Lukka 7:1-50 LGCB2014 - Bible AI

¹Awo Yesu bwe yamala okutegeeza abantu ebigambo ebyo byonna nʼayingira mu Kaperunawumu.

²Mu kiseera ekyo, omukulu wʼekitongole kyʼabaserikale ekikumi, yalina omuddu we gwe yali ayagala ennyo, yali mulwadde nnyo ngʼali kumpi nʼokufa.

³Omukulu wʼekitongole oyo bwe yawulira ebifa ku Yesu, nʼatuma abamu ku bakulembeze bʼAbayudaaya eri Yesu bamusabe ajje awonye omuddu we.

⁴Bwe baatuuka eri Yesu ne bamwegayirira nnyo nga bagamba nti, “Omusajja ono asaanira okuyambibwa nga bwʼakusabye,

⁵kubanga ayagala nnyo eggwanga lyaffe, era ye yatuzimbira ne kkuŋŋaaniro lyaffe!”

⁶Bwʼatyo Yesu nʼagenda nabo.

⁶Naye Yesu bwe yali akyali mu kkubo nga tannatuuka ku nnyumba, omukulu wʼekitongole nʼatuma mikwano gye eri Yesu ngʼagamba nti, “Mukama wange, teweeteganya bwʼotyo, kubanga nze sisaanira kukusembeza mu nju yange.

⁷Era kyenavudde nnema okujja gyʼoli nze nzennyini. Naye yogera bwogezi kigambo, omuweereza wange anaawona!

⁸Kubanga nange nnina abakulu abantwala, ate waliwo nʼabali wansi wange be nninako obuyinza. Bwe ŋŋamba ono nti, ‘Genda,’ agenda, nʼoli nti, ‘Jjangu,’ ajja; nʼomuddu wange nti, ‘Kola kino,’ akikola.”

⁹Yesu bwe yawulira ebigambo ebyo nʼamwewuunya nnyo, nʼakyukira ekibiina kyʼabantu abaali bamugoberera nʼagamba nti, “Mbagamba nti Sirabanga kukkiriza kunene nga kuno, wadde mu Isirayiri.”

¹⁰Awo omukulu wʼekitongole be yatuma eri Yesu bwe baddayo mu nnyumba ye, baasanga omuddu awonye.

¹¹Awo ku lunaku olwaddirira, Yesu nʼagenda nʼabayigirizwa be nʼekibiina kinene ne kimugoberera mu kibuga ekiyitibwa Nayini.

¹²Bwe yali asemberera omulyango gwʼekibuga, laba, abantu ne bafuluma mu kibuga nga beettisse omulambo gwʼomuvubuka eyali mutabani wʼomukazi nnamwandu, ate nga ye mwana we yekka. Ekibiina kyʼabantu abaali bava mu kibuga baali bangi nnyo.

¹³Awo Mukama waffe bwe yalaba nnamwandu nʼamusaasira, nʼamugamba nti, “Tokaaba.”

¹⁴Nʼasemberera essanduuko, abaali bagisitudde ne bayimirira, Yesu nʼayogera nti, “Omuvubuka, nkulagira nti Ggolokoka!”

¹⁵Eyali afudde nʼatuula era nʼatandika okwogera. Yesu nʼamuddiza nnyina.

¹⁶Buli omu nʼajjula entiisa, ne batendereza Katonda nga bagamba nti, “Nnabbi owʼamaanyi atulabikidde, era Katonda akyalidde abantu be.”

¹⁷Ebigambo ebyo ne bibuna Buyudaaya yonna nʼokwetooloola emiriraano gyayo.

¹⁸Awo abayigirizwa ba Yokaana Omubatiza ne bategeeza Yokaana ebintu ebyo ebyo. Yokaana nʼayita abayigirizwa be babiri,

¹⁹nʼabatuma eri Mukama waffe okumubuuza nti, “Ggwe wuuyo gwe tusuubira okujja, oba tulindirirayo omulala?”

²⁰Abayigirizwa ba Yokaana bwe baatuuka eri Yesu, ne bamutegeeza nti, “Yokaana Omubatiza atutumye okukubuuza nti, Ggwe wuuyo ajja oba tulindirirayo omulala?”

²¹Mu kiseera ekyo Yesu nʼawonya endwadde nnyingi eza buli ngeri: nʼabalema, nʼabaaliko emyoyo emibi, nʼazibula nʼabazibe bʼamaaso.

²²Abaatumibwa nʼabaddamu nti, “Muddeeyo eri Yokaana mumutegeeze byonna bye muwulidde ne bye mulabye. Abazibe bʼamaaso bazibulwa amaaso ne balaba, nʼabalema batambula, nʼabagenge[5] balongoosebwa, nʼabaggavu bʼamatu gagguka ne bawulira, nʼabafu bazuukizibwa, era nʼabaavu babuulirwa Enjiri.

²³Era alina omukisa oyo atanneesittalako.”

²⁴Awo ababaka ba Yokaana bwe baagenda, Yesu nʼabuulira ekibiina ebikwata ku Yokaana. Nʼababuuza nti, “Bwe mwagenda mu ddungu, mwagenda kulabayo ki? Olumuli olunyeenyezebwa nʼempewo?

