Lukka 19:1-48 LGCB2014 - Bible AI

¹Awo Yesu nʼatuuka mu kibuga Yeriko, nʼayitamu.

²Mu kibuga omwo mwalimu omusajja erinnya lye Zaakayo; yali mukulu wa bawooza, era yali mugagga nnyo.

³Nʼafuba okulaba Yesu, naye nʼatasobola ngʼali mu kibiina kyʼabantu kubanga yali mumpi.

⁴Kyeyava adduka ne yeesooka ekibiina mu maaso, nʼalinnya omuti omusukamooli asobole okulaba Yesu ngʼayitawo.

⁵Yesu bwe yatuuka awo nʼatunula waggulu, nʼamuyita nti, “Zaakayo! Yanguwa okke wansi! Kubanga olwa leero ŋŋenda kuba mugenyi wo mu maka go.”

⁶Awo Zaakayo nʼakka mangu okuva ku muti nʼatwala Yesu mu nnyumba ye ngʼajjudde essanyu.

⁷Abantu bonna abaakiraba ne batandika okwemulugunya nga bagamba nti, “Agenze okukyalira omuntu alina ebibi.”

⁸Awo Zaakayo nʼayimirira nʼagamba Mukama waffe nti, “Mukama wange! Mpuliriza! Ebintu byange nnaabigabanyaamu wakati, ekitundu ne nkiwa abaavu; era obanga waliwo omuntu gwe nnali ndyazaamaanyizza, nnaamuliyira emirundi ena.”

⁹Yesu nʼamugamba nti, “Olwa leero obulokozi buzze mu nnyumba muno, kubanga omusajja ono naye muzzukulu wa Ibulayimu.

¹⁰Kubanga Omwana wʼOmuntu, yajjirira kunoonya nʼokulokola abaabula.”

¹¹Awo nga bakyawuliriza ebyo, Yesu nʼabagerera olugero olulala. Mu kiseera ebyo yali asemberedde nnyo Yerusaalemi, era abantu ne balowooza nti Obwakabaka bwa Katonda bugenda kutandika mu kiseera ekyo.

¹²Nʼabagamba nti, “Waaliwo omukungu omu eyalaga mu nsi eyʼewala alye obwakabaka alyoke akomewo.

¹³Bwe yali asitula nʼayita abaddu be kkumi nʼabalekera mina[9] kkumi nʼabagamba nti, ‘Muzisuubuzise okutuusa lwe ndidda.’

¹⁴“Naye abantu be baali tebamwagala ne batuma ababaka baabwe mu nsi gye yalaga, nga bagamba nti, ‘Ffe tetwagala musajja ono kubeera kabaka waffe.’

¹⁵“Naye nʼafuulibwa kabaka, nʼaddayo mu kitundu kyʼewaabwe. Bwe yatuuka nʼayita abaddu be, be yali alekedde ensimbi, bamutegeeze amagoba ge baggyamu.

¹⁶“Eyasooka nʼajja nʼagamba nti, ‘Ssebo, mina gye wandekera navisaamu mina kkumi.’

¹⁷“Mukama we nʼamwebaza, nʼamugamba nti, ‘Oli muddu mulungi nnyo. Kubanga obadde mwesigwa mu kintu ekitono ennyo, nkuwadde okufuga ebibuga kkumi.’

¹⁸“Omuddu owookubiri nʼajja, nʼagamba mukama we nti, ‘Ssebo, mina gye wandekera navisaamu mina ttaano.’

¹⁹“Oyo naye nʼamugamba nti, ‘Onoofuga ebibuga bitaano.’

²⁰“Awo omuddu omulala nʼajja, nʼagamba mukama we nti, ‘Mina gye wandekera yiino, nagitereka bulungi.

²¹Nakutya, kuba, nga bwʼoli omuntu omukakanyavu, otwala ebitali bibyo, nʼokungula nʼebibala byʼotaasiga.’

²²“Mukama we nʼamuddamu nti, ‘Oli musajja mubi nnyo! Nzija kukusalira omusango ngʼebigambo byo byʼoyogedde bwe biri. Wamanya nga Ndi muntu mukalubo, nga ntwala ebitali byange, era nga nkungula bye saasiga,

²³kale, lwaki ensimbi zange tewazissa mu banka, bwe nandikomyewo nandizisanzeeyo nga zizadde nʼamagoba?’

²⁴“Nʼalyoka agamba abaali bayimiridde awo nti, ‘Mumuggyeeko mina eyo mugiwe oli alina ekkumi.’

