Lukka 22:1-71 LGCB2014 - Bible AI

¹Embaga eyʼEmigaati Egitazimbulukuswa eyitibwa Okuyitako yali esembedde.

²Bakabona abakulu nʼabannyonnyozi bʼamateeka baali bakola kaweefube okusala amagezi okutta Yesu, naye nga batya abantu okusasamala.

³Awo Setaani nʼayingira mu Yuda Isukalyoti eyali omu ku bayigirizwa ekkumi nʼababiri,

⁴nʼagenda eri bakabona abakulu nʼabakuumi ba Yeekaalu abakulu, nʼateesa nabo nga bwʼanaamuwaayo gye bali.

⁵Ne basanyuka nnyo, era ne bakkiriza okumusasula.

⁶Yuda nʼakkiriza okuwaayo Yesu, nʼanoonya ebbanga mwʼanaamuweerayo gye bali nga tewali kibiina.

⁷Awo olunaku olwʼEmigaati Egitazimbulukuswa, okuttirwa omwana gwʼendiga ogwʼembaga yʼOkuyitako, ne lutuuka.

⁸Yesu nʼatuma Peetero ne Yokaana nʼabagamba nti, “Mugende mututegekere ekyekiro kyaffe ekyʼokuyitako, tujje tukirye.”

⁹Ne bamubuuza nti, “Oyagala tukitegekere wa?”

¹⁰Yesu nʼabaddamu nti, “Munaaba mwakayingira mu kibuga, mujja kulaba omusajja eyeetisse ensuwa yʼamazzi ngʼatambula. Mumugoberere okutuuka mu nnyumba mwʼanaayingira,

¹¹mugambe nnyinimu nti Omuyigiriza atutumye gyʼoli ngʼagamba nti, ‘Ekisenge kyʼabagenyi kiruwa mwe nnaaliira Okuyitako nʼabayigirizwa bange?’

¹²Ajja kubalaga ekisenge ekinene ekiri waggulu mu kalinaabiri nga kitegekeddwa bulungi. Omwo mwe muba mutegekera.”

¹³Ne balaga mu kibuga, ne basanga buli kimu nga Yesu bwe yabagamba. Ne bategeka Okuyitako.

¹⁴Awo ekiseera kyʼokulya bwe kyatuuka, Yesu nʼatuula nʼabayigirizwa be okulya.

¹⁵Yesu nʼagamba abayigirizwa be nti, “Ebbanga eryo lyonna mbadde ndowooza nnyo ku Kyekiro kino ekyʼOkuyitako, nga njagala nkirye nammwe nga sinnaba kubonyaabonyezebwa.

¹⁶Kubanga mbagamba nti Sigenda kuddayo kulya nammwe Okuyitako okutuusa lwe kulituukirizibwa mu bwakabaka bwa Katonda.”

¹⁷Awo Yesu nʼaddira ekikompe kya wayini, bwe yamala okwebaza Katonda, nʼagamba nti, “Mukwate, munyweko mwenna.

¹⁸Kubanga mbagamba nti, Sigenda kuddayo kunywa wayini okutuusa ngʼobwakabaka bwa Katonda buzze.”

¹⁹Ate nʼatoola omugaati, bwe yamala okwebaza Katonda, nʼagumenyaamenyamu, nʼabagabira ngʼagamba nti, “Guno gwe mubiri gwange oguweebwayo ku lwammwe. Mukolenga bwe muti nga munzijukira.”

²⁰Bwe baamala okulya ekyekiro, nʼaddira nate ekikompe era mu ngeri yʼemu nʼakibakwasa ngʼagamba nti, “Ekikompe kino ke kabonero akʼendagaano ya Katonda empya ekakasibwa mu musaayi gwange oguyiyibwa ku lwammwe.

²¹Naye muwulire kino. Omuntu agenda okundyamu olukwe atudde wano nange ku mmere.

²²Kigwanira Omwana wʼOmuntu, okufa nga Katonda bwe yateekateeka. Naye zimusanze omuntu oyo amulyamu olukwe.”

²³Awo abayigirizwa ne batandika okwebuuzaganya bokka na bokka nti Ani ku bo ayinza okukola ekintu ngʼekyo!

²⁴Era ne batandika okuwakana bokka ne bokka, ani asinga ekitiibwa mu bo?

²⁵Naye Yesu nʼabagamba nti, “Bakabaka baamawanga bafuga abantu baabwe, nʼabʼobuyinza ne babazunza mu kino na kiri, naye abafugibwa tebalina kya kukola wabula okubayita abayambi baabwe.

