Luusi 2:1-23 LGCB2014 - Bible AI

¹Nawomi yalina mulamu we, ngʼava mu kika kya bba, Erimereki, nga mugagga, erinnya lye nga ye Bowaazi.

²ⓐ Awo Luusi Omumowaabu nʼagamba Nawomi nti, “Ka ŋŋende mu nnimiro okulonda ebirimba bya sayiri, ngoberere oyo anankwatirwa ekisa[5].” Nawomi nʼamuddamu nti, “Genda, muwala wange.”

³Amangwago, nʼagenda, nʼatandika okulonda mu nnimiro abakunguzi we bayise. Awo ne yesanga ngʼatuuse mu nnimiro ya Bowaazi, owʼomu kika kya Erimereki.

⁴Mu kiseera kye kimu Bowaazi nʼatuuka okuva e Besirekemu, nʼagamba abakunguzi be nti, “Mukama Katonda abeere nammwe.” Nabo ne bamuddamu nti, “Naawe Mukama Katonda akuwe omukisa.”

⁵Awo Bowaazi nʼabuuza nampala wa bakunguzi be nti, “Omuwala ono wʼani?”

⁶Nʼamuddamu nti, “Ono ye muwala Omumowaabu eyajja ne Nawomi okuva e Mowaabu.

⁷Atwegayiridde alondelonde abakunguzi we bayise mu binywa, era asiibye akola okuva obwʼenkya okutuusa essaawa eno, okuggyako akabanga akatono ke yawumuddemu.”

⁸Awo Bowaazi nʼagamba Luusi nti, “Wuliriza, muwala ggwe. Togendanga nʼolondanga mu nnimiro endala yonna, tovanga mu eno, naye obeeranga wamu nabaweereza bange abawala.

⁹Gendereranga ennimiro basajja bange mwe bamaze okukungula, era ogobererenga abawala. Abasajja mbalagidde obutakutawanya. Era ennyonta bwʼekulumanga, onywenga ku mazzi abasajja ge basenye.”

¹⁰Awo Luusi bwe yawulira ebyo, nʼavuunama ku ttaka, ngʼagamba nti, “Ngʼondaze ekisa mu maaso go, nʼonfaako nze, munnaggwanga.”

¹¹Naye Bowaazi nʼaddamu nti, “Byʼokoledde nnyazaala wo kasookedde balo afa, ne bwe waleka kitaawo ne nnyoko era nʼabantu bo nʼojja mu nsi eyʼabantu botomanyi, babintegezezza byonna.

¹²Mukama Katonda wa Isirayiri gwe weeyuna wansi wʼebiwaawaatiro bye, akusasule olwʼebyo byʼokoze, era akuwe empeera ennene ddala.”

¹³Awo Luusi nʼaddamu nti, “Nneeyongere okulaba ekisa mu maaso go mukama wange, kubanga oyogedde ebigambo ebyekisa eri omuweereza wo era emmeeme yange ogizizza mu nteeko wadde nga sigwanira kuba omu ku baweereza bo.”

¹⁴Ekiseera ekyokulya bwe kyatuuka, Bowaazi nʼagamba Luusi nti, “Jjangu okoze omugaati gwo mu wayini akatuuse[6].” Awo Luusi bwe yatuula wansi, Bowaazi nʼamuwa sayiri ensiike, nʼalya, nʼakkuta, nʼemulemera nawo.

¹⁵Oluvannyuma ngʼokulya kuwedde, nʼagolokoka agende alonde, era Bowaazi nʼalagira abaddu be nti, “Ne bwʼanaalonda mu binywa temumugaana.

¹⁶Wakiri, mumuleke yerondere mu miganda so temumuwuuna.”

¹⁷Awo Luusi nʼalonda mu nnimiro okutuuka akawungeezi, oluvannyuma nʼawuula ne sayiri gye yali akuŋŋaanyizza, nʼaweza nga kilo kkumi na ssatu.

¹⁸Yonna nʼagyetikka, nʼagitwala mu kibuga, ne nnyazaala we nʼagiraba. Era yamuleetera ne ku mmere gye yali afissizzaawo.

¹⁹Nnyazaala we yasanyuka nnyo, era nʼamubuuza nti, “Wakoze mu nnimiro yʼani leero? Aweebwe omukisa oyo akukwatiddwa ekisa!” Awo Luusi nʼabuulira nnyazaala we nannyini nnimiro mwe yakoze, nʼerinnya lyʼomwami nga ye Bowaazi.

²⁰ⓑ Nawomi namugamba nti, “Mukama Katonda atalekanga kulaga kisa eri abalamu nʼabafu, amuwe omukisa. Anti omusajja oyo muganda waffe ddala, era yʼomu ku banunuzi[7] baffe ddala.”

²¹Luusi Omumowaabu nʼayongerako nti, “Nʼokuŋŋamba yaŋŋambye nti nkolere wamu nʼabakozi be okutuusa lwe balimala ebyʼokukungula bye.”

²²Awo Nawomi nʼagamba Luusi muka mwana we nti, “Kijja kuba kirungi nnyo muwala wange, okubeeranga kumpi nabaweereza be abakazi, kubanga singa onoogenda mu nnimiro yʼomulala akabi kayinza okukutuukako.”

²³Awo Luusi nʼabeeranga kumpi nʼabaweereza ba Bowaazi ngʼalonda okutuusa amakungula ga sayiri nʼeŋŋaano bwe gaggwa, nʼabeeranga wamu ne nnyazaala we.