Lukka 9:1-62 LGCB2014 - Bible AI

¹Awo olunaku lwali lumu Yesu nʼayita abayigirizwa be ekkumi nʼababiri bonna awamu, nʼabawa obuyinza okugoba baddayimooni ku bantu nʼokuwonya endwadde.

²Nʼabatuma bagende bategeeze abantu ebigambo byʼobwakabaka bwa Katonda era bawonye nʼabalwadde.

³Nʼabalagira nti, “Temwetwalira kintu kyonna nga mugenda, wadde omuggo, oba ensawo, oba emmere, wadde ffeeza wadde essaati ebbiri.

⁴Na buli nnyumba mwe muyingiranga, mubeerenga omwo, era mwe muba muvanga.

⁵Bwe muyingiranga mu kibuga, abantu baamu ne batabaaniriza, mubaviirenga, era bwe mubanga mufuluma mu kibuga ekyo mukunkumulanga enfuufu ku bigere byammwe, ebe omujulirwa eri bo.”

⁶Ne bagenda nga bava mu kibuga ekimu nga badda mu kirala, nga babuulira Enjiri buli wamu era nga bawonya.

⁷Awo Kerode eyali afuga Ggaliraaya bwe yawulira ebintu ebyo byonna, nʼasoberwa, kubanga abantu abamu baali bagamba nti, “Yokaana azuukidde mu bafu,”

⁸nʼabalala nti, “Eriya yali alabise,” nʼabalala nti, “Omu ku bannabbi abʼedda azuukidde mu bafu.”

⁹Naye Kerode ne yeebuuza nti, “Yokaana namutemako omutwe; naye ate kale ono ye ani gwe mpulirako ebigambo bino byonna?” Nʼayagala okulaba Yesu.

¹⁰Awo abatume bwe baakomawo ne bategeeza Yesu bye baakola. Yesu nʼabatwala mu kyama ne bagenda bokka mu kibuga ekiyitibwa Besusayida.

¹¹Naye ebibiina bwe baakitegeera ne kimugoberera. Yesu nʼabaaniriza, nʼabayigiriza ebigambo ebikwata ku bwakabaka bwa Katonda, nʼabaali abalwadde nʼabawonya.

¹²Obudde bwe bwawungeera abayigirizwa ekkumi nʼababiri ne bajja gyʼali ne bamugamba nti, “Abantu bagambe bagende mu bibuga ebyetoolodde wano ne mu byalo beefunire we banaafuna ku mmere nʼokusula, kubanga wano tuli mu ttale jjereere.”

¹³Yesu nʼabaddamu nti, “Mmwe mubawe ekyokulya!” Abayigirizwa be ne bamuddamu nti, “Wano tulinawo emigaati etaano gyokka nʼebyennyanja bibiri, mpozi nga tugenda tugulire abantu bano bonna emmere.”

¹⁴Waaliwo abasajja ngʼenkumi ttaano. Naye Yesu nʼagamba abayigirizwa be nti, “Mutuuze abantu mu bibiina byʼabantu ngʼamakumi ataano buli kimu.”

¹⁵Abayigirizwa ne bakola bwe batyo, bonna ne batuula.

¹⁶Awo Yesu nʼaddira emigaati etaano nʼebyennyanja ebibiri nʼatunula eri eggulu, ne yeebaza, nʼamenyaamenya emigaati nʼebyennyanja, nʼawa abayigirizwa be bagabule abantu.

¹⁷Bonna ne balya ne bakkuta, era obutundutundu obwalema bwe bwakuŋŋaanyizibwa ne bujjuza ebibbo kkumi na bibiri.

¹⁸Lwali lumu Yesu bwe yali ngʼasaba yekka kyokka nga nʼabayigirizwa be bali awo, nʼababuuza nti, “Ebibiina bimpita ani?”

¹⁹Ne baddamu nti, “Abamu bagamba nti Yokaana Omubatiza, abalala nti Eriya, ate nga waliwo abagamba nti Omu ku bannabbi abʼedda yʼazuukidde.”

