Lukka 8:1-56 LGCB2014 - Bible AI

¹Oluvannyuma lwʼebyo Yesu nʼagenda ngʼakyalira ebibuga ebinene nʼebitono ngʼabuulira Enjiri yʼobwakabaka bwa Katonda, nʼabayigirizwa be ekkumi nʼababiri nga bali naye.

²Waaliwo nʼabakazi Yesu be yali agobyeko emyoyo emibi ne be yali awonyezza endwadde. Mu bo mwe mwali ne Maliyamu eyayitibwanga Magudaleene gwe yagobako baddayimooni omusanvu,

³ne Jowaana muka Kuza eyali omukulu wʼolubiri lwa Kerode; ne Susaana, nʼabalala bangi, abaatoolanga ku byabwe ne balabirira Yesu nʼabayigirizwa be.

⁴Awo ekibiina kinene bwe kyali kikuŋŋaana, nga nʼabantu abava mu buli kibuga bajja eri Yesu, Yesu nʼabagerera olugero luno nti,

⁵“Omulimi yagenda mu nnimiro ye okusiga ensigo. Bwe yatandika okusiga ensigo, ezimu ne zigwa ku mabbali gʼekkubo ne bazirinnyirira, nʼebinyonyi ebyʼomu bbanga ne bizirya.

⁶Ensigo endala zaagwa ku lwazi, bwe zaamera ne zikala kubanga tezaalina mazzi.

⁷Ensigo endala zaagwa mu maggwa, bwe zaamera nʼamaggwa nago ne gakula ne gazizisa.

⁸Naye ensigo endala nʼazisiga mu ttaka eddungi, ne zikula ne zibala ebibala emirundi kikumi.” Nʼamaliriza ngʼagamba nti, “Alina amatu okuwulira awulire.”

⁹Abayigirizwa be ne bamubuuza amakulu gʼolugero olwo.

¹⁰ⓘ Nʼabaddamu nti, “Mmwe muweereddwa omukisa okumanya ebyama byʼobwakabaka bwa Katonda, naye abalala, njogera gye bali mu ngero,

¹⁰‘bwe batunula baleme kulaba, bwe bawulira baleme kutegeera.’

¹¹“Kale, amakulu gʼolugero olwo ge gano: Ensigo kyʼekigambo kya Katonda.

¹²Ensigo ezaagwa ku mabbali gʼekkubo, be bawulira ekigambo, naye Setaani nʼajja nʼakibaggyako mu mutima gwabwe, si kulwa nga bakkiriza ne balokolebwa.

¹³Ezaagwa ku lwazi be bawulira ne basanyukira ekigambo, kyokka ne kitaba na mizzi. Be bakkiriza, naye okugezesebwa bwe kujja ne bagwa.

¹⁴Ezaagwa mu maggwa, be bawulira ekigambo, naye okweraliikirira nʼobugagga nʼamasanyu gʼomu bulamu ne bibazisa, ne bataleeta bibala bikuze bulungi.

¹⁵Naye ezaagwa ku ttaka eddungi be bantu abalungi era abeesigwa, era bakuuma ekigambo ku mitima ne babala ebibala nʼobugumiikiriza.

¹⁶“Tewali muntu akoleeza ttaala ate nagisaanikirako akalobo oba nʼagissa wansi wʼekitanda. Agiwanika waggulu ku kikondo, olwo lwʼesobola okumulisiza abantu abayingira.

¹⁷Kubanga tewali kintu na kimu ekyakwekebwa ekitalikwekulwa, era tewali na kimu ekitalimanyibwa mu Lwatu.

¹⁸Noolwekyo mwegendereze nga muwuliriza, kubanga oyo alina alyongerwako; naye oyo atalina, nʼekyo kyʼalowooza nti alina kigenda kumuggyibwako.”

¹⁹Awo nnyina ne baganda ba Yesu ne bajja okumulaba, naye ne batasobola kumutuukako olwʼekibiina kyʼabantu ekinene.

