Lukka 16:1-31 LGCB2014 - Bible AI

¹Awo Yesu nʼagamba abayigirizwa be nti, “Waaliwo omusajja omugagga ngʼalina omuwanika we amulabiririra ebintu bye. Ne wabaawo abaamuloopera nti Omuwanika oyo yali asaasaanya ebintu bye, ngʼabidiibuuda.

²Mukama we nʼamuyita nʼamubuuza nti, ‘Biki ebyo bye nkuwulirako? Kale genda otegeke lipoota yʼebintu byange nga bwe biri ogindeetere. Omulimu gukufudde.’

³“Omuwanika nʼalowooza mu mutima gwe, nga yeebuuza nti, ‘Kale kaakano nkole ntya? Mukama wange wuuno angoba ku mulimu. Sirina maanyi galima, nʼokusabiriza kunkwasa ensonyi.

⁴Ekinaasobozesa abantu okunsembeza mu maka gaabwe, nga bwe ngobeddwa ku mulimu, nkifunye.’

⁵“Nʼagenda ngʼayita buli eyalina ebbanja ku mukama we. Gwe yasookerako nʼamubuuza nti, ‘Ebbanja mukama wange lyʼakubanja lyenkana wa obunene?’ ”

⁶“Omusajja nʼaddamu nti, ‘Ammanja endebe zʼomuzigo kikumi mu ataano.’ Omuwanika nʼamugamba nti, ‘Kwako empapula zo kwʼobanjirwa ogende owandiike endebe amakumi ataano.’

⁷“Omuwanika nʼadda ku wookubiri nʼamubuuza nti, ‘Ggwe obanjibwa ki?’ “Nʼaddamu nti, ‘Ebigera byʼobuwunga bwʼeŋŋaano kikumi.’ ” “Omuwanika nʼamugamba nti, ‘Kwako empapula zo kwʼobanjirwa, owandiike endala osseeko ebigera kinaana.’

⁸“Mukama we nʼatenda nnyo omuwanika we atali mwesigwa olwʼobukalabakalaba bwe. Kubanga abaana bʼomulembe guno bagezigezi okusinga abaana bʼomusana abʼomu mulembe gwabwe.”

⁹“Era mbategeeza nti mwefunire emikwano mu bugagga obutali butuukirivu, bwe buliggwaawo balyoke babasembeze mu weema ezitaggwaawo.

¹⁰Omuntu omwesigwa mu kintu ekitono, abeera mwesigwa ne mu kinene; nʼoyo ataba mwesigwa mu kitono era ne mu kinene taba mwesigwa.

¹¹Kale obanga temwesigibwa mu bugagga obutali butuukirivu, ani agenda okubeesiga mu bugagga obwʼamazima?

¹²Obanga toli mwesigwa ku byʼomulala, kale ani alikwesiga nʼakukwasa ebibyo?

¹³“Tewali muddu ayinza kuweereza bakulu babiri. Kubanga alikyawako omu nʼayagala omulala, oba aliwulirako omu nʼanyooma omulala. Toyinza kuweereza Katonda na mamona.”

¹⁴Awo Abafalisaayo, abaali abaluvu bʼensimbi, bwe baawulira ebigambo ebyo ne banyooma Yesu.

¹⁵Nʼabagamba nti, “Mmwe mweraga mu bantu, naye Katonda amanyi emitima gyammwe. Okwerimbalimba kwammwe kubaweesa ekitiibwa mu maaso gʼabantu, naye nga kya muzizo eri Katonda.

¹⁶“Yokaana Omubatiza bwe yali nga tannabuulira, amateeka nʼobubaka bwa bannabbi byabuulirwa. Naye okuva olwo obwakabaka bwa Katonda bubuulirwa, ne buli muntu ayitibwa abuyingiremu mu bwangu ddala.

¹⁷Naye kyangu eggulu nʼensi okuggwaawo okusinga nʼakatundu kʼennukuta emu eyʼamateeka okuggwaawo.

¹⁸“Omusajja yenna agoba mukazi we nʼawasa omulala aba ayenze; nʼoyo awasa omukazi agobeddwa, naye aba ayenze.”

¹⁹Awo Yesu nʼabagamba nti, “Waaliwo omusajja omugagga ennyo, eyayambalanga engoye ezʼeffulungu ne linena era bulijjo ngʼabeera mu masanyu era ngʼalya ebyassava.

²⁰Waaliwo nʼomusajja omwavu erinnya lye nga ye Laazaalo nga mulwadde ngʼajjudde amabwa ku mubiri gwe, eyateekebwanga ku mulyango gwʼomusajja omugagga.

²¹Laazaalo ne yeegombanga okulya obukunkumuka obwagwanga wansi nga buva ku mmeeza ya nnaggagga. Nʼembwa zajjanga ne zikomberera amabwa ga Laazaalo.

²²“Ekiseera kyatuuka omusajja omwavu nʼafa, bamalayika ne bamutwala mu kifuba kya Ibulayimu. Oluvannyuma nʼomugagga naye nʼafa, nʼaziikibwa.

²³Naye ngʼali eyo mu magombe mu kubonaabona, nʼatunula waggulu nʼalaba Laazaalo ngʼali mu kifuba kya Ibulayimu.

²⁴Nʼakoowoola nti, ‘Kitange Ibulayimu, nsaasira, ontumire Laazaalo oyo annyike olugalo Lwe mu mazzi, nkombeko, naye olulimi lumbabuukirira nnyo mu muliro guno ogumbonyaabonya!’

²⁵“Naye Ibulayimu nʼamuddamu nti, ‘Mwana wange, jjukira nga mu biseera byo ngʼokyali mulamu wafuna ebirungi bye weetaaganga, naye nga Laazaalo ye afuna bibi. Kaakano Laazaalo asanyusibwa naye gwe oli mu kubonaabona.

²⁶Ate nʼekirala, wakati waffe nammwe waliwo olukonko luwanvu nnyo olutwawula, omuntu ali eno bwʼayagala okujja eyo akoma awo ku mugo gwalwo, nʼoyo ali eyo ayagala okujja eno tasobola.’

²⁷“Awo nnaggagga nʼayaziirana nti, ‘Ayi kitange Ibulayimu, nkwegayiridde ntumira Laazaalo oyo mu maka ga kitange,

²⁸kubanga nninayo abooluganda bataano, abandabulire, bwe balifa baleme kujja mu kifo kino ekirimu okubonaabona okwenkanidde wano.’

²⁹Naye Ibulayimu nʼamugamba nti, ‘Balina Musa ne bannabbi, kale bawulire abo.’

³⁰“Omugagga nʼaddamu nti, ‘Nedda, kitange Ibulayimu, singa batumirwa omuntu ngʼava mu bafu, bajja kwenenya.’

³¹“Awo Ibulayimu nʼamugamba nti, ‘Obanga tebagondera Musa ne bannabbi, newaakubadde alizuukira okuva mu bafu talibakkirizisa.’ ”