Lukka 14:1-35 LGCB2014 - Bible AI

¹Awo olwatuuka ku lunaku lwa Ssabbiiti, Yesu bwe yali ngʼagenze okulya mu nnyumba eyʼomu ku bakulembeze bʼAbafalisaayo, abantu bonna abaaliwo ne bamwekaliriza amaaso.

²Waaliwo omusajja omulwadde wʼentumbi ngʼatudde okwolekera Yesu we yali.

³Awo Yesu nʼabuuza Abafalisaayo nʼabannyonnyozi bʼamateeka nti, “Kikkirizibwa okuwonya ku lunaku lwa Ssabbiiti, oba nedda?”

⁴Yesu yalaba tebazzeemu, kwe kukwata omusajja omulwadde ku mukono, nʼamuwonya, nʼamugamba yeetambulire.

⁵Nʼalyoka abakyukira nʼababuuza nti, “Ani ku mmwe singa omwana we agwa mu kinnya oba ente ye nʼegwa mu kinnya ku lunaku lwa Ssabbiiti, atamuggyayo oba atagiggyaayo mangwago?”

⁶Era ne batamuddamu.

⁷Awo Yesu bwe yalaba abagenyi abaayitibwa nʼabagerera olugero ngʼagamba nti,

⁸“Bwe bakuyitanga ku mbaga eyʼobugole, teweetuuzanga mu kifo ekisinga okuba ekyʼekitiibwa kubanga singa ejjayo omugenyi akusinga ekitiibwa,

⁹eyakuyise ku mbaga ajja kumuleeta awo wʼotudde akugambe nti, ‘Viira ono atuule awo wʼotudde.’ Noolyoka ositukawo ngʼoswadde ogende onoonye ekifo ekirala emabega.

¹⁰“Naye bwe bakuyitanga, otuulanga mu kifo ekyʼemabega, kale nno eyakuyise bwʼajja alyoke akugambe nti, ‘Mukwano gwange, jjangu nkutwale mu kifo ekyʼomu maaso.’ Noolyoka osituka nga ne bagenyi banno bakuwa ekitiibwa.

¹¹Kubanga buli muntu eyeegulumiza alitoowazibwa; nʼoyo eyeetoowaza aligulumizibwa.”

¹²Awo Yesu nʼakyukira eyamuyita nʼamugamba nti, “Bwʼotegekanga ekyemisana oba ekyeggulo, toyitanga mikwano gyo, wadde baganda bo, wadde abʼolulyo lwo, wadde baliraanwa bo abagagga; kubanga bwʼokola otyo nabo bayinza okukuyita olulala ne baba ngʼabakusasula.

¹³Naye bwʼofumbanga ekijjulo, oyitanga abaavu, nʼabagongobavu, nʼabalema ne bamuzibe.

¹⁴Oliweebwa omukisa kubanga bo tebalina kya kukusasula. Olisasulibwa mu kuzuukira kwʼAbatuukirivu.”

¹⁵Omu ku bagenyi abaali batudde ku mmeeza bwe yawulira ebigambo ebyo nʼagamba Yesu nti, “Alina omukisa oyo alirya embaga mu bwakabaka bwa Katonda.”

¹⁶Yesu nʼamuddamu nti, “Waaliwo omusajja eyateekateeka okufumba embaga ennene, nʼayita abantu bangi.

¹⁷Bwe yamala okutegeka, nʼatuma omuddu we agende ategeeze abaayitibwa nti, ‘Mujje byonna biwedde okutegeka.’

¹⁸“Naye bonna ne batandika okwewolereza; eyasooka nʼagamba nti, ‘Nnaakagula ennimiro noolwekyo njagala kugenda kugirambula. Nkusaba onsonyiwe, nneme kujja.’

¹⁹“Omulala nʼagamba nti, ‘Nnakagula emigogo gyʼente ezirima etaano njagala kuzigezaamu. Nkusaba onsonyiwe nneme kujja.’

²⁰“Omulala nʼagamba nti ‘Nnawasizza omukazi noolwekyo sisobola kujja.’

²¹“Omuddu nʼakomawo nʼategeeza mukama we ngʼabagenyi be yayita bwe bagambye. Mukama we nʼanyiiga, nʼamulagira agende mangu mu nguudo ezʼomu kibuga ne mu bikubo, ayite abaavu nʼabagongobavu, nʼabalema, ne bamuzibe.

²²“Omuddu nʼagamba mukama we nti, ‘Bonna mbayise nga bwʼondagidde, naye era mu kisenge kyʼembaga mukyalimu ebifo.’

²³“Nʼagamba omuddu we nti, ‘Genda mu nguudo ezʼomu byalo ne mu bukubo obutono okubirize bʼonoosangayo bajje, ennyumba yange ejjule.

²⁴Era mbategeeza nti Tewali nʼomu ku abo be nayita alirya ku mbaga yange.’ ”

²⁵Awo ebibiina byʼabantu bangi nnyo bwe baali bagoberera Yesu, nʼakyuka nʼabagamba nti,

²⁶“Omuntu bwʼanajjanga gye ndi, nʼatakyawa kitaawe, oba nnyina, oba mukyala we nʼabaana be, oba baganda be oba bannyina, newaakubadde obulamu bwe ye yennyini, tayinzenga kuba muyigirizwa wange.

²⁷Era oyo ateetikka musaalaba gwe nʼangoberera, tayinza kuba muyigirizwa wange.

²⁸“Singa omu ku mmwe ayagala okuzimba omulungooti, tamala kutuula nʼabalirira omuwendo omulimu ogwo gwe gunaatwala, nʼalaba obanga ensimbi ezeetaagibwa azirina okugumaliriza?

²⁹Kubanga singa tagumaliriza nʼakoma ku musingi gwokka, buli agulaba atandika okumusekerera,

³⁰nga bwʼagamba nti, ‘Omuntu ono yatandika okuzimba naye nʼalemwa okumaliriza!’

³¹“Oba kabaka ki agenda okulwana ne kabaka omulala amulumba, tamala kutuula nʼabalirira obanga nʼabaserikale omutwalo ogumu bʼalina, asobola okulwanyisa kabaka omulala ajja okumulumba nʼabaserikale emitwalo ebiri?

³²Bwʼafumiitiriza nʼalaba nga tajja kusobola, atumira kabaka oli omubaka, ngʼakyaliko wala, okuteesa emirembe.

³³Kale, buli muntu ku mmwe ateefiiriza byonna byʼalina, tayinza kuba muyigirizwa wange.

³⁴“Omunnyo mulungi, naye singa guggwaamu ensa, guzibwamu gutya obuka bwagwo?

³⁵Guba tegukyalina mugaso nʼakamu mu ttaka wadde ne mu bigimusa, noolwekyo gusuulibwa bweru. Alina amatu agawulira awulire.”