²⁵Naye mwagenderera kulaba ki? Omusajja ayambadde engoye ezinekaaneka? Laba abambadde engoye ezinekaaneka, nga babeera mu bulamu bwa kikungu era babeera mu mbiri.

²⁶Naye mwagenderera kulaba ki? Nnabbi? Weewaawo mbagamba nti asingira ddala nnabbi.

²⁷ⓗ Yʼoyo ebyawandiikibwa gwe byogerako nti,

²⁷‘Laba, ntuma omubaka wange okukukulembera, yʼalikuteekerateekera ekkubo lyo mu maaso go.’ ”

²⁸“Mbagamba nti, mu bantu bonna abaali bazaaliddwa abakazi, tewali mukulu wa kitiibwa kukira Yokaana, naye ate oyo asembayo mu bwakabaka bwa Katonda asinga Yokaana ekitiibwa.”

²⁹Abantu bonna, awamu nʼabasolooza bʼomusolo, bwe baawulira ebigambo bya Yesu ebyo, ne batendereza Katonda, kubanga baali babatiziddwa mu kubatizibwa kwa Yokaana.

³⁰Naye Abafalisaayo nʼabayigiriza bʼamateeka ne bagaana ebyo Katonda bye yabategekera, kubanga tebaabatizibwa Yokaana.

³¹Awo Yesu nʼabuuza nti, “Abantu abʼomulembe guno mbageraageranye na ki? Bafaanana batya?

³²Bafaanana nʼabaana abatudde mu katale nga bazannya emizannyo gyabwe, nga bagambagana nti,

³²‘Bwe twabafuuyira omulere, temwazina, Bwe twayimba oluyimba olwʼokukungubaga, temwakungubaga.’

³³Kubanga Yokaana Omubatiza bwe yajja teyalyanga mmere wadde okunywa omwenge, ne mugamba nti, ‘Aliko dayimooni!’

³⁴Omwana wʼOmuntu azze ngʼalya emmere era ngʼanywa ne mugamba nti, ‘Laba wa mululu era mutamiivu, mukwano gwʼabasolooza ba musolo nʼabalina ebibi!’

³⁵Naye amagezi gaweebwa obutuukirivu olwʼabaana baago bonna.”

³⁶Awo omu ku Bafalisaayo nʼayita Yesu ku kijjulo, Yesu nʼayingira mu nnyumba, nʼatuula ku mmeeza.

³⁷Awo omukazi owʼomu kibuga ekyo nga mwonoonyi, eyali ategedde nga Yesu ali mu nju eyo eyʼOmufalisaayo, nʼaleeta eccupa yʼamafuta agʼakaloosa.

³⁸Nʼayimirira awali Yesu, nʼakaaba, amaziga ne gatonnya ku bigere bya Yesu ne bitoba. Omukazi nʼabisiimuuza enviiri ze, era nʼabinywegera; nʼabifukako amafuta agʼakaloosa.

³⁹Naye Omufalisaayo eyayita Yesu, ebyo bwe yabiraba, nʼagamba munda ye nti, “Singa omuntu ono abadde nnabbi, yanditegedde omukazi amukwatako kyali era nga bwʼali omwonoonyi!”

⁴⁰Awo Yesu nʼamugamba nti, “Simooni, nnina kye njagala okukubuulira.” Simooni nʼaddamu nti, “Omuyigiriza, mbuulira.”

⁴¹“Waaliwo abantu babiri, omuwozi wʼensimbi be yali abanja. Omu yali amubanja ddinaali ebikumi bitaano, nʼomulala ddinaali amakumi ataano.

⁴²Naye ku bombi nga tekuliiko asobola kusasula bbanja lye. Eyali ababanja kwe kubasonyiwa. Kale, ku bombi aluwa alisinga okumwagala?”

⁴³Simooni nʼaddamu nti, “Ndowooza oyo gwe yasonyiwa ebbanja erisingako obunene.” Yesu nʼamugamba nti, “Olamudde bulungi.”

⁴⁴Nʼalyoka akyukira omukazi nʼagamba Simooni nti, “Omukazi ono omulaba? Bwe nayingidde mu nnyumba yo, tewampadde mazzi ga kunaaba ku bigere byange. Naye abinaazizza nʼamaziga ge nʼabisiimuula nʼenviiri ze.

⁴⁵Tewannyanirizza na kunnywegera, naye anywegedde ebigere byange emirundi mingi okuva lwe nayingidde.

⁴⁶Tewansiize mafuta ku mutwe gwange, naye ye asiize ebigere byange amafuta agʼakaloosa.

⁴⁷Noolwekyo nkutegeeza nti Omukazi ono asonyiyiddwa ebibi bye ebingi kubanga okwagala kwe kungi, naye oyo asonyiyibwa ebitono nʼokwagala kwe kuba kutono.”

⁴⁸Awo Yesu nʼagamba omukazi nti, “Osonyiyiddwa ebibi byo.”

⁴⁹Abo abaali ne Yesu ku mmeza ne beebuuzaganya nti, “Ono ye ani asonyiwa nʼebibi?”

⁵⁰Yesu nʼagamba omukazi nti, “Okukkiriza kwo kukulokodde, genda mirembe.”