Lukka 5:1-39 LGCB2014 - Bible AI

¹Awo Yesu yali ayimiridde ku lubalama lwʼennyanja yʼe Genesaleeti[3] ngʼayigiriza, ebibiina nga bamunyigiriza nga bawuliriza ekigambo kya Katonda,

²nʼalengera amaato abiri ameereere nga gali kumpi nʼolukalu, nga bannannyinigo abavubi, bagalese awo, nga bayoza obutimba bwabwe.

³Yesu nʼalinnya mu lyato erimu eryali erya Simooni, nʼamusaba alisembezeeko katono mu nnyanja, nʼalituulamu, asinziire omwo okuyigiriza ebibiina.

⁴Bwe yamala okuyigiriza nʼagamba Simooni nti, “Kale kaakano sembeza eryato lyo ebuziba, mu mazzi amangi, musuule obutimba bwammwe mu nnyanja, mujja kukwasa ebyennyanja bingi!”

⁵Simooni nʼaddamu nti, “Mukama waffe, twateganye dda ekiro kyonna, naye ne tutakwasa kantu. Naye ggwe nga bwʼotugambye, nzija kusuula obutimba.”

⁶Awo bwe baakola bwe batyo, obutimba bwabwe bwajjula ebyennyanja, ne butandika nʼokukutuka.

⁷Ne bawenya ku bannaabwe abaali mu lyato liri eddala bajje babayambe, ne bajja, amaato gombi ne gajjula ebyennyanja, ne gajula nʼokusaanawo.

⁸Awo Simooni Peetero bwe yakiraba, nʼafukamira mu maaso ga Yesu nʼamugamba nti, “Mukama wange, nkwegayiridde ndeka, kubanga ndi mwonoonyi nnyo.”

⁹Kubanga obungi bwʼebyennyanja bye baakwasa bwa muwuniikirizza nnyo awamu ne banne bwe baavubanga,

¹⁰Yakobo ne Yokaana abaana ba Zebbedaayo.

¹⁰Yesu nʼamuddamu nti, “Totya! Okuva kaakano ojjanga kuvuba myoyo gya bantu.”

¹¹Amaato gaabwe olwagoba ku lubalama ne baleka awo byonna ne bagenda naye.

¹²Mu kibuga Yesu mwe yali akyadde mwalimu omusajja eyali alwadde ebigenge. Bwe yalaba Yesu nʼavuunama mu maaso ge, nʼamwegayirira nti, “Mukama wange, bwʼoba ngʼoyagala, oyinza okunnongoosa.”

¹³Yesu nʼagolola omukono gwe nʼamukwatako, ngʼagamba nti, “Njagala, longooka.” Amangwago ebigenge byʼomusajja ne bimuwonako.

¹⁴Yesu nʼalagira omusajja nti, “Tobaako muntu nʼomu gwʼogamba, naye genda weeyanjule eri kabona oweeyo ekiweebwayo olwʼokulongosebwa nga Musa bwe yalagira, kibeere obujulirwa gye bali.”

¹⁵Naye ne yeeyongera bweyongezi okubunya ettutumu lyʼobuyinza bwa Yesu era ebibiina binene ne bikuŋŋaana okumuwulira nʼokuwonyezebwa endwadde zaabwe.

¹⁶Naye bwe yasalangawo akabanga, ne yeeyawula nʼalagako mu bifo eteri bantu, okusaba.

¹⁷Lwali lumu Yesu yali ayigiriza abakulembeze bʼAbayudaaya, nʼabannyonnyozi bʼamateeka nabo nga batudde awo, abaali bavudde mu buli kyalo ekyʼe Ggaliraaya ne Buyudaaya era nʼe Yerusaalemi. Amaanyi ga Mukama gaali ku ye okuwonya.

¹⁸Awo abasajja ne bajja nga basitudde omusajja ku katanda eyali akoozimbye. Ne bagezaako okumuyingiza okumuleeta Yesu we yali.

