Lukka 20:1-47 LGCB2014 - Bible AI

¹Awo Yesu bwe yali ngʼayigiriza era ngʼabuulira Enjiri mu luggya lwa Yeekaalu, bakabona abakulu, nʼabannyonnyozi bʼamateeka nʼabakulembeze bʼAbayudaaya ne bajja gyʼali.

²Ne bamubuuza nti, “Tubuulire, buyinza ki obukukozesa bino? Era ani eyakuwa obuyinza obwo?”

³Yesu nʼaddamu nti, “Nange ka mbabuuze ekibuuzo kino.

⁴Okubatiza kwa Yokaana kwava eri Katonda nandiki kwava mu bantu?”

⁵Ne basooka okwogeraganyaamu bokka ne bokka nga bagamba nti, “Bwe tunaagamba nti, ‘Kwava mu ggulu,’ ajja kutubuuza nti, ‘Kale, lwaki temwamukkiriza?’

⁶Naye ate bwe tunaddamu nti, ‘Kwava mu bantu,’ abantu bonna bajja kutukuba amayinja, kubanga bamatizibwa nti Yokaana yali nnabbi.”

⁷Kyebaava baddamu nti, “Tetumanyi gye kwava.”

⁸Yesu nʼabagamba nti, “Nange sijja kubabuulira gye nzigya obuyinza obunkozesa bino.”

⁹Awo Yesu nʼakyukira abantu nʼabagerera olugero luno nti, “Waaliwo omusajja eyalina ennimiro eyʼemizabbibu, nʼagipangisa abalimi, nʼagenda akyala mu nsi eyʼewala, nʼamalayo ebbanga ddene.

¹⁰Awo ekiseera ekyʼamakungula bwe kyatuuka, nʼatuma omu ku baddu be eri abalimi bamuwe ku bibala ebyʼemizabbibu gye. Naye abalimi abapangisa ne bamukuba ne bamugoba nʼaddayo ngalo nsa eri mukama we.

¹¹Nʼabatumira omuddu we omulala, nʼoyo ne bamukuba ne bamuswaza nnyo, nʼaddayo ngalo nsa.

¹²Nʼabatumira omuddu owookusatu, naye ne bamukuba ne bamussaako nʼebiwundu ne bamugoba mu nnimiro.

¹³“Nannyini nnimiro ne yeebuuza nti, ‘Nkole ntya? Ka mbatumire omwana wange gwe njagala ennyo, oboolyawo banaamussaamu ekitiibwa.’

¹⁴“Omwana oyo bwe baamulengera ne bateesa nti, ‘Ono yʼagenda okusikira ennimiro eno nga kitaawe afudde. Ka tumutte, eriba yaffe.’

¹⁵Ne bamuggya mu nnimiro nga bamukulula ne bamutta.

¹⁵“Mulowooza nannyini nnimiro abalimi abo alibakola atya?

¹⁶Agenda kujja abazikirize bonna, nʼennimiro agiwe abalala.”

¹⁶Awo bwe baabiwulira ebyo ne bagamba nti, “Ekintu ngʼekyo kireme kubaawo!”

¹⁷ⓠ Yesu nʼabatunuulira nʼabagamba nti, “Kale ekyawandiikibwa kino kitegeeza ki? Ekigamba nti, ‘Ejjinja abazimbi lye baagaana, lye lyafuulibwa ekkulu eryʼoku nsonda.’

¹⁸Omuntu yenna agwa ku jjinja eryo alimenyekamenyeka, gwe ligwira alibetentebwa.”

¹⁹Awo abannyonnyozi bʼamateeka ne bakabona abakulu bwe baawulira ebigambo ebyo, ne baagala bamukwatirewo mangwago, kubanga baamanya ngʼolugero lwali lukwata ku bo. Naye ne batya abantu.

²⁰Ne balinda okutuusa lwe banaafuna akaagaanya babeeko kye bakola. Ne batuma abakessi eri Yesu nga beefudde ngʼabantu abalungi abaagala okumanya. Baasuubira nti Mu ebyo byʼanaddamu, nga bamubuuzizza ebibuuzo ebirimu emitego, munaabaamu kwe banaasinziira okumukwata ne bamuwaayo ewa gavana.

