Lukka 4:1-44 LGCB2014 - Bible AI

¹Awo Yesu, ngʼajjudde Mwoyo Mutukuvu, nʼavaayo ku mugga Yoludaani, Omwoyo nʼamutwala mu ddungu,

²nʼakemebwa Setaani okumala ennaku amakumi ana. Ebbanga eryo lyonna yalimala nga talidde ku mmere, bwe lyaggwaako enjala nʼemuluma.

³Setaani nʼagamba Yesu nti, “Obanga oli, Mwana wa Katonda, gamba ejjinja lino lifuuke emmere.”

⁴Naye Yesu nʼamuddamu nti, “Kyawandiikibwa nti, ‘Omuntu taabenga mulamu lwa mmere yokka.’ ”

⁵Awo Setaani nʼamulinnyisa waggulu, mu kaseera katono nʼamulaga obwakabaka bwonna obwʼomu nsi.

⁶Setaani nʼamugamba nti, “Nzija kukuwa obuyinza ku obwo bwonna nʼekitiibwa kyabwo, kubanga bwonna bwa mpeebwa era nnyinza okubuwa omuntu yenna gwe njagala.

⁷Bwʼonoofukamira nʼonsinza byonna ebyo bijja kuba bibyo.”

⁸ⓓ Naye Yesu nʼaddamu nti, “Kyawandiikibwa nti, ‘Osinzanga Mukama Katonda wo, era gwʼoweerezanga yekka.’ ”

⁹Ate Setaani nʼamutwala mu Yerusaalemi, nʼamulinnyisa waggulu ku kasolya ka Yeekaalu awasingira ddala obutumbiivu, nʼamugamba nti, “Obanga oli Mwana wa Katonda, buuka weesuule wansi.

¹⁰Kubanga kyawandiikibwa nti,

¹⁰‘Katonda aliragira bamalayika be bakukuume.

¹¹ⓔ Era balikuwanirira mu mikono gyabwe, oleme okwerumya nga weekonye ekigere kyo ku jjinja.’ ”

¹²ⓕ Yesu nʼaddamu nti, “Kyawandiikibwa nti, ‘Tokemanga Mukama Katonda wo.’ ”

¹³Awo Setaani bwe yamaliriza okukema Yesu mu buli ngeri yonna, nʼamuviira okutuusa ekiseera ekirala.

¹⁴Awo Yesu nʼakomawo mu Ggaliraaya ngʼajjudde amaanyi aga Mwoyo Mutukuvu, nʼayogerwako mu bitundu byonna ebyetoolodde mu byalo.

¹⁵Nʼayigirizanga mu makuŋŋaaniro gaabwe, era bonna ne bamutendereza.

¹⁶Bwe yatuuka e Nazaaleesi, ekibuga mwe yakulira, nʼagenda mu kkuŋŋaaniro ku Ssabbiiti, nga bwe yali empisa ye. Nʼayimuka okusoma.

¹⁷Ne bamuwa ekitabo kya nnabbi Isaaya, nʼabikkula omuzingo gwʼempapula nʼalaba awagamba nti,

¹⁸ⓖ “Omwoyo wa Mukama ali ku nze. Anfuseeko amafuta okubuulira abaavu Enjiri. Antumye okubuulira abasibe okuteebwa, nʼabazibe bʼamaaso okuzibulwa amaaso balabe, nʼabanyigirizibwa okufuna eddembe,

¹⁹nʼokulangirira ekiseera kya Mukama ekyʼokulagiramu ekisa kye.”

²⁰Nʼazingako omuzingo nʼaguddiza omuweereza, nʼatuula. Abantu bonna mu kkuŋŋaaniro ne bamusimba amaaso.

²¹Nʼatandika okubategeeza nti, “Olwa leero, Ebyawandiikibwa bino bye muwulidde bituukiridde!”

²²Bonna abaaliwo ne bamutenda nga beewuunya ebigambo bye ebyekisa ebyava mu kamwa ke, nga bwe beebuuza nti, “Ono si ye mutabani wa Yusufu?”