²⁶Naye mu mmwe tekisaanira kuba bwe kityo. Oyo asinga ekitiibwa mu mmwe asaana yeeyisenga ngʼasembayo, nʼomukulembeze mu mmwe asaana abeere ngʼomuweereza wammwe.

²⁷Mu nsi muno omukungu yʼatula ku mmeeza abaddu be ne bamuweereza. Naye wano mu ffe nze muweereza wammwe.

²⁸Naye mmwe mubadde wamu nange mu biseera bino ebyʼokugezesebwa kwange,

²⁹era kubanga Kitange ampadde obwakabaka, noolwekyo mbaatulira kati nti mbawadde ekifo

³⁰okutuula nʼokulya era nʼokunywera ku mmeeza yange mu bwakabaka bwange obwo, era mulituula ku ntebe ne mulamula ebika bya Isirayiri ekkumi nʼebibiri.

³¹“Simooni, Simooni, Setaani asabye okukuwewa ngʼeŋŋaano,

³²naye ggwe nkusabidde okukkiriza kwo kuleme kukuggwaamu. Era bwʼolimala okwenenya, yamba mu kuzimba nʼokunyweza okukkiriza kwa baganda bo.”

³³Awo Peetero nʼaddamu nti, “Mukama wange, neeteeseteese okusibirwa awamu naawe mu kkomera, era nʼokufiira awamu naawe.”

³⁴Yesu nʼamuddamu nti, “Peetero, nkutegeeza nti Leero ononneegaana emirundi esatu enkoko nga tennakookolima.”

³⁵Awo Yesu nʼababuuza nti, “Bwe nabatuma okubuulira Enjiri, ne mutatwala nsimbi wadde ensawo, oba omugogo omulala ogwʼengatto, mwalina okwetaaga ekintu kyonna?” Ne baddamu nti, “Nedda.”

³⁶Yesu nʼabagamba nti, “Naye kaakano alina ensawo eterekebwamu ensimbi agitwale, nʼensawo ngʼeyʼomusabiriza bwe mutyo. Atalina kitala, atunde ku ngoye ze akyegulire!

³⁷ⓣ Kubanga mbagamba nti kyetaagisa okutuukirizibwa mu nze ekyawandiikibwa nti, ‘Yabalirwa wamu nʼabamenyi bʼamateeka,’ ebinkwatako biteekwa okutuukirira.”

³⁸Abayigirizwa ne bamugamba nti, “Mukama waffe, wano tulinawo ebitala bibiri!” Nʼabaddamu nti, “Bimala!”

³⁹Awo Yesu nʼafuluma mu kibuga awamu nʼabayigirizwa be nʼakwata ekkubo erigenda ku lusozi olwa Zeyituuni nga bwe yali empisa ye.

⁴⁰Bwe yatuuka eyo nʼagamba abayigirizwa be nti, “Musabe Katonda, muleme kuwangulwa kukemebwa.”

⁴¹Ye nʼabavaako akabanga ngʼawakasukwa ejjinja, nʼafukamira nʼasaba nti,

⁴²“Kitange, obanga kwe kusiima kwo ekikompe kino kinzigyeko. Naye si nga Nze bwe njagala, wabula kyʼoyagala kye kiba kikolebwa.”

⁴³Awo malayika eyava mu ggulu nʼajja nʼamugumya.

⁴⁴Yali mu kunyolwa kunene nnyo okwʼomwoyo, ne yeeyongera okusaba ennyo nʼatuuyana nʼentuuyo ezamuvaamu ne ziba ngʼamatondo gʼomusaayi, era ne gatonnya wansi.

⁴⁵Bwe yayimuka ngʼamaze okusaba nʼaddayo eri abayigirizwa be, naye nʼabasanga nga beebase, olwʼennaku eyali ebakutte.

⁴⁶Nʼabagamba nti, “Lwaki mwebase? Muzuukuke, musabe, okukemebwa kuleme okubawangula.”

⁴⁷Awo Yesu bwe yali ngʼakyayogera, ekibiina kyʼabantu ne batuuka nga Yuda, omu ku bayigirizwa be ekkumi nʼababiri, yʼabakulembedde. Yuda nʼajja butereevu awali Yesu, nʼamunywegera.

⁴⁸Naye Yesu nʼamugamba nti, “Yuda, Omwana wʼOmuntu omulyamu olukwe ngʼomunywegera?”