²⁰Yesu kwe kubabuuza nti, “Naye mmwe mumpita ani?” Peetero nʼaddamu nti, “Ggwe Kristo wa Katonda.”

²¹Awo Yesu nʼabakuutira, ngʼabalagira obutakitegeezaako muntu yenna,

²²nʼabategeeza nti, “Kigwanidde, Omwana wʼOmuntu, okubonaabona ennyo, nʼokugaanibwa abakulembeze bʼAbayudaaya, ne bakabona abakulu, nʼabannyonnyozi bʼamateeka, nʼokuttibwa, naye ku lunaku olwokusatu okuzuukizibwa!”

²³Era bonna nʼabagamba nti, “Omuntu yenna ayagala okungoberera asaana yeefiirize yekka yeetikke omusaalaba gwe buli lunaku, angoberere!

²⁴Kubanga buli ayagala okulokola obulamu bwe, alibufiirwa. Na buli alifiirwa obulamu bwe ku lwange alibulokola.

²⁵Kubanga omuntu kirimugasa ki okulya ensi yonna, naye nʼafiirwa obulamu bwe?

²⁶Buli alinkwatirwa ensonyi, nze nʼebigambo byange, nʼOmwana wʼOmuntu, alimukwatirwa ensonyi, bwʼalijja mu kitiibwa kye ne mu kya Kitaawe ne mu kya bamalayika abatukuvu.

²⁷Naye ddala ddala mbagamba nti Abamu ku abo abayimiridde wano waliwo abatalirega ku kufa okutuusa nga bamaze okulaba obwakabaka bwa Katonda.”

²⁸Awo nga wayiseewo ngʼennaku munaana, Yesu nʼatwala Peetero ne Yokaana ne Yakobo ne bambuka ku lusozi okusaba.

²⁹Bwe yali ngʼasaba endabika yʼamaaso ge nʼekyusibwa, ebyambalo bye ne byeruka ne bitukula nnyo era ne byakaayakana.

³⁰Awo abantu babiri ne balabika nga banyumya ne Yesu, omu yali Musa nʼomulala Eriya,

³¹abaali bamasamasa mu kitiibwa kyabwe nga boogera ku kufa kwa Yesu, kwe yali agenda okutuukiriza mu Yerusaalemi.

³²Peetero ne banne otulo twali tubakutte era nga beebase, Bwe baazuukuka ne balaba ekitiibwa kya Yesu nʼabantu ababiri abaali bayimiridde naye.

³³Awo Musa ne Eriya bwe baali bagenda, Peetero nga tamanyi ne kyayogera, nʼagamba nti, “Mukama wange kirungi ffe okubeera wano. Ka tuzimbe wano ensiisira ssatu, emu yiyo, endala ya Musa nʼendala ya Eriya!”

³⁴Naye yali akyayogera ebyo ekire ne kibabikka, abayigirizwa ne bajjula okutya nga kibasaanikidde.

³⁵Eddoboozi ne liva mu kire ne ligamba nti, “Ono ye Mwana wange, gwe nneeroboza, mumuwulirize!”

³⁶Eddoboozi bwe lyasiriikirira, Yesu nʼasigalawo yekka. Abayigirizwa abo bye baalaba ne bye baawulira ne babikuuma mu mitima gyabwe, ne batabibuulirako muntu yenna mu kiseera ekyo.

³⁷Awo enkeera bwe baakomawo nga bava ku lusozi, ekibiina ekinene ne kijja okusisinkana Yesu.

³⁸Omusajja eyali mu kibiina nʼayogerera waggulu ngʼagamba nti, “Omuyigiriza, nkwegayiridde tunula ku mutabani wange ono kubanga yekka gwe nnina.

³⁹Kubanga dayimooni buli bbanga amukwata nʼamuwowogganya, era nʼamukankanya nʼabimba ejjovu nʼamusuula eri era tayagala kumuleka, amumaliramu ddala amaanyi.

⁴⁰Neegayiridde abayigirizwa bo bamumugobeko, naye ne batasobola.”

