugole, nʼakonkona banguwa okumuggulirawo oluggi.

³⁷Balina omukisa abaddu abo, mukama waabwe baalisanga nga batunula. Ddala ddala mbagamba nti, agenda kwambala atuuze abaddu abo ku mmeeza abagabule.

³⁸Balina omukisa abo, bwʼalijja mu kisisimuka ekyokusatu, baalisanga nga batunula.

³⁹“Naye mutegeere kino: Singa nnyini nnyumba amanya essaawa omubbi wʼanaayingirira okumenya ennyumba ye, omubbi teyandisobodde kugimenya, kubanga yandimusanze yeeteeseteese.

⁴⁰Noolwekyo mubeere beetegefu. Kubanga Omwana wʼOmuntu, ajjira mu kiseera kye mutamulowoolezaamu.”

⁴¹Awo Peetero nʼamubuuza nti, “Mukama waffe, olugero luno olugeredde ffe, oba bonna?”

⁴²Mukama waffe nʼaddamu nti, “Omuweereza oyo omwesigwa era owʼamagezi ye aluwa mukama we gwʼalikwasa obuvunaanyizibwa obwʼokulabirira abaweereza be nʼokugaba emmere mu kiseera ekituufu?

⁴³Aweereddwa omukisa mukama we bwʼalikomawo gwʼalisanga ngʼatuukiriza bulungi emirimu gye.

⁴⁴Ddala ddala mbagamba nti mukama we alimukwasa okulabirira ebintu bye byonna.

⁴⁵Naye singa omuddu oyo alowooza mu mutima gwe nti, ‘Mukama wange ajja kulwawo okudda,’ nʼadda ku baweereza banne, abasajja nʼabakuba, nʼebiseera bye nʼabimala mu kulya ne mu kunywa ne mu kutamiira,

⁴⁶mukama we agenda kudda mu kiseera wʼatamusuubirira, amutemeeteme, era amusuule eyo abatakkiriza gye bali.

⁴⁷“Omuweereza oyo eyamanya mukama we byʼayagala akole, kyokka ye nʼatabikola agenda kuweebwa ekibonerezo kinene.

⁴⁸Naye ataamanya nʼakola ebisaanidde okumukubya alikubwa kitono. Oyo aweebwa ebingi alisuubirwamu bingi, nʼoyo gwe basigira ebingi, alivunaanyizibwa bingi okusingawo.

⁴⁹“Najja kuleeta muliro ku nsi, era kyandibadde kirungi singa gukoledde!

⁵⁰Nninayo okubatizibwa kwe ndibatizibwa, naye nzija kuba mu nnaku nnyingi nga tekunnaba kutuukirizibwa!

⁵¹Mulowooza nti Najja kuleeta mirembe ku nsi? Mbategeeza nti sajja kuleeta mirembe wabula okwawukana.

⁵²Okuva kaakano amaka gajjanga kwawukanamu, agʼabantu abataano, abasatu ku bo nga bawakanya ababiri, nʼababiri nga bawakanya abasatu.

⁵³Kitaawe wʼomwana alyawukana ne mutabani we, nʼomwana nʼayawukana ne kitaawe, ne nnyina wʼomwana alyawukana ne muwala we nʼomuwala nʼayawukana ne nnyina, ne nnyazaala balyawukana ne muka mwana we ne muka mwana nʼayawukana ne nnyazaala we.”

⁵⁴Awo Yesu nʼakyukira ekibiina nʼabagamba nti, “Bwe mulaba ebire nga byekuluumulula ebugwanjuba, amangwago mugamba nti, ‘Enkuba egenda kutonnya,’ era nʼetonnya.

⁵⁵Ate empewo bwʼekunta ngʼeva ku bukiikaddyo, mugamba nti, ‘Leero akasana kajja kwaka nnyo,’ era bwe kiba.

⁵⁶Bannanfuusi mmwe! Musobola bulungi okunnyonnyola obubonero obuli ku nsi ne mu bbanga, muyinza mutya obutamanya obubonero obwʼomu kiseera kino?

⁵⁷“Lwaki temwesalirawo ekyo kye mulaba nga kituufu?

⁵⁸Bwʼobanga ogenda nʼakuwawaabira mu mbuga zʼamateeka, gezaako okumusaba ensonga zammwe muzimalire mu kkubo nga tezinnatuuka wa mulamuzi, talwa kukutwala wa mulamuzi, nʼomulamuzi nʼakuwaayo eri omuserikale, nʼomuserikale nʼakusibira mu kkomera.

⁵⁹Kubanga nkutegeeza nti Togenda kuvaayo okutuusa nga ne sente esembayo omaze okugisasula.”