Lukka 21:1-38 LGCB2014 - Bible AI

¹Awo Yesu bwe yayimusa amaaso nʼalaba abantu abagagga nga bateeka ebirabo byabwe mu ggwanika mu Yeekaalu.

²Nʼalaba nnamwandu omwavu ngʼawaayo busente bubiri.

³Nʼagamba nti, “Ddala ddala mbagamba nti Nnamwandu oyo omwavu agabye okusinga bali abagagga bonna.

⁴Kubanga bagabye kitono nga bakiggya ku nsimbi ze bateetaaga, naye nnamwandu mu bwavu bwe awaddeyo kyonna kyʼalina.”

⁵Ne wabaawo aboogera ku bulungi bwʼamayinja agaweebwayo eri Katonda okuzimba Yeekaalu.

⁶Naye Yesu nʼagamba nti, “Ekiseera kijja ebirungi bino byonna bye mutunuulira lwe biribetentulwa ne watasigalawo jjinja na limu nga litudde ku linnaalyo, eritalisuulibwa wansi.”

⁷Ne bamubuuza nti, “Omuyigiriza, ebyo biribaawo ddi? Ye walibaawo akabonero akaliraga nti Biri kumpi okubaawo?”

⁸Yesu nʼaddamu nti, “Mwekuume muleme kulimbibwalimbibwa. Kubanga bangi balikozesa erinnya lyange, nga bagamba nti, ‘Nze nzuuyo.’ Naye temubakkirizanga.

⁹Naye bwe muwuliranga entalo nʼobwegugungo, temutyanga. Kubanga entalo ziteekwa okusooka okujja, naye enkomerero terituuka mangwago.”

¹⁰Nʼayongera nʼabagamba nti, “Amawanga galirwanagana, nʼobwakabaka ne bulwanagana ne bunaabwo.

¹¹Wagenda kubeerawo musisi owʼamaanyi ennyo, nʼenjala ennyingi mu bitundu ebyʼenjawulo, ne kawumpuli. Walibaawo nʼebyentiisa ate nʼobubonero okuva mu ggulu.

¹²“Naye bino byonna nga tebinnabaawo balibayigganya, balibakwata. Balibawaayo mu makuŋŋaaniro, ne mu maaso ga bakabaka ne bagavana, ku lwʼerinnya lyange, ne musibibwa ne mu makomera.

¹³Kiribaviiramu okufuna omukisa okuba abajulirwa bange.

¹⁴Naye temweraliikiriranga gye muliggya ebigambo ebyʼokuwoza,

¹⁵Kubanga ŋŋenda kubawa ebigambo nʼamagezi ebiriremesa nʼabalabe bammwe okubaako nʼekyʼokuddamu!

¹⁶Muliweebwayo bakadde bammwe, ne baganda bammwe ne mikwano gyammwe, balibawaayo mukwatibwe, era abamu ku mmwe muttibwe.

¹⁷Abantu bonna balibakyawa nga babalanga erinnya lyange.

¹⁸Naye nʼoluviiri olumu bwe luti olwʼoku mitwe gyammwe terulizikirira.

¹⁹Kubanga bwe muligumiikiriza muliwonya obulamu bwammwe.”

²⁰“Bwe mulabanga nga Yerusaalemi kyetoolooddwa amaggye, nga mutegeera nga Okuzikirizibwa kwʼekibuga ekyo kutuuse.

²¹Abo abalibeera mu Buyudaaya baddukiranga ku nsozi, abaliba mu Yerusaalemi bakivangamu ne badduka, nʼabo abalibeera mu nnimiro tebakomangawo mu kibuga.

²²Kubanga ebyo bye biriba ebiseera Katonda mwaliwolera eggwanga, nʼebigambo ebiri mu Byawandiikibwa birituukirizibwa.

²³Nga ziribasanga abakazi abaliba embuto nʼabayonsa! Kubanga eggwanga liribonaabona, nʼabantu baalyo balisunguwalirwa.

²⁴Abamu balittibwa nʼekitala kyʼomulabe, abalala balikwatibwa ne bawaŋŋangusibwa mu mawanga gonna amalala agʼoku nsi. Yerusaalemi kiriwangulwa bannaggwanga ne bakirinnyirira okutuusa ekiseera kyabwe ekyʼobuwanguzi lwe kirikoma mu kiseera Katonda kyʼaliba ateesezza.”

²⁵“Walibaawo obubonero ku njuba, ne ku mwezi, ne ku mmunyeenye. Wano ku nsi amawanga galibeera mu kunyolwa, olwʼabʼamawanga, ngʼabantu basamaaliridde olwʼennyanja eziyira nʼamayengo ageesiikuula.

²⁶Abantu baliggwaamu amaanyi ne bazirika nga batidde nnyo olwʼebirijja ku nsi; kubanga amaanyi gʼeggulu galinyeenyezebwa.

²⁷Mu kiseera ekyo muliraba Omwana wʼOmuntu ngʼajjira mu kire nʼobuyinza nʼekitiibwa kingi.

²⁸Kale ebintu ebyo bwe bitandikanga muyimiriranga butereevu ne muyimusa amaaso gammwe waggulu! Kubanga okulokolebwa kwammwe nga kusembedde.”

²⁹Awo Yesu nʼabagerera olugero luno nti, “Mutunuulire omuti omutiini nʼemiti emirala gyonna.

³⁰Bwe mulaba nga gitandise okutojjera, mumanya nga Ekyeya kiri kumpi.

³¹Mu ngeri yʼemu bwe mulabanga ebyo nga bibaawo, nga mutegeera nti Obwakabaka bwa Katonda buli kumpi okutuuka.

³²“Ddala ddala mbagamba nti Ebyo byonna birimala kubaawo nʼomulembe guno ne gulyoke guggwaawo.

³³Eggulu nʼensi biriggwaawo, naye ebigambo byange tebigenda kuggwaawo.

³⁴“Mwekuume muleme okwemalira mu binyumu nʼokutamiira, nʼokweraliikirira ebyʼobulamu, okujja kwange okwʼamangu kuleme kubakwasa nga temugenderedde ngʼabagudde mu mutego.

³⁵Kubanga olunaku olwo lulituuka ku buli muntu mu nsi yonna.

³⁶Mutunule nga musaba Katonda buli kiseera, abawe amaanyi okubasobozesa okuwona ebintu ebyo byonna, Omwana wʼOmuntu bwʼalijja mulyoke musobole okuyimirira mu maaso ge.”

³⁷Buli lunaku Yesu yayigirizanga mu Yeekaalu, bwe bwawungeeranga nʼava mu kibuga nʼasula ku lusozi oluyitibwa olwa Zeyituuni.

³⁸Mu makya abantu bonna ne bajjanga mu Yeekaalu okumuwuliriza.