⁴¹Awo Yesu nʼaddamu nti, “Mmwe omulembe ogutakkiriza era ogwakyama, ndibeera nammwe kutuusa ddi? Era ndibagumiikiriza kutuusa ddi? Leeta wano omwana wo.”

⁴²Omulenzi bwe yali ajja eri Yesu dayimooni nʼamusuula wansi nʼamukankanya nnyo. Yesu nʼaboggolera omwoyo omubi nʼawonya omwana, nʼamuddiza kitaawe.

⁴³Abantu bonna ne beewuunya obuyinza bwa Katonda. Awo buli muntu bwe yali akyewuunya ebyʼekitalo ebyo Yesu bye yali akola, nʼagamba abayigirizwa be nti,

⁴⁴“Muwulirize nnyo kye ŋŋenda okubagamba. Omwana wʼOmuntu, agenda kuliibwamu olukwe.”

⁴⁵Naye abayigirizwa tebaategeera kyʼagambye nʼamakulu gaakyo. Kubanga kyali kibakwekebbwa, baleme okutegeera ate nga batya okukimubuuza.

⁴⁶Awo empaka ne zisituka mu bayigirizwa ba Yesu, nga bawakanira aliba omukulu mu bo.

⁴⁷Naye Yesu bwe yategeera ebirowoozo byabwe nʼaddira omwana omuto nʼamuyimiriza wʼali.

⁴⁸Nʼabagamba nti, “Buli muntu asembeza omwana ono omuto mu linnya lyange ngʼasembezezza Nze, na buli ansembeza aba asembezezza oyo eyantuma. Oyo asembayo okuba owa wansi mu mmwe, ye mukulu okubasinga.”

⁴⁹Awo Yokaana nʼagamba Yesu nti, “Mukama waffe, twalaba omuntu ngʼagoba baddayimooni mu linnya lyo ne tugezaako okumuziyiza kubanga tayita naffe.”

⁵⁰Naye Yesu nʼamuddamu nti, “Temumuziyizanga kubanga oyo atalwana nammwe abeera ku ludda lwammwe.”

⁵¹Awo ekiseera ekyʼokulinnya kwe mu ggulu bwe kyali kisembedde, nʼamalirira okugenda e Yerusaalemi.

⁵²Nʼatuma ababaka mu maaso ne balaga mu kibuga kyʼAbasamaliya okumutegekera.

⁵³Naye abantu bʼeyo ne batamwaniriza, kubanga yali amaliridde okulaga mu Yerusaalemi.

⁵⁴Abayigirizwa Yakobo ne Yokaana bwe baakiraba ne babuuza Yesu nti, “Mukama waffe, tuyite omuliro okuva mu ggulu gubazikirize?”

⁵⁵Naye Yesu nʼakyuka nʼabanenya.

⁵⁶Ne bagenda mu kabuga akalala.

⁵⁷Awo bwe baali bali mu kkubo omu ku bo nʼamugamba nti, “Nnaakugobereranga wonna wʼonoogendanga.”

⁵⁸Yesu nʼamugamba nti, “Ebibe birina obunnya bwabyo mwe bisula, nʼennyonyi zirina ebisu, naye Omwana wʼOmuntu, talina wʼassa mutwe gwe.”

⁵⁹Nʼagamba omusajja omulala nti, “Ngoberera.” Omusajja nʼaddamu nti, “Mukama wange, ndeka mmale okugenda okuziika kitange.”

⁶⁰Yesu nʼamugamba nti, “Leka abafu baziike abafu baabwe, naye ggwe genda olangirire obwakabaka bwa Katonda.”

⁶¹Nʼomulala nʼagamba Yesu nti, “Nnaakugobereranga Mukama wange. Naye sooka ondeke mmale okusiibula abʼomu maka gange.”

⁶²Naye Yesu nʼamuddamu nti, “Omuntu yenna akwata ekyuma ekirima mu ngalo ze ate nʼatunula emabega, tasaanira bwakabaka bwa Katonda.”