Lukka 13:1-35 LGCB2014 - Bible AI

¹Mu kiseera ekyo ne wabaawo abategeeza Yesu nga Piraato bwe yatta Abagaliraaya, omusaayi gwabwe nʼagutabula mu biweebwayo byabwe.

²Yesu nʼabagamba nti, “Mulowooza nti Abagaliraaya abo baali boonoonyi nnyo okusinga Abagaliraaya abalala bonna, balyoke baboneebone batyo?

³Nedda! Mbagamba nti bwe muteenenya nammwe mugenda kuzikirira ngʼabo bwe baazikirira.

⁴Ate bali ekkumi nʼomunaana omunaala gwa Sirowamu be gwagwako, ne gubatta, mulowooza be baali basinga obwonoonyi okusinga abantu abaabeeranga mu Yerusaalemi bonna?

⁵Nedda! Mbagamba nti bwe muteenenya nammwe bwe mugenda okuzikirira bwe mutyo.”

⁶Awo Yesu nʼabagerera olugero luno nti, “Waaliwo omusajja eyasimba omutiini mu nnimiro ye. Nʼagendangayo okugulambula okulaba obanga gubazeeko ebibala, nʼasanga nga tegubazeeko kibala na kimu.

⁷Kyeyava alagira omusajja we amulimira ennimiro eyo nti, ‘Omuti guno gutemewo. Kubanga gino emyaka esatu nga nambula omuti guno, naye tegubalangako kibala na kimu. Gwemalira bwereere ettaka lyaffe.’

⁸Omulimi we nʼaddamu nti, ‘Mukama wange, tuguleke tetugutemawo. Ka tuguweeyo omwaka gumu, nzija kugutemeratemera era nguteekeko nʼebigimusa.

⁹Bwe gulibala ebibala gye bujja, kiriba kirungi! Naye bwe gutalibala, olwo Noolyoka ogutemawo.’ ”

¹⁰Awo ku lunaku lwa Ssabbiiti Yesu yali ngʼayigiriza mu kkuŋŋaaniro,

¹¹ne wabaawo omukazi eyaliko omuzimu ogwamulwaza okumala emyaka kkumi na munaana, nga yeewese emirundi ebiri era nga tasobola kwegolola.

¹²Yesu nʼamulaba, nʼamuyita nʼamugamba nti, “Mukazi wattu, owonyezeddwa obulwadde bwo.”

¹³Nʼamukwatako. Amangwago omukazi ne yeegolola nʼayimirira bulungi, nʼatendereza Katonda!

¹⁴Naye omukulembeze wʼekkuŋŋaaniro eryo nʼanyiiga nnyo, kubanga Yesu yawonya ku lunaku lwa Ssabbiiti. Nʼagamba ekibiina nti, “Mu wiiki mulimu ennaku mukaaga, muyinza okujjanga mu nnaku ezo ne muwonyezebwa, naye so si ku Ssabbiiti!”

¹⁵Mukama waffe nʼamuddamu nti, “Bannanfuusi mmwe! Buli omu ku mmwe tasumulula nte ye oba ndogoyi ye ku Ssabbiiti nʼagitwala okunywa amazzi?

¹⁶Naye si kituufu omukazi ono, muwala wa Ibulayimu, okusumululwa ku Ssabbiiti mu busibe bwa Setaani bwʼamazeemu emyaka ekkumi nʼomunaana?”

¹⁷Bwe yayogera bwʼatyo abaali bamuwakanya bonna ne baswala, naye ekibiina kyʼabantu bonna ne bajjula essanyu olwʼebintu ebyʼekitalo bye yakola.

¹⁸Awo Yesu kyeyava abayigiriza ngʼagamba nti, “Obwakabaka bwa Katonda bufaanana na ki? Mbugeraageranye na ki?

¹⁹Bufaanana na kaweke ka kaladaali omusajja ke yasiga mu nnimiro ye. Kaamera ne kavaamu omuti, nʼennyonyi ezʼomu bbanga ne zituula ku matabi gaagwo.”

²⁰Ate era nʼagamba nti, “Obwakabaka bwa Katonda mbugeraageranye na ki?

²¹Buliŋŋanga ekizimbulukusa omukazi kye yatabulira mu bipimo byʼobuwunga bisatu okutuusa obuwunga bwonna lwe bwazimbulukuka.”

²²Awo Yesu nʼayita mu bibuga ne mu bubuga; yagendanga ayigiriza ngʼali ku lugendo lwe ngʼagenda e Yerusaalemi.

²³Ne wabaawo eyeewuunya nti, “Mukama waffe, abantu abalirokolebwa nga baliba batono?”

²³Yesu nʼaddamu nti,

²⁴“Mufube okuyingira mu mulyango omufunda kubanga mbagamba nti, bangi balyagala okuyingira naye tebalisobola.

²⁵Nannyinimu bwʼalisituka nʼaggalawo oluggi, mugenda kubeera bweru nga mukonkona nga bwe mwegayirira nti, ‘Mukama waffe, tuggulirewo.’ Agenda kubaanukula nti, ‘Sibamanyi, ne gye muva simanyiiyo.’

²⁶Nammwe muliddamu nti, ‘Twalyanga naawe era twanywanga ffenna, era wayigirizanga mu nguudo zʼewaffe.’

²⁷Naye alibaddamu nti, ‘Sibamanyi, ne gye muva simanyiiyo. Munviire mwenna abakozi bʼebitali bya bituukirivu.’

²⁸Era walibaawo okukuba ebiwoobe nʼokuluma obujiji bwe muliraba Ibulayimu, ne Isaaka, ne Yakobo ne bannabbi bonna nga bali mu bwakabaka bwa Katonda, naye nga mmwe musuulibbwa ebweru.

²⁹Kubanga abantu baliva ebuvanjuba nʼebugwanjuba, ne bava ne mu bukiikakkono ne mu bukiikaddyo, ne batuula ku mmeeza mu bwakabaka bwa Katonda.

³⁰Era laba, abooluvannyuma baliba aboolubereberye, nʼaboolubereberye baliba abooluvannyuma.”

³¹Mu kiseera ekyo ne wabaawo abamu ku Bafalisaayo abajja eri Yesu ne bamugamba nti, “Tambula ove wano, kubanga Kerode ayagala kukutta.”

³²Yesu nʼabaddamu nti, “Mugende mugambe ekibe ekyo nti laba ngoba baddayimooni, nʼokuwonya abalwadde, leero, nʼenkya, era ku lunaku olwokusatu ndimaliriza.

³³Naye leero, nʼenkya, ne luli nsaana mbeere ku lugendo lwange nga ntambula, kubanga tekisoboka nnabbi okufiira ebweru wa Yerusaalemi!

³⁴“Ggwe Yerusaalemi, Ggwe Yerusaalemi! Gwe atta bannabbi. Akuba amayinja abo ababa batumiddwa gyʼali, emirundi nga mingi nnyo gye njagadde okukuŋŋaanya abaana bo ngʼenkoko bwʼekuŋŋaanya obwana bwayo nʼebukuumira mu biwaawaatiro byayo, naye ne mutayagala kukkiriza!

³⁵ⓛ Kale laba ennyumba yammwe erekeddwa awo. Era mbagamba nti temugenda kuddayo kundaba okutuusa ekiseera lwe kirituuka ne mugamba nti, ‘Aweereddwa omukisa oyo ajja mu linnya lya Mukama.’ ”