Lukka 17:1-37 LGCB2014 - Bible AI

¹Awo Yesu nʼagamba abayigirizwa be nti, “Ebikemo ebireetera abantu okwonoona tebiyinza butajja, naye zimusanze omuntu oyo abireeta.

²Ekyandisinze kwe kusiba olubengo mu bulago bwe nʼasuulibwa mu nnyanja okusinga okwesittaza omu ku baana bano abato.

³Mwekuume.

³“Muganda wo bwʼayonoonanga, omunenyanga; era singa yeenenya omusonyiwanga.

⁴Ne bwʼakusobyanga emirundi omusanvu mu lunaku olumu, naye buli mulundi nʼajja gyʼoli nʼakwenenyeza, musonyiwenga.”

⁵Awo abatume ne bagamba Mukama waffe nti, “Twongereko okukkiriza.”

⁶Mukama waffe nʼabagamba nti, “Singa okukkiriza kwammwe kuba ngʼakaweke ka kaladaali, mwandigambye omukenene guno nti, ‘Siguka ogwe mu nnyanja,’ era ne gubagondera.

⁷“Naye ani ku mmwe, ngʼomuddu we yaakakomawo okuva okulima oba okulunda endiga, amugamba nti, ‘Jjangu mangu otuule ku mmere?’

⁸Tamugamba nti, ‘Teekateeka emmere yange, weerongoose olabike bulungi, olyoke ompeereze nga ndya era nga nnywa, bwe nnaamala naawe nʼonywa era nʼolya emmere yo?’

⁹Mulowooza nti Mukama wʼomuweereza oyo amwebaza olwʼokugondera bye yalagirwa okukola?

¹⁰Nammwe bwe mutyo bwe mumalanga okutuukiriza ebyo ebyabagambibwa okukola, mugambenga nti, ‘Ffe abaddu bo abatasaanira tukoze omulimu gwaffe ogutugwanidde.’ ”

¹¹Awo Yesu bwe yali yeeyongerayo mu lugendo lwe ngʼagenda e Yerusaalemi, nʼakwata ekkubo eriyita wakati wa Ggaliraaya ne Samaliya.

¹²Awo bwe yayingira mu kabuga akamu, abasajja kkumi nga bonna bagenge ne bajja okumusisinkana. Ne bayimirira walako

¹³ne bakoowoola mu ddoboozi eryʼomwanguka nti, “Yesu, Mukama waffe, tukwatirwe ekisa!”

¹⁴Yesu bwe yabalaba nʼabagamba nti, “Mugende mweyanjule eri bakabona.” Bwe baali nga bagenda ne bawona ne baba balongoofu.

¹⁵Omu ku bo bwe yalaba ngʼawonye nʼakomawo eri Yesu nga bwʼaleekaanira waggulu ngʼatendereza Katonda.

¹⁶Nʼagwa wansi ku bigere bya Yesu ngʼamwebaza. Omusajja oyo yali Musamaliya.

¹⁷Yesu nʼagamba nti, “Ekkumi bonna tebaawonyezebbwa? Omwenda bo baluwa?

¹⁸Tebayinzizza kudda kutendereza Katonda wabula munnaggwanga ono yekka yʼakomyewo?”

¹⁹Awo Yesu nʼamugamba nti, “Situka weetambulire, okukkiriza kwo kukuwonyezza.”

²⁰Awo Abafalisaayo ne babuuza Yesu nti, “Obwakabaka bwa Katonda bulijja ddi?” Yesu nʼabaddamu nti, “Obwakabaka bwa Katonda tebulabika nga bujja,

²¹era abantu tebagenda kugamba nti, ‘Laba buubuno wano,’ oba nti, ‘Buubuli wali,’ kubanga obwakabaka bwa Katonda buli mu mmwe.”

²²Oluvannyuma nʼagamba abayigirizwa be nti, “Ekiseera kijja lwe mulyegomba okulaba olumu, ku nnaku zʼOmwana wʼOmuntu, naye temulirulaba.

²³Balibagamba nti lwe luno era nti lwe luli temugendanga era temubagobereranga.

²⁴Kubanga ngʼeggulu bwe limyansiza ku ludda olumu olwʼeggulu ate ne limyansiza ku ludda olulala olwʼeggulu, bwʼatyo bwʼaliba Omwana wʼOmuntu ku lunaku lwe,

²⁵Naye okusooka kimugwanira okubonaabona mu bintu bingi, nʼokugaanibwa, abantu abʼomulembe guno.

²⁶“Nga bwe kyali mu biseera bya Nuuwa era bwe kityo bwe kiriba ne mu nnaku zʼOmwana wʼOmuntu.

²⁷Abantu baali balya nga banywa nga bawasa era nga bafumbirwa okutuusa ku lunaku Nuuwa lwe yayingira mu lyato. Olwo amataba ne gajja ne gasaanyaawo buli kintu.

²⁸“Era kiriba nga bwe kyali mu nnaku za Lutti. Abantu baali balya nga banywa, nga bagula era nga batunda, nga balima era nga bazimba amayumba,

²⁹okutuusa ku lunaku Lutti lwe yava mu Sodomu. Olwo omuliro nʼolunyata ne biyiika okuva mu ggulu ne bizikiriza buli kimu.

³⁰“Bwe bityo bwe biriba ku lunaku, Omwana wʼOmuntu lwʼalirabikirako.

³¹Ku lunaku olwo omuntu yenna aliba waggulu ku nju, takkanga mu nju munda kuggyamu bintu bye. Nʼabo abaliba mu nnimiro tebaddangayo eka okubaako ne bye banonayo.

³²Mujjukire mukazi wa Lutti!

³³Buli anoonya okuwonya obulamu bwe alibufiirwa, naye buli eyeefiiriza obulamu bwe alibuwonya.

³⁴Mbagamba nti Ku lunaku olwo abantu babiri baliba ku kitanda kimu, Omu alitwalibwa naye munne nʼalekebwa.

³⁵Abantu babiri baliba basa ku lubengo, omu alitwalibwa naye munne alirekebwa.

³⁶Abasajja babiri baliba mu nnimiro, omu alitwalibwa naye munne alirekebwa.”

³⁷Awo abayigirizwa be ne bamubuuza nti, “Mukama waffe, nga batwalibwa wa?” Yesu nʼabaddamu nti, “Awaba ekifudde awo empungu[8] we zirikuŋŋaanira!”