Lukka 23:1-56 LGCB2014 - Bible AI

¹Awo Olukiiko lwonna ne lusituka, ne batwala Yesu ewa Piraato.

²Ne batandika okumuwawaabira nti, “Omuntu ono ajagalaza eggwanga lyaffe, ngʼatuziyiza okuwa Kayisaali omusolo, nga yeeyita Kristo, kabaka.”

³Piraato kwe kubuuza Yesu nti, “Ggwe kabaka wʼAbayudaaya?” Yesu nʼamuddamu nti, “Ggwe okyogedde.”

⁴Awo Piraato nʼakyukira bakabona abakulu nʼekibiina kyʼabantu nʼabagamba nti, “Siraba musango muntu ono gwʼazizza.”

⁵Naye ne beeyongera okulumiriza nga bagamba nti, “Asasamazza abantu nʼokuyigiriza kwe mu Buyudaaya mwonna. Yatandikira Ggaliraaya okutuukira ddala ne wano!”

⁶Piraato bwe yawulira ebyo kwe kubuuza nti, “Omuntu ono Mugaliraaya?”

⁷Bwe yategeera nga Yesu Mugaliraaya, nʼamuweereza eri Kerode, kubanga Ggaliraaya kyali kifugibwa Kerode, ate nga Kerode mu kiseera ekyo yali ali mu Yerusaalemi.

⁸Awo Kerode bwe yalaba Yesu, nʼasanyuka nnyo, kubanga yali atutte ekiseera kiwanvu ngʼayagala okulaba Yesu. Era okuva ku ebyo bye yali amuwuliddeko yasuubira ngʼajja kumulaba ngʼakolayo ekyamagero.

⁹Nʼamubuuza ebibuuzo bingi, naye Yesu nʼatamuddamu.

¹⁰Mu kiseera ekyo, bakabona abakulu, nʼabannyonnyozi bʼamateeka baali awo mu busungu obungi ne baleekaanira waggulu nga bamulumiriza.

¹¹Kerode nʼabaserikale be ne batandika okuduulira Yesu, nʼokumuvuma. Ne bamwambaza ekyambalo ekinekaaneka, ne bamuzzaayo ewa Piraato.

¹²Ku lunaku olwo lwennyini, Kerode ne Piraato, abaali bakyawaganye, ne bafuuka ba mukwano.

¹³Awo Piraato nʼakuŋŋaanya bakabona abakulu, nʼabakulembeze bʼAbayudaaya, nʼabantu,

¹⁴nʼabagamba nti, “Mwandeetedde omuntu ono nga mumuwawaabira nti Asasamaza abantu bajeeme. Mubuuzizza nnyo era ne neetegereza bulungi ensonga eyo nga nammwe we muli, naye ne nsanga nga talina musango ku ebyo bye mumuwawaabidde.

¹⁵Ne Kerode naye tamulabyeko musango era kyavudde amukomyawo gye tuli. Omuntu ono talina kyʼakoze kimusaanyiza kibonerezo kya kufa.

¹⁶Noolwekyo ŋŋenda mukangavvulamu, ndyoke mmusumulule.”

¹⁷Ku buli mbaga ya Kuyitako, Piraato ngʼateekwa okubateera omusibe omu,

¹⁸Ekibiina kyonna ne kireekaana nnyo nti, “Oyo mutte! Otuteere Balaba.”

¹⁹Balaba ono yali asibiddwa lwa kukulembera kasasamalo mu kibuga, era nʼolwʼobutemu.

²⁰Piraato olwʼokwagala okusumulula Yesu, nʼayongera okwogera nabo.

²¹Naye ne beeyongera okuleekaana nti, “Mukomerere ku musaalaba! Mukomerere ku musaalaba!”

²²Piraato nʼayogera nabo omulundi ogwokusatu nti, “Lwaki? Azzizza musango ki? Sirabye nsonga yonna emusaanyiza kibonerezo kya kufa. Noolwekyo ka mmukangavvule, ndyoke mmusumulule.”

²³Naye ne beeyongera nnyo okuleekaana, nʼokuwowoggana nga baagala Yesu akomererwe ku musaalaba. Era okuleekaana kwabwe ne kuwangula.

²⁴Awo Piraato nʼakola nga bwe baayagala.

²⁵Nʼasumulula Balaba, gwe baasaba eyali asibiddwa olwʼokusasamaza abantu nʼolwʼobutemu. Naye nʼabakwasa Yesu bagende bamukole nga bwe baagala.

²⁶Awo ne bafulumya Yesu okumutwala okumukomerera. Bwe baali bamutwala ne basanga omusajja Omukuleene erinnya lye Simooni, yali ava mu kyalo nga yaakayingira mu kibuga, ne bamuwaliriza okusitula omusaalaba gwa Yesu ku kibegabega kye; nʼagusitula nʼagutwala ngʼatambulira emabega wa Yesu.

²⁷Ekibiina kinene ne bagoberera Yesu nga mwe muli nʼabakazi abaali bamukaabira nga bwe bakuba ebiwoobe.

²⁸Naye Yesu nʼabakyukira nʼabagamba nti, “Abawala ba Yerusaalemi, temukaabira Nze, wabula mwekaabire era mukaabire nʼabaana bammwe.

²⁹Kubanga ekiseera kijja abakazi abatalina baana lwe baliyitibwa abʼomukisa ddala.

