Lukka 24:1-53 LGCB2014 - Bible AI

¹Awo ku lunaku Lwassande[10], lwe lusooka mu wiiki, mu makya ennyo, abakazi ne baddira ebyakaloosa nʼamafuta, bye baali bategese, ne bagenda ku ntaana.

²Ne basanga ejjinja eryali liggadde omulyango oguyingira mu ntaana, nga liyiringisibbwa okudda wabbali.

³Bwe batyo ne bayingira mu ntaana, naye omulambo gwa Mukama waffe Yesu tebaagusangamu.

⁴Ne bayimirira awo nga babuliddwa ekyʼokukola. Amangwago, abasajja babiri ne balabika mu maaso gaabwe ngʼabambadde engoye ezimasamasa.

⁵Abakazi ne batya nnyo, ne bakutama ne batunula wansi, abasajja ne babagamba nti, “Lwaki omuntu omulamu mumunoonyeza mu ntaana?

⁶Taliiwo wano, azuukidde! Mujjukire bye yabagamba nga muli e Ggaliraaya nti,

⁷‘Omwana wʼOmuntu, ateekwa okuweebwayo mu mikono gyʼabantu ababi, bamukomerere ku musaalaba, naye nga ku lunaku olwokusatu alizuukira.’”

⁸Ne bajjukira ebigambo bye ebyo.

⁹Awo ne bayanguwa mangu ne bagenda, ne bategeeza abayigirizwa ekkumi nʼomu nʼabalala bonna, ebintu ebyo byonna. Bano be bakazi abaalaga ku ntaana, era ne bategeeza abayigirizwa ebintu ebyo:

¹⁰Maliyamu Magudaleene, ne Jowaana, ne Maliyamu nnyina Yakobo, nʼabalala. Ne bategeeza abatume ebintu ebyo.

¹¹Naye bye baababuulira nga biwulikika ngʼebitaliimu makulu, era tebaabikkiriza.

¹²Kyokka Peetero nʼadduka nʼalaga ku ntaana, nʼakutama nʼalingiza nʼalaba ngʼengoye za linena Yesu mwe yali azingiddwa ziri wabbali zokka nga njereere, nʼaddayo eka nga yeewuunya.

¹³Ku lunaku olwo lwennyini abasajja babiri, abamu ku abo abaagobereranga Yesu, baali batambula nga bagenda mu kabuga akayitibwa Emawu, akaali kilomita nga kkumi na bbiri okuva e Yerusaalemi.

¹⁴Baali bagenda boogera ku kufa kwa Yesu.

¹⁵Amangwago Yesu yennyini nʼabeegattako nʼatambula nabo.

¹⁶Kyokka tebaamutegeera, kubanga ekyo Katonda yali akibakisizza.

¹⁷Yesu nʼabagamba nti, “Biki bye munyumyako nga bwe mutambula mu kkubo?” Ne bayimirira ngʼamaaso gaabwe gajjudde ennaku.

¹⁸Omu ku bo, erinnya lye Kulyoppa nʼamuddamu nti, “Oli mugenyi mu Yerusaalemi atamanyi bya kitalo ebyaliwo mu wiiki eyise?”

¹⁹Yesu nʼababuuza nti, “Biki ebyo?” Ne baddamu nti, “Ebyagwa ku Yesu Omunnazaaleesi eyali omusajja Nnabbi owʼamaanyi mu bye yakolanga ne bye yayogeranga eyakola ebyamagero ebyewuunyisa, era yali Muyigiriza wa kitalo, mu maaso ga Katonda ne mu maaso gʼabantu bonna.

²⁰Naye bakabona abakulu nʼabakulembeze baffe baamukwata ne bamuwaayo nʼasalirwa omusango ogwʼokufa, ne bamukomerera ku musaalaba.

²¹Twali tusuubira nti, Ye Kristo anaalokola Isirayiri.

²²Ebyo nga bikyali awo, nga wayiseewo ennaku ssatu bukyanga bino bibaawo abamu ku bakazi bʼewaffe baatwewuunyisizza. Olwa leero baakedde ku ntaana,

²³naye omulambo gwe tebaagusanzeemu. Bwe baakomyewo baatugambye nti bayolesebbwa ba bamalayika abaabagambye nti Mulamu!

²⁴Abamu ku bannaffe abasajja nabo ne bagendayo mangu, nabo ne basanga ngʼomulambo gwa Yesu teguliimu mu ntaana, ngʼabakazi bwe baagambye.”