²¹Abakessi ne babuuza Yesu nti, “Omuyigiriza, tumanyi nga Byʼoyogera nʼebyo byʼoyigiriza bya mazima, era nga tofaayo ku bigambo ebyʼabantu obuntu wabula oyigiriza ebyo Katonda byʼayagala.

²²Kyetuva tukubuuza nti Kituufu okuwa Kayisaali omusolo oba si kituufu?”

²³Yesu nʼategeera mangu obukuusa bwabwe, nʼabagamba nti,

²⁴“Mundage ensimbi eya ffeeza. Ekifaananyi kino ekiriko kyʼani? Nʼerinnya lino lyʼani?” Ne baddamu nti, “Bya Kayisaali.”

²⁵Nʼabagamba nti, “Kale ebya Kayisaali mubiwe Kayisaali, nʼebya Katonda mubiwe Katonda.”

²⁶Ne balemwa okumukwasa mu ebyo bye yaddamu ngʼabantu bonna bali awo. Bye yaddamu ne bibeewuunyisa nnyo, ne basirika busirisi.

²⁷Awo abamu ku Basaddukaayo abatakkiririza mu kuzuukira, ne bajja eri Yesu, ne bamubuuza nti,

²⁸“Omuyigiriza, amateeka ga Musa gagamba nti Singa omusajja omufumbo afa nga tazadde baana, muganda we awasenga nnamwandu alyoke afunire muganda we omufu ezzadde.

²⁹Waaliwo abooluganda musanvu, asinga obukulu nʼawasa, kyokka nʼafa nga talese mwana.

³⁰Adda ku mufu nʼawasa nnamwandu; kyokka naye nʼafa nga tazadde mwana.

³¹Okutuusa abooluganda bonna lwe baafa ne baggwaawo nga buli omu awasizza ku nnamwandu oyo, kyokka nga tewali alese mwana.

³²Oluvannyuma nʼomukazi naye nʼafa.

³³Kale mu kuzuukira omukazi oyo aliba muka ani? Kubanga abooluganda bonna omusanvu baamuwasa!”

³⁴Yesu nʼaddamu nti, “Obufumbo buli kuno ku nsi, abantu kwe bawasiza era ne bafumbirwa.

³⁵Naye abo abasaanyizibwa okuzuukira mu bafu bwe batuuka mu ggulu tebawasa wadde okufumbirwa,

³⁶era tebaddayo kufa nate, kubanga baba nga bamalayika. Era baba baana ba Katonda kubanga baba bazuukizibbwa mu bulamu obuggya,

³⁷ⓡ Naye nti Abafu bazuukizibwa, ne Musa yannyonnyola bye yalaba ku kisaka, bwe yayita Mukama Katonda wa Ibulayimu, Katonda wa Isaaka, era Katonda wa Yakobo.

³⁸Kino kitegeeza nti Si Katonda wa bafu wabula Katonda wa balamu, kubanga bonna balamu gyʼali.”

³⁹Abamu ku bannyonnyozi bʼamateeka ne bagamba nti, “Omuyigiriza, ozzeemu bulungi!”

⁴⁰Ne watabaawo ayaŋŋanga kwongera kumubuuza bibuuzo. Kristo Mwana wʼani?

⁴¹Awo Yesu nʼababuuza nti, “Lwaki Kristo ayitibwa Omwana wa Dawudi?

⁴²Songa Dawudi amwogerako mu Zabbuli nti,

⁴²‘Katonda yagamba Mukama wange nti, Tuula ku mukono gwange ogwa ddyo

⁴³ⓢ okutuusa lwe ndifuula abalabe bo entebe yʼebigere byo.’

⁴⁴Noolwekyo obanga Dawudi amuyita Mukama we, kale ayinza atya okuba omwana we?”

⁴⁵Awo abantu bonna nga bawulira, Yesu nʼakyukira abayigirizwa be nʼabagamba nti,

⁴⁶“Mwekuume abannyonnyozi bʼamateeka. Baagala nnyo okutambula nga bambadde amaganduula agagenda gakweya, nʼabantu okugenda nga babalamusa mu nguudo ne mu butale, era baagala nnyo okutuula mu bifo ebyʼekitiibwa mu makuŋŋaaniro ne ku mbaga!

⁴⁷Balimbalimba nga basaba essaala empanvu, ngʼeno bwe basala enkwe okunyaga amayumba ga bannamwandu. Noolwekyo bagenda kufuna ekibonerezo ekisingira ddala obunene.”