³⁰ⓤ Baligamba ensozi nti,

³⁰‘Mutugweko,’ nʼobusozi nti, ‘Mutuziike.’

³¹Kale, obanga bino babikola ku muti omubisi, naye ku mukalu kiriba kitya?”

³²Waaliwo nʼabasajja abalala babiri, bombi nga bamenyi ba mateeka, abaatwalibwa ne Yesu okuttibwa.

³³Awo bwe baatuuka mu kifo ekiyitibwa Ekiwanga, ne bamukomerera awo ku musaalaba, awamu nʼabamenyi bʼamateeka, omu ku ludda lwa Yesu olwa ddyo nʼomulala ku ludda olwa kkono.

³⁴Yesu nʼagamba nti, “Kitange, basonyiwe, kubanga kye bakola tebakimanyi.” Awo abaserikale ne bagabana ebyambalo bye nga babikubira akalulu.

³⁵Ekibiina ne kimutunuulira. Abakulembeze bʼAbayudaaya ne bamusekerera nga bagamba nti, “Yalokolanga balala, ka tulabe naye bwe yeerokola, obanga ye Kristo wa Katonda Omulonde we.”

³⁶Nʼabaserikale nabo ne bamuduulira ne bamuwa wayini omukaatuufu,

³⁷nga bagamba nti, “Obanga ggwe Kabaka wʼAbayudaaya, weerokole!”

³⁸Waggulu wʼomutwe gwa Yesu ku musaalaba kwateekebwako ekiwandiiko mu bigambo bino nti, “ONO YE KABAKA WʼABAYUDAAYA.”

³⁹Omu ku bamenyi bʼamateeka abaakomererwa naye nʼavuma Yesu ngʼagamba nti, “Si ggwe Kristo? Kale weerokole era naffe otulokole.”

⁴⁰Naye munne bwe baakomererwa nʼamunenya, nʼamugamba nti, “Nʼokutya totya Katonda, nga naawe oli ku kibonerezo kye kimu kya kufa?

⁴¹Ffe tuvunaaniddwa bya nsonga, kubanga ebikolwa byaffe bitusaanyiza kino. Naye ono talina kisobyo kyonna kyʼakoze.”

⁴²Nʼalyoka agamba nti, “Yesu, onzijukiranga bwʼolijja mu bwakabaka bwo.”

⁴³Yesu nʼamuddamu nti, “Ddala ddala nkugamba nti Olwa leero ojja kubeera nange mu Lusuku lwa Katonda.”

⁴⁴Awo obudde bwe bwatuuka essaawa omukaaga ezʼomu ttuntu, enzikiza nʼekwata ku nsi yonna, okutuusa ku ssaawa eyʼomwenda,

⁴⁵kubanga enjuba yalekeraawo okwaka. Amangwago eggigi lyʼomu Yeekaalu ne liyulikamu wabiri.

⁴⁶Awo Yesu nʼayogerera waggulu nʼeddoboozi eryʼomwanguka ngʼagamba nti, “Kitange, nteeka omwoyo gwange mu mikono gyo.” Bwe yamala okwogera ebigambo ebyo, nʼafa.

⁴⁷Omuserikale Omuruumi omukulu wʼekitongole eyakulembera abaserikale abaakomerera Yesu, bwe yalaba ebibaddewo, nʼatendereza Katonda ngʼagamba nti, “Mazima omuntu ono abadde mutuukirivu.”

⁴⁸Abantu bonna abaali bazze okwerolera, bwe baalaba ebibaddewo ne baddayo ewaabwe nga beekuba mu kifuba nga bajjudde ennaku nnyingi.

⁴⁹Mikwano gya Yesu, awamu nʼabakazi abajja naye nga bamugoberera okuviira ddala e Ggaliraaya, baali bayimiridde nga beesuddeko akabanga, nga batunuulira byonna ebibaddewo.

⁵⁰Laba waaliwo omusajja erinnya lye Yusufu, ngʼatuula mu Lukiiko Olukulu olwʼAbayudaaya, yali musajja mulungi era nga mutuukirivu,

⁵¹Teyakkirizaganya na banne mu ebyo bye baasalawo ku Yesu ne bye baakola. Yali wa mu kibuga Alimasaya ekyʼomu Buyudaaya. Yali ngʼalindirira nʼessuubi ddene okulaba obwakabaka bwa Katonda.

⁵²Omusajja ono nʼagenda eri Piraato nʼasabayo omulambo gwa Yesu.

⁵³Bwe yaguggya ku musaalaba, nʼaguzinga mu lugoye lwa linena olweru ennyo, nʼagugalamiza mu ntaana eyʼempuku eyali etemeddwa mu lwazi, era nga teziikibwangamu muntu.

⁵⁴Bino byonna byaliwo ku Lwakutaano, olunaku olwʼokweteekerateekerako ngʼenkeera ye Ssabbiiti.

⁵⁵Omulambo gwa Yesu bwe gwali gutwalibwa mu ntaana, abakazi abaava e Ggaliraaya ne bagoberera nga bavaako emabega, ne balaba entaana nʼomulambo gwe nga bwe gwagalamizibwamu.

⁵⁶Ne balyoka baddayo eka ne bategeka ebyakaloosa nʼamafuta agʼokusiiga omulambo gwa Yesu. Naye ne bawummula ku Ssabbiiti ngʼetteeka bwe liragira.