¹⁹Naye bwe bataasobola kumuyingiza olwʼekibiina ekinene ne balinnya waggulu ku kasolya, ne baggyawo ku mategula ne bayisaamu omulwadde ne bamussa ngʼagalamidde ku katanda ke ne baamutereereza ddala mu maaso ga Yesu.

²⁰Awo Yesu bwe yalaba okukkiriza kwabwe, nʼagamba omusajja akoozimbye nti, “Omusajja, ebibi byo bikusonyiyiddwa.”

²¹Abafalisaayo nʼabannyonnyozi bʼamateeka ne beebuuzaganya nti, “Ono ye ani avvoola! Ani ayinza okusonyiwa ebibi wabula Katonda yekka?”

²²Nate Yesu bwe yamanya ebirowoozo byabwe, nʼababuuza nti, “Lwaki mulowooza bwe mutyo mu mutima gwammwe?

²³Ekyangu kye kiri wa? Okwogera nti ebibi byo bikusonyiyiddwa oba nti situka otambule?

²⁴Naye mulyoke mutegeere nti, Omwana wʼOmuntu alina obuyinza ku nsi okusonyiwa ebibi.” Nʼagamba eyali akozimbye nti, “Situka, ositule akatanda ko, weddireyo ewuwo.”

²⁵Amangwago omusajja nʼasituka nʼasitula akatanda kwe yali agalamidde, nʼaddayo ewuwe ngʼagulumiza Katonda.

²⁶Abantu bonna ne bajjula encukwe. Ne bagulumiza Katonda nga bajjudde entiisa nga boogera nti, “Tulabye ebyewuunyisa leero.”

²⁷Oluvannyuma lwʼebyo Yesu nʼavaayo nʼalaba omusolooza wʼomusolo, erinnya lye Leevi ngʼatudde omusolo we gukuŋŋaanyizibwa, nʼamugamba nti, “Ngoberera.”

²⁸Leevi nʼaleka awo byonna, nʼasitukiramu nʼamugoberera.

²⁹Awo Leevi nʼafumbira Yesu ekijjulo ekyʼamaanyi mu maka ge. Waaliwo abasolooza banne abʼomusolo bangi, nʼabantu abalala bangi, abaali ku kijjulo ekyo.

³⁰Naye Abafalisaayo nʼabannyonnyozi bʼamateeka ne beemulugunya, olwʼabayigirizwa be nga bagamba nti, “Lwaki mulya era ne munywa nʼabasolooza bʼomusolo nʼabalina ebibi?”

³¹Yesu nʼabaanukula nti, “Abalwadde be beetaaga omusawo, so si abo abatali balwadde.

³²Sajja kuyita batuukirivu wabula abalina ebibi okwenenya.”

³³Kyokka ne bamugamba nti, “Abayigirizwa ba Yokaana batera okusiiba nʼokusaba. Nʼabayigirizwa bʼAbafalisaayo nabo bwe batyo. Naye ababo balya ne banywa.”

³⁴Naye Yesu nʼabagamba nti, “Abagenyi bayinza okusiiba ngʼawasizza omugole akyali nabo?

³⁵Naye ekiseera kijja, awasizza omugole ngʼabaggiddwako olwo ne balyoka basiiba.”

³⁶Awo Yesu nʼabagerera olugero nti, “Tewali ayuza kiwero mu lugoye oluggya alyoke azibise ekituli mu lugoye olukadde. Bwʼakikola, ekiwero ekiggya kiyuza olukadde, nʼekiwero ekiggya tekijja kugendera wamu na lugoye olukadde.

³⁷Era tewali ateeka wayini omusu mu nsawo enkadde ezʼamaliba ga wayini, kubanga wayini omusu ajja kuziyuza ayiike.

³⁸Naye wayini omusu ateekebwa mu nsawo za maliba empya.

³⁹Era tewali anywa ku wayini omukadde ate ayagala okunywa ku wayini omusu. Kubanga agamba nti, ‘Omukadde ye asinga omusu.’ ”