Lukka 2:1-52 LGCB2014 - Bible AI

¹Awo olwatuuka mu biseera ebyo, Kayisaali Agusito nʼayisa etteeka abantu bonna beewandiisa.

²Okubala kuno kwe kwasooka okubaawo ku mulembe gwa Kuleniyo nga ye gavana wʼObusuuli[1].

³Bonna ne bagenda okwewandiisa, buli muntu mu kibuga kyʼewaabwe.

⁴Awo Yusufu nʼava e Nazaaleesi ekyʼe Ggaliraaya, nʼagenda mu kibuga kya Dawudi ekiyitibwa Besirekemu ekyʼe Buyudaaya, kubanga yali wa mu kika kya Dawudi,

⁵yeewandiise ne Maliyamu eyali olubuto, oyo gwe yali ayogereza.

⁶Naye bwe baali bali eyo ekiseera kya Maliyamu ekyʼokuzaala ne kituuka.

⁷Nʼazaala omwana we omubereberye omulenzi, nʼamubikka mu bugoye, nʼamuzazika mu lutiba ente mwe ziriira, kubanga tebaafuna kifo mu nnyumba yʼabagenyi.

⁸Mu kiro ekyo waaliwo abasumba abaali mu kitundu ekyo kye kimu ku ttale nga bakuuma endiga zaabwe.

⁹Awo malayika wa Mukama nʼabalabikira, ne waakaayakana nʼekitiibwa kya Mukama, ne batya nnyo.

¹⁰Malayika nʼabagumya nti, “Temutya, kubanga mbaleetedde amawulire amalungi agʼessanyu eringi, era nga ga bantu bonna.

¹¹Kubanga Omulokozi, ye Kristo Mukama waffe azaaliddwa leero mu kibuga kya Dawudi.

¹²Ku kino kwe munaamutegeerera: Mujja kulaba omwana omuwere, ngʼabikkiddwa mu ngoye, ngʼazazikiddwa mu lutiba lwʼente.”

¹³Amangwago eggye lya bamalayika abʼomu ggulu ne beegatta ne malayika oyo ne batendereza Katonda nga bagamba nti,

¹⁴“Ekitiibwa kibe eri Katonda Ali Waggulu ennyo. Nʼemirembe gibe mu nsi eri abantu Katonda bʼasiima.”

¹⁵Awo bamalayika bwe baamala okuddayo mu ggulu, abasumba ne bateesa nti, “Tugende e Besirekemu tulabe kino ekibaddewo, Mukama kyʼatutegeezezza.”

¹⁶Ne bayanguwa ne bagenda, ne balaba Maliyamu ne Yusufu, nʼomwana omuwere ngʼazazikiddwa mu lutiba lwʼente.

¹⁷Awo abasumba ne bategeeza bye baalabye, nʼebya bategeezeddwa ebikwata ku mwana oyo.

¹⁸Bonna abaawulira ebigambo byʼabasumba ne beewuunya nnyo.

¹⁹Naye Maliyamu nʼakuumanga ebigambo ebyo mu mutima gwe era ngʼabirowoozaako nnyo.

²⁰Awo abasumba ne baddayo gye balundira ebisibo byabwe, nga bagulumiza era nga batendereza Katonda, olwʼebyo byonna bye baawulira era ne bye baalaba nga bwe baali bategeezeddwa.

²¹Olunaku olwʼomunaana olwʼokukomolerwako bwe lwatuuka, nʼatuumibwa erinnya YESU, malayika lye yayogera nga Yesu tannaba kuba mu lubuto lwa nnyina.

²²Awo ekiseera bwe kyatuuka Maliyamu okugenda mu Yeekaalu atukuzibwe, ngʼamateeka ga Musa bwe galagira ne batwala Yesu e Yerusaalemi okumuwaayo eri Mukama.

²³ⓐ Kubanga mu mateeka ago, Katonda yalagira nti, “Omwana omubereberye bwʼanaabanga omulenzi, anaaweebwangayo eri Mukama.”

²⁴ⓑ Era mu kiseera kye kimu bakadde ba Yesu ne bawaayo ssaddaaka amateeka nga bwe galagira okuwaayo amayiba abiri oba enjiibwa bbiri.

²⁵Ku lunaku olwo, waaliwo omusajja erinnya lye Simyoni, eyabeeranga mu Yerusaalemi, nga mutuukirivu, ngʼatya Katonda, era ngʼajjudde Mwoyo Mutukuvu, ngʼalindirira okusanyusibwa kwa Isirayiri.

²⁶Kubanga yali abikkuliddwa Mwoyo Mutukuvu nti Tagenda kufa nga tannalaba ku Kristo, Omulokozi.

