Luusi 3:1-18 LGCB2014 - Bible AI

¹Awo Nawomi nnyazaala wa Luusi nʼamugamba nti, “Lwaki sikunoonyeza makaⓒ agʼokubeeramu, bakulabiririre eyo?

²Ewa Bowaazi gyʼobadde nʼabaweereza be abawala, ye muganda waffe. Kale, ekiro kya leero ajja kuba ngʼawewa sayiri mu gguuliro.

³Kale naaba osaabe obuwoowo, era oyambale engoye zo ezisinga obulungi. Oluvannyuma oserengete mu gguuliro[8]; naye tomuganya kumanya nti wooli, okutuusa ngʼamaze okulya nʼokunywa.

⁴Oluvannyuma ngʼagalamiddeko wansi, weetegereze ekifo wʼagalamidde, ogende obikkule ku bigere bye emirannamiro, naawe ogalamire awo; anaakubuulira ekyʼokukola.”

⁵Awo Luusi nʼamugamba nti, “Nzija kukola nga bwʼondagidde.”

⁶Nʼaserengeta mu gguuliro, nʼakola byonna nga nnyazaala we bwe yamulagira.

⁷Awo Bowaazi bwe yamala okulya nʼokunywa, era nga musanyufu, nʼagenda nʼagalamira ku mabbali gʼentuumo ye ŋŋaano. Luusi naye nʼasooba mpola mpola, nʼabikkula ku bigere bye, nʼagalamira awo kumpi naye.

⁸Ekiro mu ttumbi, Bowaazi ne yeekanga, bwe yeekyusa nʼalaba omukazi agalamidde kumpi ne bigere bye.

⁹Nʼamubuuza nti, “Ggwe ani?” Luusi nʼaddamu nti, “Nze Luusi omuweereza wo. Mbikkaako ku lugoye lwo kubanga oli mununuzi wa kika[9].”

¹⁰Bowaazi nʼamuddamu nti, “Mukama Katonda akuwe omukisa muwala ggwe, olwʼekisa ekinene kyondaze okusinga ekyʼolubereberye, kubanga togenze wa bavubuka, abagagga oba abaavu.

¹¹Kaakano, muwala ggwe, totya. Nzija kukukolera buli kintu kyonna kyʼonoosaba. Abantu bange bonna abʼomu kibuga, bamanyi ngʼoli mukazi mwegendereza.

¹²ⓓ Kya mazima ddala ndi mununuzi wo, naye waliwo ansingako.

¹³Beera wano okutuusa obudde lwe bunaakya. Kale bwʼanaayagala okukutwala, kinaaba kirungi; naye bwʼanaaba nga tasiimye, Mukama Katonda nga bwʼali omulamu, nnaakutwala.”

¹⁴Nʼagalamira kumpi nʼebigere bye okutuusa enkeera, naye nʼagolokoka nga tebunnalaba addeyo eka. Naye Bowaazi nʼamukuutira nti, “Kireme okumanyibwa nti omukazi yazzeeko mu gguuliro.”

¹⁵Era nʼamugamba aleete omunagiro gwʼayambadde; nʼagukwata, nʼamugerera ebigero mukaaga ebya sayiri, nʼabimutikka, oluvannyuma Luusi nʼaddayo mu kibuga.

¹⁶Bwe yatuuka eri nnyazaala we, Nawomi nʼamubuuza nti, “Byagenze bitya muwala wange?” Nʼamubuulira ebintu byonna Bowaazi bye yamukoledde,

¹⁷era nʼayongerako nti, “Yampadde ebigero bino omukaaga ebya sayiri, nʼaŋŋamba nti, ‘Toddayo wa nnyazaala wo ngalo nsa.’ ”

¹⁸Nawomi nʼamugamba nti, “Gumiikiriza, muwala wange, olabe ebigambo gye binakkira, kubanga leero omusajja oyo tajja kuwummula okutuusa ensonga eyo lwʼanagimala.”