²⁵Yesu nʼabagamba nti, “Nga muli bantu basirusiru! Mmwe abʼemitima eminafu egirwawo okukkiriza bannabbi bye baategeeza!

²⁶Tekyagwanira Kristo okubonaabona mu bintu byonna nʼoluvannyuma alyoke ayingire mu kitiibwa kye?”

²⁷Nʼatandikira ku Musa nʼayitaayita mu bannabbi bonna ngʼagenda abannyonnyola Ebyawandiikibwa bye bimwogerako.

²⁸Bwe baasemberera akabuga we baali bagenda, Yesu nʼaba nga eyeeyongerayo,

²⁹naye ne bamuwaliriza asule ewaabwe kubanga nʼobudde bwali buwungedde. Nʼakkiriza, asigale.

³⁰Awo bwe yali ngʼalya nabo nʼaddira omugaati, ne yeebaza nʼagumenyamu, nʼabawa.

³¹Amangwago amaaso gaabwe ne gazibuka ne bamutegeera! Ate nʼababulako mu kaseera ako!

³²Ne batandika okwewuunaganya nga bagamba nti, “Emitima gyaffe tegyabuguumiridde bwe yabadde ayogera naffe mu kkubo ngʼatunnyonnyola Ebyawandiikibwa?”

³³Awo ne basituka mangu ne baddayo mu Yerusaalemi, ne basanga abayigirizwa ekkumi nʼomu ne bannaabwe abalala nga bakuŋŋaanye,

³⁴nga bagamba nti, “Ddala Mukama waffe azuukidde! Alabikidde Peetero!”

³⁵Ne bannyonnyola, nga Yesu bwe yabalabikira nga bali mu kkubo batambula, era nga bwe yategeerekeka gye bali ngʼamaze okumenya omugaati.

³⁶Awo bwe baali bakyayogera ebyo Yesu nʼayimirira mu makkati gaabwe nʼabalamusa nti, “Emirembe gibeere nammwe!”

³⁷Naye bonna ne bakankana nga batidde nnyo, nga balowooza nti Balaba muzimu!

³⁸Yesu nʼababuuza nti, “Lwaki mutidde bwe mutyo? Lwaki mubuusabuusa mu mitima gyammwe?

³⁹Mulaba ebibatu byange. Mutunule ne ku bigere byange! Kaakano mutegeere nga ye Nze kennyini. Munkwateko mukakasize ddala nti Siri muzimu, kubanga omuzimu tegubeera na mubiri na magumba nga Nze bye nnina.”

⁴⁰Bwe yali ngʼayogera nʼabalaga ebibatu bye nʼebigere bye.

⁴¹Naye nga bakyabuusabuusa kyokka nga balina essanyu era nga basamaaliridde nʼalyoka ababuuza nti, “Mulinawo wano ekyokulya?”

⁴²Ne bamuwa ekitundu kyʼekyennyanja ekyokye,

⁴³nʼakitoola nʼakiriira mu maaso gaabwe nga bamutunuulira!

⁴⁴Nʼabagamba nti, “Nabategeeza nga nkyali nammwe nti Ebintu byonna ebyampandiikibwako mu mateeka ga Musa, ne mu bya bannabbi, ne mu Zabbuli, byali biteekwa okutuukirira.”

⁴⁵Nʼalyoka asumulula emitima gyabwe, ne bategeera ebyawandiikibwa.

⁴⁶Nʼabagamba nti, “Kyawandiikibwa dda nnyo nti Kristo kimugwanira okubonaabona, nʼokufa era ku lunaku olwokusatu azuukire mu bafu.

⁴⁷Era mu linnya lye Enjiri eyʼokwenenya nʼokusonyiyibwa ebibi eribuulirwa amawanga gonna okutandikira mu Yerusaalemi.

⁴⁸Muli bajulirwa bʼebyo,

⁴⁹Laba mbaweereza ekisuubizo kya Kitange. Mubeere mu kibuga okutuusa lwe mulyambazibwa amaanyi agava mu ggulu.”

⁵⁰Awo Yesu nʼabakulembera ne balaga e Besaniya. Nʼayimusa emikono gye waggulu, nʼabawa omukisa.

⁵¹Bwe yali ngʼakyabawa omukisa, nʼabavaako, nʼasitulibwa, nʼatwalibwa mu ggulu.

⁵²Ne bamusinza, ne baddayo mu Yerusaalemi nga bajjudde essanyu lingi.

⁵³Ne babeeranga mu Yeekaalu bulijjo nga batendereza Katonda.