²⁷Mwoyo Mutukuvu nʼamuluŋŋamya okujja mu Yeekaalu. Maliyamu ne Yusufu bwe baaleeta Omwana Yesu okumuwaayo eri Mukama ngʼamateeka bwe galagira, ne Simyoni naye yaliwo.

²⁸Simyoni nʼajja nʼasitula Omwana mu mikono gye, nʼatendereza Katonda ngʼagamba nti,

²⁹“Mukama wange, kaakano osiibule omuweereza wo mirembe, ngʼekigambo kyo bwe kigamba.

³⁰Kubanga amaaso gange galabye Obulokozi bwo,

³¹bwe wateekateeka mu maaso gʼabantu bonna,

³²Okuba Omusana ogwʼokwakira amawanga. Nʼokuleetera abantu bo Abayisirayiri ekitiibwa!”

³³Kitaawe wʼomwana ne nnyina ne beewuunya ebigambo ebyayogerwa ku Yesu.

³⁴Awo Simyoni nʼabasabira omukisa. Nʼalyoka nʼagamba Maliyamu nti, “Omwana ono bangi mu Isirayiri tebagenda kumukkiriza, era alireetera bangi okugwa nʼabalala ne bayimusibwa.

³⁵Era naawe ennaku eri ngʼekitala erikufumita omutima, nʼebirowoozo byʼomu mitima gyʼabantu birimanyibwa.”

³⁶Waaliwo nnabbi omukazi, ayitibwa Ana, muwala wa Fanweri, owʼomu kika kya Aseri, era nga mukadde nnyo, eyafumbirwa nga muwala muto nʼamala ne bba emyaka musanvu gyokka, bba nʼafa,

³⁷nʼasigala nga nnamwandu. Mu kiseera kino yali yaakamala emyaka kinaana mu ena, era teyavanga mu Yeekaalu ngʼasiiba nʼokwegayiriranga Katonda emisana nʼekiro.

³⁸Awo Ana mu kiseera ekyo yali ayimiridde okumpi ne Maliyamu ne Yusufu, naye nʼatandika okutendereza Katonda ngʼamwogerako eri abo bonna abaali balindirira okununulibwa kwa Yerusaalemi.

³⁹Awo bakadde ba Yesu bwe baamala okutuukiriza byonna ngʼamateeka ga Mukama bwe galagira, ne baddayo e Nazaaleesi ekyʼomu Ggaliraaya.

⁴⁰Omwana nʼakula, nʼaba wʼamaanyi, nʼajjuzibwa amagezi nʼekisa kya Katonda kyali ku ye.

⁴¹Bakadde ba Yesu buli mwaka bagendanga mu Yerusaalemi ku Mbaga yʼOkuyitako.

⁴²Awo Yesu bwe yaweza emyaka kkumi nʼebiri egyʼobukulu nʼayambuka e Yerusaalemi ne bakadde be ku mbaga, nga empisa yaabwe bwe yali.

⁴³Awo embaga ngʼewedde, ne bakyusa okuddayo ewaabwe, naye omulenzi Yesu nʼasigala mu Yerusaalemi, naye bazadde be ne batakimanya.

⁴⁴Kubanga baalowooza nti Ali ne bannaabwe mu kibiina ekirala, ekiro ekyo bwe bataamulaba, ne bamunoonya mu kibiina omwali baganda baabwe ne mikwano gyabwe.

⁴⁵Bwe bataamulaba kwe kuddayo e Yerusaalemi nga bamunoonya.

⁴⁶Awo nga baakamunoonyeza ennaku ssatu, ne bamusanga ngʼatudde mu Yeekaalu nʼabannyonnyozi bʼamateeka ngʼabawuliriza awamu nʼokubabuuza ebibuuzo.

⁴⁷Bonna abaali bamuwuliriza ne beewuunya nnyo olwʼamagezi ge nʼokuddamu kwe.

⁴⁸Awo bazadde be bwe baamulaba ne beewuunya nnyo, nnyina nʼamugamba nti, “Mwana waffe otukoze ki kino? Kitaawo nange tweraliikiridde nnyo nga tukunoonya!”

⁴⁹Yesu nʼabaddamu nti, “Mubadde munnoonyeza ki? Temwategedde nga kiŋŋwanidde okukola ebintu bya Kitange?”

⁵⁰Naye ne batategeera bigambo ebyo bye yabagamba.

⁵¹Nʼasituka nʼagenda nabo e Nazaaleesi, nʼabagonderanga; kyokka nnyina ebigambo ebyo byonna nʼabikuuma mu mutima gwe,

⁵²Awo Yesu nʼakula mu mubiri, mu magezi, era nʼalaba ekisa mu maaso ga Katonda ne mu maaso gʼabantu.