Luusi 1:1-22 LGCB2014 - Bible AI

¹Awo olwatuuka mu nnaku ezo abalamuzi ze baafugiramu, enjala nʼegwa mu nsi. Awo omusajja owʼe Besirekemu mu Yuda ne mukazi we, ne batabani be bombi, ne basengukira mu nsi ya Mowaabu.

²Erinnya lyʼomusajja yali Erimereki, erya mukazi we Nawomi, nʼamannya ga batabani be bombi, Maloni ne Kiriyoni. Baali Bayefulaasi[1] abʼe Besirekemu mu Yuda, bwe baatuuka mu nsi ya Mowaabu, ne babeera omwo.

³Naye Erimereki bba wa Nawomi nʼafa; nnamwandu Nawomi nʼasigalawo ne batabani be bombi.

⁴Batabani be baawasa ku bakazi Abamowaabu, omu Olupa, nʼomulala Luusi, ne babeera eyo okumala emyaka nga kkumi.

⁵Oluvannyuma Maloni ne Kiriyoni ne bafa, Nawomi nʼasigala nga talina baana wadde bba.

⁶Bwe yawulira ngʼali mu nsi ya Mowaabu nti Mukama Katonda yajjira abantu be nʼabawa emmere, nʼagolokoka ne baka baana be okuddayo mu Isirayiri.

⁷Ye ne baka baana be, ne bava mu kifo mwe baali, ne bakwata ekkubo okuddayo mu nsi ya Yuda.

⁸Awo Nawomi nʼagamba baka baana be nti, “Mugende muddeeyo buli muntu mu nnyumba ya nnyina[2], era Mukama Katonda abakolere ebyekisa, nga nammwe bwe mwakolera abaafa era ne bye mwakolera nze.

⁹Mukama Katonda abawe omukisa era buli omu ku mmwe, amuwe omusajja omulala.” Nʼalyoka abanywegera, nabo ne bayimusa amaloboozi gaabwe, ne bakaaba amaziga,

¹⁰nga bagamba nti, “Nedda, tuligenda naawe ngʼoddayo eri abantu bo.”

¹¹Naye Nawomi nʼabagamba nti, “Muddeeyo ewammwe bawala bange. Kiki ekibaagaza okugenda nange? Sikyasobola kuzaala baana balala bafuuke babba mmwe[3].

¹²Mweddireyo ewammwe, bawala bange, kubanga nze nkaddiye nnyo sikyafumbirwa. Ne bwe nnandifumbiddwa ne nzaala abaana aboobulenzi;

¹³mwandibalindiridde okutuusa lwe bandikuze nga temunnafumbirwa? Nedda, bawala bange. Nnumwa nnyo okusinga mmwe, kubanga omukono gwa Mukama Katonda tegubadde nange.”

¹⁴Bwe baawulira ekyo, ne baddamu okukaaba. Awo Olupa nʼanywegera nnyazaala we, nʼamusiibula. Naye Luusi namunywererako ddala.

¹⁵Awo Nawomi bwe yalaba ekyo, namugamba nti, “Laba, munno azzeeyo eri abantu be ne balubaale be, naawe kwata ekkubo omugoberere.”

¹⁶Naye Luusi nʼamwegayirira ngʼagamba nti, “Tompaliriza kukuvaako, wadde obutakugoberera, kubanga gyʼonoogendanga, nange gye nnaagendanga, gyʼonooberanga, nange gye nnaaberanga, era abantu bo be banaabanga abantu bange, era ne Katonda wo yʼanaaberanga Katonda wange.

¹⁷Gyʼolifiira nange gye ndifiira era eyo gye balinziika. Mukama Katonda ankangavvule nnyo bwe ndyawukana naawe wabula mpozi okufa.”

¹⁸Awo Nawomi bwe yalaba nga Luusi amaliridde okugenda naye, nʼatayongerako kigambo kirala.

¹⁹Oluvannyuma bombi ne batambula okutuuka e Besirekemu. Bwe batuuka e Besirekemu, ekibuga kyonna ne kisasamala ku lwabwe, era abakazi ne beebuuza nti, “Ddala ono ye Nawomi?”

²⁰Bwe yawulira ekyo, nʼabaddamu nti, “Temumpita Nawomi, naye mumpite Mala, kubanga Mukama Ayinzabyonna yalumya obulamu bwange nʼokukaawa bunkayiridde.

²¹Nagenda nnina ebintu bingi, naye Mukama Katonda ankomezzaawo nga sirina kantu, kale lwaki mumpita Nawomi? Katonda Ayinzabyonna yandeetera okubonaabona.”

²²Bwʼatyo Nawomi nʼakomawo e Besirekemu, okuva mu Mowaabu ne muka mwana we Luusi Omumowaabu, mu kiseera ekyʼokukungula sayiri[4] nga kyakatandika.