²⁵“Ne bamugamba nti, ‘Naye ssebo, oli alina mina kkumi!’

²⁶“Nʼabaddamu nti, ‘Mbagamba nti Abo abalina, be balyeyongera okuweebwa; ate abo abatalina, nʼakatono ke balina kalibaggibwako.

²⁷Kaakano njagala abo bonna abalabe bange, abaajeema nga tebaagala mbeere kabaka waabwe, mubandeetere wano, mubattire mu maaso gange.’ ”

²⁸Awo Yesu bwe yamala okwogera ebigambo ebyo, nʼatambula ngʼakulembedde abayigirizwa be okwolekera Yerusaalemi.

²⁹Bwe yali asemberera ebibuga Besufaage ne Besaniya ngʼali ku lusozi oluyitibwa olwa Zeyituuni, nʼatuma abayigirizwa be babiri nʼabagamba nti,

³⁰“Mugende mu kabuga akatuli mu maaso bwe munaaba mwakakayingira, munaalaba omwana gwʼendogoyi, oguteebagalwangako, nga gusibiddwa awo. Mugusumulule, muguleete wano.

³¹Singa wabaawo ababuuza nti, ‘Lwaki mugusumulula?’ Mumuddamu nti, ‘Mukama waffe agwetaaga.’ ”

³²Awo abaatumibwa ne bagenda ne basanga omwana gwʼendogoyi nga Yesu bwe yabagamba.

³³Era bwe baali nga bagusumulula bannannyini gwo ne bababuuza nti, “Lwaki musumulula omwana gwʼendogoyi ogwo?”

³⁴Ne baddamu nti, “Mukama waffe agwetaaga.”

³⁵Omwana gwʼendogoyi ne baguleeta eri Yesu, ne bagwaliirako eminagiro gyabwe, Yesu nʼagwebagala.

³⁶Bwe yali ngʼagenda, abantu ne baaliira ebyambalo byabwe mu luguudo.

³⁷Awo bwe yatuuka oluguudo we luserengetera olusozi olwa Zeyituuni, ekibiina kyonna ekyʼabayigirizwa, ne batandika okutendereza Katonda, mu ddoboozi eryʼomwanguka olwʼebyamagero bye yali akoze nga boogera nti,

³⁸ⓝ “Aweereddwa omukisa Kabaka ajja mu linnya lya Mukama!” “Emirembe gibe mu ggulu, nʼekitiibwa kibeere waggulu ennyo!”

³⁹Naye abamu ku Bafalisaayo abaali mu kibiina ne bagamba Yesu nti, “Omuyigiriza, lagira abayigirizwa bo basirike!”

⁴⁰Yesu nʼabaddamu nti, “Mbategeeza nti Singa bo basirika, amayinja gano ganaaleekaana!”

⁴¹Awo Yesu bwe yali ngʼasemberera ekibuga Yerusaalemi, bwe yakirengera, nʼakikaabira.

⁴²Nʼagamba nti, “Singa otegedde leero ebireeta emirembe ebyakulagirwa! Naye kaakano bikukwekeddwa, amaaso go tegayinza kubiraba.

⁴³Ekiseera kigenda kutuuka abalabe bo lwe balikuzimbako ekigo okukwetooloola ne bakuzinda,

⁴⁴ne bakumerengulira ku ttaka munda mu bisenge byo ggwe nʼabaana bo. Abalabe bo tebalirekawo jjinja na limu nga litudde ku linnaalyo, kubanga omukisa Katonda gwe yakuwa ogwʼokulokolebwa wagaana okugukozesa.”

⁴⁵Awo Yesu nʼayingira mu Yeekaalu nʼagobamu abaali batundiramu.

⁴⁶ⓞ ⓟ Nʼabagamba nti, “Kyawandiikibwa nti, ‘Ennyumba yange eneebanga ya kusinzizangamu,’ naye mmwe mugifudde ‘empuku yʼabanyazi.’”

⁴⁷Okuva mu kiseera ekyo Yesu nʼayigirizanga mu Yeekaalu buli lunaku. Naye bakabona abakulu nʼabannyonnyozi bʼamateeka, nʼabakulembeze bʼAbayudaaya ne bagezaako okufuna akaagaanya we banaamuttira.

⁴⁸Naye ne balemwa kubanga abantu bonna baamussaako nnyo omwoyo nga bamuwuliriza.