²⁰Ne wabaawo amubuulira nti, “Nnyoko ne baganda bo obwedda bayimiridde wabweru, baagala kukulabako.”

²¹Yesu nʼaddamu nti, “Mmange ne baganda bange be bano abawulira ekigambo kya Katonda ne bakigondera.”

²²Lwali lumu Yesu nʼalinnya mu lyato nʼabayigirizwa be, nʼabagamba nti, “Tuwunguke tugende emitala wʼennyanja.” Ne basimbula okugenda.

²³Bwe baali baseeyeeya Yesu ne yeebaka. Awo omuyaga ogwʼamaanyi ne gukunta ku nnyanja, nʼeryato ne liyuuga nnyo, ne baba mu kabi kanene.

²⁴Abayigirizwa ne bamuzuukusa, ne bagamba nti, “Mukama waffe, Mukama waffe, tusaanawo!” Nʼazuukuka nʼaboggolera omuyaga nʼamazzi agaali geefuukudde. Ne bikkakkana, ennyanja nʼetteeka!

²⁵Nʼalyoka abagamba nti, “Okukkiriza kwammwe kuluwa?”

²⁵Ne batya, ne beewuunya nnyo, ne bagambagana nti, “Omuntu ono ye ani? Alagira omuyaga nʼamazzi ne bimugondera!”

²⁶Awo ne bagoba emitala wʼeri mu nsi yʼAbageresene eyolekedde Ggaliraaya.

²⁷Awo Yesu bwe yava mu lyato omusajja eyaliko baddayimooni nʼajja okumusisinkana ngʼava mu kibuga. Omusajja oyo yali amaze ebbanga ddene nga tayambala ngoye, nga tasula na mu nju, wabula ngʼasula mu ntaana.

²⁸Awo bwe yalaba Yesu nʼawowoggana nʼagwa wansi mu maaso ga Yesu, nʼaleekaana nti, “Onjagaza ki, Yesu, Omwana wa Katonda Ali Waggulu Ennyo? Nkwegayiridde tombonyaabonya!”

²⁹Kubanga Yesu yali alagidde omwoyo omubi guve ku musajja oyo. Emirundi mingi yalumbibwanga nʼamaanyi mangi, ne bwe baamusibanga nʼenjegere, nʼakuumibwa mu masamba, yabikutulanga, ddayimooni nʼamulaza mu ddungu.

³⁰Awo Yesu nʼabuuza omusajja nti, “Erinnya lyo ggwe ani?”

³⁰Omusajja nʼaddamu nti, “Nze Ligyoni,” kubanga omusajja yaliko baddayimooni bangi.

³¹Baddayimooni ne beegayirira Yesu aleme okubagobera mu bunnya obutakoma.

³²Waaliwo eggana lyʼembizzi, awo ku lusozi, nga lirya, baddayimooni ne beegayirira Yesu abasindike mu mbizzi ezo. Yesu nʼabakkiriza.

³³Baddayimooni ne bava ku musajja ne bayingira mu mbizzi, amangwago eggana lyonna ne lifubutuka nga liserengeta olusozi, ne lyewanula ku bbangabanga, ne ligwa mu nnyanja, embizzi zonna ne zisaanawo.

³⁴Abalunzi bʼembizzi ezo bwe baakiraba, ne badduka embiro ne bagenda, ne bategeeza abʼomu malundiro ne mu kibuga, ebintu byonna ebibaddewo.

³⁵Ekibiina kyʼabantu ne bagenda okulaba ebibaddewo ne bajja eri Yesu, ne balaba omusajja eyagobwako baddayimooni ngʼatudde awo awali ebigere bya Yesu ngʼayambadde engoye era nga mulamu ddala! Ne batya nnyo.

³⁶Abo abaaliwo okusookera ddala ne bategeeza abalala ngʼomusajja eyaliko ddayimooni bwe yawonyezebwa.

³⁷Awo abantu bonna abʼensi eyo eyʼAbagerasene ne basaba Yesu abaviire, kubanga baali batidde nnyo. Nʼasaabala mu lyato nʼavaayo.

