Lukka 6:1-49 LGCB2014 - Bible AI

¹Awo ku lunaku lumu olwa Ssabbiiti, Yesu nʼabayigirizwa be bwe baali bayita mu nnimiro yʼemmere eyʼempeke, abayigirizwa be ne banoga ku birimba byʼemmere eyʼempeke ne babikunya mu ngalo zaabwe, ne balya.

²Naye Abafalisaayo abamu ne bagamba nti, “Lwaki mukola ekitakkirizibwa ku Ssabbiiti?”

³Yesu nʼabaddamu nti, “Temusomanga ku Dawudi kye yakola, enjala bwe yamuluma nʼabo be yali nabo?

⁴Yayingira mu nnyumba ya Katonda, nʼaddira emigaati egyʼokulaga, nʼatoola nʼalyako, nʼawaako ne be yali nabo ne balya so ngʼekyo kyali tekikkirizibwa muntu yenna okuggyako bakabona.”

⁵Nʼabagamba nti, “Omwana wʼOmuntu, ye Mukama wa Ssabbiiti.”

⁶Ku lunaku lwa Ssabbiiti olulala Yesu yali ngʼayigiriza mu kkuŋŋaaniro nga mulimu nʼomusajja eyalina omukono ogukaze.

⁷Abannyonnyozi bʼamateeka nʼAbafalisaayo ne bamusimbako amaaso okulaba obanga anaawonya ku Ssabbiiti, babeeko nʼekintu kye baneekwasa bamuvunaane omusango.

⁸Naye Yesu nʼategeera ebirowoozo byabwe. Nʼagamba omusajja eyalina omukono ogukaze nti, “Situka oyimirire wakati wano.” Nʼasituka nʼayimirira.

⁹Yesu nʼalyoka agamba Abafalisaayo nʼabannyonnyozi bʼamateeka nti, “Muleke mbabuuze; Kirungi okukola ekirungi ku Ssabbiiti oba okukola ekibi? Kirungi okuwonya obulamu oba okubuzikiriza?”

¹⁰Nʼabeetoolooza amaaso kinnoomu, nʼalyoka agamba omusajja nti, “Golola omukono gwo.” Omusajja nʼagolola omukono gwe ne guwona.

¹¹Naye ne bajjula obusungu, ne boogera bokka ne bokka kye banaakola Yesu.

¹²Awo olwatuuka mu nnaku ezo, Yesu nʼalinnya waggulu ku lusozi okusaba, nʼasaba ekiro kyonna eri Katonda.

¹³Obudde bwe bwakya, nʼayita abayigirizwa be nʼabalondako kkumi nʼababiri, nʼabafuula abatume. Amannya gaabwe ge gano:

¹⁴Simooni, gwe yatuuma Peetero, ne Andereya, muganda wa Simooni, ne Yakobo, ne Yokaana, ne Firipo, ne Battolomaayo,

¹⁵ne Matayo, ne Tomasi, ne Yakobo, omwana wa Alufaayo, ne Simooni, owʼomu kibiina kyʼobufuzi ekyʼAbazerote,[4]

¹⁶ne Yuda, omwana wa Yakobo, ne Yuda Isukalyoti, oluvannyuma eyamulyamu olukwe.

¹⁷Awo Yesu bwe yava ku lusozi awamu nabo, nʼayimirira wansi wʼolusozi mu lusenyi awatereevu, ekibiina kinene ekyʼabayigirizwa be, nʼekibiina kinene ekyʼabantu abaava mu Buyudaaya yonna ne Yerusaalemi nʼebitundu ebyʼoku lubalama lwʼennyanja olwa Ttuulo ne Sidoni,

¹⁸ne bajja okumuwuliriza nʼokuwonyezebwa endwadde zaabwe. Abo abaali batawaanyizibwa emyoyo emibi ne bawonyezebwa;

¹⁹era abantu bonna ne bafuba okumukwatako, kubanga amaanyi agawonya gaamuvangamu nga gawonya buli muntu.

²⁰Awo Yesu nʼatunuulira abayigirizwa be enkaliriza nʼagamba nti, “Mulina omukisa abaavu, kubanga obwakabaka bwa Katonda bwammwe.

²¹Mulina omukisa abalumwa enjala kaakano, kubanga mulikkusibwa. Mulina omukisa abakaaba kaakano, kubanga muliseka.

²²Mulina omukisa bwe babakyawa, ne babeewala, ne babavuma, ne basiiga erinnya lyammwe enziro, olwʼOmwana wʼOmuntu.”

²³“Musanyukanga ku lunaku olwo ne mujaguza, kubanga empeera yammwe nnene mu ggulu, kubanga ebintu ebyo bajjajjammwe baabikola bannabbi abaabasooka.

²⁴Naye zibasanze mmwe abagagga, kubanga mufunye essanyu lyammwe erijjuvu.

²⁵Zibasanze mmwe abalya ne mukkuta kaakano, kubanga mulirumwa enjala. Zibasanze mmwe abaseka kaakano, kubanga mulikungubaga, ne mukaaba.