⁴⁹Abayigirizwa abalala bwe baalaba ekyali kigenda okubaawo ne babuuza Yesu nti, “Mukama waffe, tubateme nʼebitala byaffe?”

⁵⁰Era omu ku bo nʼatemako nʼekitala okutu kwʼomuweereza wa Kabona Asinga Obukulu.

⁵¹Naye Yesu nʼabagamba nti, “Temwongera kubalwanyisa.” Nʼakwata ku kutu kwʼomusajja, nʼamuwonya!

⁵²Yesu kwe kukyukira bakabona abakulu, nʼabakulu bʼabakuumi ba Yeekaalu, nʼabakulembeze bʼAbayudaaya abaali bakulembedde ekibiina kyʼabantu, nʼabagamba nti, “Ndi munyazi, nʼokujja ne mujja gye ndi nga mwambalidde ebitala nʼemiggo?

⁵³Lwaki temwankwatira mu Yeekaalu? Nabeeranga omwo buli lunaku. Naye nammwe eno ye ssaawa yammwe, nʼekizikiza we kiragira obuyinza bwakyo.”

⁵⁴Awo ne bakwata Yesu ne bamutwala mu nnyumba ya Kabona Asinga Obukulu. Peetero nʼagoberera nga yeesuddeko akabanga.

⁵⁵Bwe baamala okukuma omuliro wakati mu luggya ne batuula okwota; Peetero naye nʼatuula wakati mu bo, nʼayota omuliro.

⁵⁶Omuwala omuweereza nʼamulengera ngʼomuliro gumumulisizza, nʼamutunuulira enkaliriza, okutuusa lwe yagamba nti, “Omusajja ono yali ne Yesu!”

⁵⁷Peetero ne yeegaana nti, “Omukazi, oyo gwʼoyogerako nze simumanyi.”

⁵⁸Bwe waayitawo akabanga omuntu omulala nʼalaba Peetero nʼamugamba nti, “Naawe oli omu ku bo.” Peetero ne yeegaana nti, “Nedda, ssebo, si bwe kiri.”

⁵⁹Bwe waali wayiseewo ngʼessaawa nnamba, omuntu omu nʼayogera ngʼakakasa nti, “Ddala nʼono yali wamu ne Yesu kubanga naye Mugaliraaya.”

⁶⁰Peetero nʼaddamu nti, “Omusajja, byʼoyogerako sibimanyi!” Peetero bwe yali akyayogera enkoko nʼekookolima.

⁶¹Mu kaseera ako Mukama waffe nʼakyuka nʼatunuulira Peetero. Peetero nʼajjukira Yesu kye yagamba nti, “Enkoko eneeba tennakookolima ononneegaana emirundi esatu.”

⁶²Awo Peetero nʼafuluma okuva mu luggya nʼakaaba nnyo amaziga!

⁶³Awo abasajja abaali bakuuma Yesu ne batandika okumuduulira nʼokumukuba.

⁶⁴Ne bamusiba ekitambaala ku maaso ne bamukuba ebikonde, oluvannyuma ne bamubuuza nti, “Nnabbi! yogera ani akukubye?”

⁶⁵Ne bamuvuma nʼebigambo ebirala bingi.

⁶⁶Enkeera mu makya Olukiiko Olukulu olwʼAbayudaaya, nga lulimu bakabona abakulu, nʼabannyonnyozi bʼamateeka, nʼabakulembeze bʼAbayudaaya, ne lutuula. Yesu nʼaleetebwa mu maaso gʼOlukiiko olwo.

⁶⁷Ne bamubuuza nti, “Obanga ggwe Kristo, tubuulire.” Yesu nʼabaddamu nti, “Bwe nnaababuulira temujja kunzikiriza,

⁶⁸ne bwe nnaababuuza ebibuuzo temujja kunnyanukula.

⁶⁹Naye ekiseera kituuse, Nze, Omwana wʼOmuntu, okutuula ku mukono ogwa ddyo ogwa Katonda Ayinzabyonna.”

⁷⁰Bonna ne baleekaana nti, “Kwe kugamba nti Ggwe Mwana wa Katonda?” Yesu nʼabaddamu nti, “Nga bwe mugambye bwe ntyo bwe ndi.”

⁷¹Ne bagamba nti, “Ate twetaagira ki obujulizi obulala? Kubanga ffe ffennyini twewuliridde ngʼebigambo bino biva mu kamwa ke.”