³⁸Omusajja, eyagobwako baddayimooni nʼamusaba agende naye, naye Yesu nʼagaana.

³⁹Nʼagamba omusajja nti, “Ddayo ewammwe obategeeze Katonda byʼakukoledde.” Omusajja nʼagenda ngʼategeeza buli gwe yasanganga mu kibuga, Yesu bye yali amukoledde.

⁴⁰Yesu bwe yakomawo ekibiina kyʼabantu ne bamwaniriza nʼessanyu kubanga bonna baali bamulindirira.

⁴¹Mu kiseera ekyo ne wajjawo omusajja erinnya lye Yayiro, eyali omukulembeze wʼekkuŋŋaaniro, nʼagwa ku bigere bya Yesu nʼamwegayirira ajje mu maka ge,

⁴²kubanga muwala we omu yekka gwe yalina, eyali aweza emyaka nga kkumi nʼebiri yali afa.

⁴²Yesu nʼagenda naye, naye ngʼekibiina kimunyigiriza.

⁴³Mu kibiina kyʼabantu ekyo mwalimu omukazi eyali amaze emyaka kkumi nʼebiri ngʼalwadde ekikulukuto kyʼomusaayi. Yali atambudde nnyo mu basawo era nga bamumazeeko ebintu bye byonna ngʼabasasula, naye ne watabaawo asobola kumuwonya.

⁴⁴Omukazi ono nʼasemberera Yesu ngʼamuvaako emabega, nʼakoma ku lukugiro lwʼekyambalo kya Yesu, ekikulukuto kyʼomusaayi ne kiwona mu kaseera ako kennyini!

⁴⁵Yesu nʼabuuza nti, “Ani ankutteko?” Bonna ne beegaana, naye Peetero nʼagamba nti, “Mukama waffe, ekibiina kyʼabantu kinene abakwetoolodde era abantu bangi bakunyigiriza.”

⁴⁶Naye Yesu nʼaddamu nti, “Waliwo ankutteko kubanga mpulidde ngʼamaanyi ganvaamu.”

⁴⁷Awo omukazi bwe yategeera ngʼavumbuddwa, nʼajja ngʼakankana nʼafukamira mu maaso ga Yesu, nʼannyonnyola mu maaso gʼabantu bonna ensonga kyeyavudde amukwatako, era nti nʼobulwadde bwe bwawoneddewo!

⁴⁸Yesu nʼagamba omukazi nti, “Mwana wange, okukkiriza kwo kukuwonyezza. Genda mirembe.”

⁴⁹Awo Yesu bwe yali ngʼakyayogera omuntu nʼatuuka ngʼava mu maka gʼomukulu wʼekkuŋŋaaniro, nʼagamba Yayiro nti, “Muwala wo afudde! Omuyigiriza toyongera kumuteganya.”

⁵⁰Naye Yesu bwe yakiwulira nʼamugamba nti, “Totya! Kkiriza bukkiriza, ajja kuba mulamu.”

⁵¹Awo Yesu bwe yatuuka ku nnyumba ya Yayiro, nʼatakkiriza bantu balala kuyingira naye mu nju wabula Peetero, ne Yokaana, ne Yakobo, ne kitaawe wʼomwana, ne nnyina.

⁵²Mu kiseera ekyo abantu bonna baali bakaaba nga bakungubagira omwana oyo. Yesu nʼabagamba nti, “Mulekeraawo okukaaba! Omuwala tafudde wabula yeebase bwebasi!”

⁵³Ne bamusekerera nnyo, kubanga bonna baali bamanyi ngʼomuwala afudde.

⁵⁴Naye Yesu nʼakwata omuwala eyali afudde ku mukono, nʼakoowoola ngʼagamba nti, “Omuwala, golokoka!”

⁵⁵Amangwago nʼaba mulamu, nʼasituka nʼayimirira. Yesu nʼabalagira bamuwe ekyokulya.

⁵⁶Bazadde bʼomuwala ne beewuunya, naye Yesu nʼabakuutira obutabuulirako muntu yenna ebibaddewo.