Lukka 18:1-43 LGCB2014 - Bible AI

¹Awo Yesu nʼagerera abayigirizwa be olugero ngʼagamba nga bwe bagwanidde obutakoowanga kusaba nʼobutaggwaamu mwoyo, ngʼagamba nti,

²“Waaliwo omulamuzi mu kibuga ekimu, nga tatya Katonda era nga tafa ku muntu yenna.

³Mu kibuga ekyo mwalimu nnamwandu eyajjanga ewʼomulamuzi oyo buli lunaku ngʼamwegayirira nti, ‘Nnamula nʼomulabe wange.’

⁴“Omulamuzi nʼamala ebbanga ngʼakyagaanyi. Naye oluvannyuma nʼagamba mu mutima gwe nti, ‘Newaakubadde nga sitya Katonda era nga sirina muntu gwe nzisaamu kitiibwa,

⁵naye olwokubanga nnamwandu ono aneetayiridde nnyo, nzijja kumumalira ensonga ze, kubanga ajja kunkooya olwʼokuneetayirira ngʼajja gye ndi buli lunaku!’ ”

⁶Awo Mukama waffe nʼagamba nti, “Muwulire omulamuzi atali wa mazima bwʼagamba.

⁷Kale Katonda talisingawo nnyo kulamula abantu be, be yeerondera, abamukaabirira emisana nʼekiro ate ngʼabagumiikiriza?

⁸Mbagamba nti Agenda kubalamula mangu. Naye Omwana wʼOmuntu, bwʼalijja, alisanga okukkiriza ku nsi?”

⁹Awo Yesu nʼagerera olugero luno abo abeerowooza nga batuukirivu nga banyoomoola nʼabantu abalala, nʼagamba nti,

¹⁰“Abantu babiri baayambuka mu Yeekaalu okusaba, omu yali Mufalisaayo nʼomulala nga muwooza.

¹¹Omufalisaayo nʼayimirira nʼatandika okusaba nga yeeyogerako nti, ‘Nkwebaza, Katonda, kubanga sifaanana ngʼabantu abalala: abʼomululu, abalyazaamaanyi, abenzi, oba omuwooza ono.

¹²Nsiiba emirundi ebiri mu wiiki, era mpaayo eri Katonda, ekimu ekyʼekkumi ku bintu byonna bye nfuna.’

¹³“Naye omuwooza nʼayimirira wala nʼatasobola na kuyimusa maaso ge kutunula eri eggulu ngʼasaba, wabula ne yeekuba mu kifuba ngʼasaba nti ‘Katonda, onsaasire, nze omwonoonyi.’

¹⁴“Mbagamba nti Omusajja ono, omuwooza ye yaddayo eka ngʼasonyiyiddwa ebibi bye. Kubanga buli eyeegulumiza alitoowazibwa, nʼoyo eyeetoowaza aligulumizibwa.”

¹⁵Lumu ne wabaawo abaaleetera Yesu abaana baabwe abato abakwateko abawe omukisa. Naye abayigirizwa bwe baakiraba ne bajunga abaabaleeta.

¹⁶Naye Yesu abaana nʼabayita, nʼagamba nti, “Muleke abaana abato bajje gye ndi, temubagaana, kubanga abali nga bano be bʼobwakabaka bwa Katonda.

¹⁷Ddala ddala mbagamba nti Atayaniriza bwakabaka bwa Katonda ngʼomwana omuto, talibuyingiramu nʼakatono.”

¹⁸Awo omu ku bakulembeze bʼAbayudaaya nʼabuuza Yesu nti, “Omuyigiriza omulungi, nkole ki okufuna obulamu obutaggwaawo?”

¹⁹Yesu nʼamuddamu nti, “Lwaki ompita omulungi? Tewali mulungi wabula Katonda yekka.