²³Yesu nʼabagamba nti, “Ddala ddala muliyinza nʼokuŋŋamba mu lugero luno nti, ‘Omusawo, weewonye,’ nga mugamba nti, ‘Buli kye twawulira mu Kaperunawumu, kikolere na wano mu kyalo kyo.’ ”

²⁴Naye nʼabagamba nti, “Ddala ddala mbagamba nti, Tewali nnabbi ayanirizibwa mu kyalo kyʼewaabwe!

²⁵Naye mazima mbagamba nti, waaliwo bannamwandu bangi mu biseera bya nnabbi Eriya, mu Isirayiri enkuba bwe yamala emyaka esatu nʼekitundu nga tetonnya, nʼenjala nʼegwa mu nsi yonna.

²⁶Naye nnabbi Eriya teyatumibwa eri omu ku bannamwandu abo, wabula yatumibwa eri nnamwandu owʼe Zalefaasi mu Sidoni.

²⁷Ne mu biseera bya nnabbi Erisa waaliwo abagenge[2] bangi mu Isirayiri, naye tewali nʼomu ku bo eyalongoosebwa okuggyako Naamani Omusuuli.”

²⁸Bonna abaali mu kuŋŋaaniro ne bakwatibwa obusungu olwʼebigambo ebyo,

²⁹ne basituka, ne bamusindiikiriza okumutuusa ebweru wʼekibuga ku bbangabanga lyʼolusozi ekibuga kyabwe kwe kyazimbibwa, bamusindike agwe eri wansi.

³⁰Naye nʼabayitamu wakati ne yeetambulira.

³¹Awo Yesu nʼalaga e Kaperunawumu, ekibuga ekyʼe Ggaliraaya nʼabayigirizanga ku nnaku eza Ssabbiiti.

³²Ne beewuunya nnyo okuyigiriza kwe. Kubanga yayogeranga nga nnannyini buyinza.

³³Mu kkuŋŋaaniro, mwalimu omusajja eyaliko dayimooni nʼatandika okuwowoggana nti,

³⁴“Woowe! Otulanga ki, ggwe Yesu owʼe Nazaaleesi? Ozze kutuzikiriza? Nze nkumanyi, ggwe mutukuvu wa Katonda.”

³⁵Yesu nʼamuboggolera ngʼagamba nti, “Sirika! Muveeko!” Awo dayimooni nʼasuula eri omusajja wansi wakati mu bantu, nʼamuvaako nga tamulumizza.

³⁶Buli muntu nʼatya nnyo nga bwe beebuuzaganya nti, “Kigambo ki kino? Kubanga alagira nʼobuyinza nʼamaanyi emyoyo emibi ne giva mu muntu, ekireetera ne dayimooni okumugondera.”

³⁷Amawulire agakwata ku Yesu ne gabuna mu kitundu ekyo kyonna ekyetoolodde awo.

³⁸Awo Yesu bwe yava mu kkuŋŋaaniro, nʼalaga mu maka ga Simooni. Yasanga nnyina mukazi wa Simooni omusujja gumuluma nnyo, abantu ne bamwegayiririra ku lulwe.

³⁹Yesu nʼayimirira okumpi nʼomulwadde we yali, nʼalagira omusujja gumuwoneko, amangwago omulwadde nʼawona, nʼasituka nʼabaweereza!

⁴⁰Obudde bwe bwali buwungeera, abantu bonna abaalina abalwadde abʼendwadde eza buli ngeri, ne babaleeta eri Yesu, nʼabassaako emikono buli omu nʼamuwonya.

⁴¹Abamu baaliko baddayimooni, Yesu nʼabalagira ne bava ku balwadde nga bwe baleekaana nti, “Ggwe Mwana wa Katonda.” Naye kubanga baamumanya nga ye Kristo, nʼatabaganya kukyogerako.

⁴²Bwe bwakya Yesu nʼalaga mu kifo etali bantu. Ekibiina kyʼabantu ne bamunoonya, okutuusa lwe baamulaba ne balaga gyʼali ne bamwegayirira aleme kubavaako.

⁴³Naye nʼabaddamu nti, “Kinsaanira okubuulira Enjiri yʼobwakabaka bwa Katonda ne mu bifo ebirala kubanga eyo yʼensonga kyenava ntumibwa.”

⁴⁴Yesu ne yeeyongera okubuulira mu makuŋŋaaniro gaabwe mu Buyudaaya.