²⁶Zibasanze mmwe abantu bonna bwe babawaana, kubanga bwe batyo bajjajjammwe bwe baayisa bannabbi aboobulimba.”

²⁷“Naye mmwe abampuliriza mbagamba nti Mwagalenga abalabe bammwe, nʼababakyawa mubayisenga bulungi.

²⁸Ababakolimira mubasabirenga omukisa; ababayisa obubi mubasabirenga.”

²⁹“Omuntu bwʼakukubanga oluyi ku luba olumu, omukyusizanga nʼakukuba ne ku lwokubiri! Omuntu bwʼakunyagangako ekkooti yo, nʼessaati yo ogimulekeranga.

³⁰Omuntu yenna akusabanga omuwanga; era nʼoyo akuggyangako ebintu byo tobimusabanga kubikuddizza.

³¹Kye mwagala abantu okubakolera mmwe, nammwe mubakolerenga bwe mutyo.”

³²“Bwe munaayagalanga abo ababaagala bokka, munaagasibwa ki? Kubanga nʼabakozi bʼebibi bwe beeyisa bwe batyo.

³³Bwe munaayisanga obulungi abo bokka ababayisa obulungi, munaagasibwa ki? Kubanga nʼabakozi bʼebibi bwe bakola bwe batyo.

³⁴Bwe munaawolanga abo bokka be musuubira okubasasula mmwe, munaagasibwangamu ki? Kubanga nʼabakozi bʼebibi bawola bakozi ba bibi bannaabwe, basobole okusasulwa omuwendo gwe gumu.

³⁵Naye mmwe mwagalenga abalabe bammwe! Mubayisenga bulungi! Muwolenga nga temusuubira kusasulwa magoba. Bwʼetyo empeera yammwe eriba nnene era muliba baana bʼoyo Ali Waggulu Ennyo. Kubanga wa kisa eri abatasiima nʼabakozi bʼebibi.

³⁶Mubeerenga ba kisa nga Kitammwe bwʼali owʼekisa.”

³⁷“Temusalanga musango, nammwe muleme kusalirwa. Temusingisanga musango, nammwe muleme okusingibwa. Musonyiwenga era nammwe mulisonyiyibwa.

³⁸Mugabenga nammwe muliweebwa. Ekigera ekirungi ekikattiddwa, ekisuukundiddwa, ekyʼomuyiika kiribakwasibwa. Kubanga ekigera kye mugereramu nammwe mwe muligererwa.”

³⁹Awo Yesu nʼabagerera olugero luno nti, “Ddala ddala omuzibe wʼamaaso ayinza okukulembera muzibe munne? Bombi tebajja kugwa mu kinnya?

⁴⁰Omuyizi tasaana kusinga amuyigiriza, kyokka bwʼaba ngʼatendekeddwa bulungi, buli muntu aliba ngʼomusomesa we.”

⁴¹“Lwaki otunuulira akasasiro akali ku liiso lya muganda wo, naye nʼotolaba kisiki kiri ku liiso lyo?

⁴²Oyinza otya okugamba muganda wo nti, ‘Muganda wange, leka nkuggyeko akasasiro akali ku liiso lyo,’ naye nga ekisiki ekiri ku liryo tokiraba? Munnanfuusi ggwe! Sooka oggyeko ekisiki ku liiso lyo, olyoke olabe bulungi olwo oggyeko akasasiro akali ku liiso lya muganda wo.”

⁴³“Omuti omulungi tegubala bibala bibi, so nʼomuti omubi tegubala bibala birungi.

⁴⁴Buli muti gutegeererwa ku bibala byagwo. Abantu tebanoga ttiini ku busaana so tebanoga mizabbibu ku mweramannyo.

⁴⁵Omuntu omulungi afulumya ebirungi okuva mu mutima gwe omulungi, nʼomuntu omubi afulumya ebibi okuva mu mutima gwe omubi. Kubanga akamwa kʼomuntu koogera ku biba bijjudde mu mutima gwe.”

⁴⁶“Lwaki mumpita nti, ‘Mukama waffe, Mukama waffe,’ so nga bye mbagamba si bye mukola?

⁴⁷Buli ajja gye ndi nʼawulira ebigambo byange, nʼabikola, ka mbalage bwʼafaanana.

⁴⁸Afaanana ngʼomuntu eyazimba ennyumba, eyasima omusingi wansi ennyo nʼatuuka ku lwazi. Amataba bwe gajja, ne gajjuza omugga tegaasobola kunyeenya nnyumba eyo kubanga yazimbibwa bulungi.

⁴⁹Naye omuntu awuliriza ebigambo byange nʼatabikola, afaanana nʼomusajja eyazimba ennyumba ku ttaka nga tasimye musingi. Omugga bwe gwajjula, ne gwanjaala, ne gukuba ennyumba nʼegwa, era nʼokugwa kwʼennyumba eyo kwali kunene nnyo.”