²⁰ⓜ Amateeka ogamanyi nti, ‘Toyendanga, tottanga, tobbanga, tolimbanga, kitaawo ne nnyoko obassangamu ekitiibwa.’ ”

²¹Nʼamuddamu nti, “Amateeka ago gonna ngagondedde ebbanga lyonna okuva mu buto bwange.”

²²Yesu bwe yawulira ebyo, nʼamugamba nti, “Okyabulako ekintu kimu. Genda otunde ebibyo byonna, ensimbi zʼonoggyamu ozigabire abaavu, olibeera nʼobugagga mu ggulu, olyoke ojje ongoberere.”

²³Naye bwe yawulira ebigambo ebyo nʼagenda ngʼanakuwadde nnyo, kubanga yali mugagga nnyo.

²⁴Yesu bwe yamulaba ngʼanakuwadde nnyo, nʼayogera nti, “Nga kizibu omugagga okuyingira mu bwakabaka bwa Katonda!

²⁵Kyangu eŋŋamira okuyita mu nnyindo yʼempiso okusinga omugagga okuyingira mu bwakabaka bwa Katonda.”

²⁶Abo abaawulira ebyo kwe kubuuza nti, “Kale ani ayinza okulokolebwa?”

²⁷Yesu nʼaddamu nti, “Ebitayinzika eri abantu, biyinzika eri Katonda.”

²⁸Peetero nʼamugamba nti, “Ffe twalekawo ebyaffe byonna ne tukugoberera!”

²⁹Yesu nʼaddamu nti, “Ddala ddala mbagamba nti Teri muntu nʼomu eyalekawo amaka ge, oba omukazi we, oba baganda be, oba abazadde be, oba abaana be, olwʼobwakabaka bwa Katonda,

³⁰atalifuna mirundi mingi nʼokusingawo mu mulembe guno, ate ne mu mulembe ogugenda okujja aweebwe obulamu obutaggwaawo.”

³¹Awo Yesu nʼazza ku bbali ekkumi nʼababiri, nʼabagamba nti, “Laba, twambuka e Yerusaalemi, era bwe tunaatuuka eyo, byonna bannabbi bye bawandiika ku Mwana wʼOmuntu, bijja kutuukirizibwa.

³²Ajja kuweebwayo mu mikono gyʼabannaggwanga okukudaalirwa nʼokuvumibwa. Balimuduulira, ne bamubonyaabonya, ne bamuwandira amalusu,

³³balimukuba era ne bamutta. Ne ku lunaku olwokusatu alizuukira.”

³⁴Naye abayigirizwa be tebaategeera kyʼagamba, amakulu gaakyo gaali gabakwekeddwa, ne batategeera bye yayogera.

³⁵Awo Yesu bwe yali ngʼasemberera Yeriko, ne wabaawo omusajja omuzibe wʼamaaso eyali atudde ku kkubo ngʼasabiriza.

³⁶Awo omusajja oyo bwe yawulira ngʼekibiina kyʼabantu bayitawo, nʼabuuza nti, “Kiki ekyo?”

³⁷Ne bamuddamu nti, “Yesu Omunnazaaleesi ye ayitawo.”

³⁸Omuzibe wʼamaaso nʼakoowoola nti, “Yesu, Omwana wa Dawudi, onsaasire!”

³⁹Abo abaali bakulembeddemu ne bamuboggolera asirike, kyokka ye ne yeeyongera bweyongezi okuleekaana nti, “Omwana wa Dawudi, onsaasire!”

⁴⁰Awo Yesu nʼayimirira, nʼalagira, omusajja bamumuleetere. Bwe yasembera, Yesu nʼamubuuza nti,

⁴¹“Kiki kyʼoyagala nkukolere?” Omusajja nʼaddamu nti, “Mukama wange, njagala nziremu okulaba!”

⁴²Yesu nʼamugamba nti, “Ddamu okulaba. Okukkirizakwo kukuwonyezza.”

⁴³Amangwago nʼaddamu okulaba, nʼagoberera Yesu ngʼatendereza Katonda. Bonna abaakiraba ne batendereza Katonda.