Luusi 4:1-22 LGCB2014 - Bible AI

¹Awo Bowaazi nʼayambuka ku wankaaki we kibuga nʼatuula awo. Mu kiseera kye kimu, muganda we oli gwe yayogerako ngali ne Luusi, yali ayitawo. Bowaazi nʼamuyita namugamba nti, “Jjangu otuuleko wano munnange.” Naye nʼakkiriza, nʼagenda nʼatuula we yali.

²Bowaazi nʼayita nʼabasajja kkumi ku bakadde bʼekibuga ne bajja ne batuula awo.

³Nʼalyoka agamba muganda we nti, “Nawomi, eyakomyewo okuva mu Mowaabu, atunda ekibanja ekyali ekya muganda waffe omugenzi Erimereki.

⁴Ndowoozezza nti nkutegeeze ku nsonga eyo, ekibanja ekyo okigulire mu maaso gʼabakadde baffe. Bwʼoba ngʼoyagala okukinunula kinunule. Naye bwʼoba nga toyagala, ntegeeza nkimanye. Tewali mulala alina buyinza kukinunula wabula ggwe, ate nga nze nkuddirira mu lunyiriri lwaffe.”

⁴Omusajja nʼaddamu nti, “Nzija kukinunula.”

⁵Awo Bowaazi nʼamugamba nti, “Olunaku lwʼoligula ekibanja ekyo ku Nawomi, ne Luusi Omumowaabu, nnamwandu naye olimutwala, erinnya lye yafa nʼolikuuma nʼebintu bye nʼobirabirira.”

⁶Amangwago, omusajja nʼaddamu nti, “Nze sisobola kukinunula kubanga nnyinza okwonoona obusika bwange. Noolwekyo gwe kinunule.”

⁷(Edda mu Isirayiri, empisa eyʼokununula nʼokuwaanyisa, yali nga bwʼeti: omuntu omu yaggyangamu engatto[10] ye, nʼagiwa munne. Eno ye yali ngʼenkola entuufu mu Isirayiri).

⁸Awo omusajja nʼagamba nti, “Kyegulire.” Amangwago Bowaazi nʼaggyamu engatto ye.

⁹Bowaazi nʼalangirira eri abakadde nʼabantu bonna nti, “Olwaleero, nguze ku Nawomi ebintu byonna ebya Erimereki, nʼebya Kiriyoni nʼebya Maloni, era mmwe muli bajulirwa.

¹⁰ⓔ Era ne Luusi Omumowaabu, nnamwandu wa Maloni, naye mututte okuba mukazi wange, okusobola okukuuma erinnya lyʼomugenzi Erimereki nʼebintu bye, erinnya lye lireme okufiira awo ate nʼokugibwa ne ligibwa mu bitabo bye byafaayo ebyʼekibuga. Mmwe bajulirwa!”

¹¹Awo abakadde nʼabantu bonna abaali ku wankaaki ne boogera nti, “Tuli bajulirwa. Mukama Katonda amufaananye nga Laakeeri ne Leeya[11], abaazimbira awamu ennyumba ya Isirayiri. Naawe Bowaazi oyale mu Efulasi, era oyatiikirire mu Besirekemu,

¹²era nʼezzadde Mukama Katonda lyʼanaakuwa mu mukazi oyo, libeere ngʼennyumba ya Pereezi[12], Tamali gwe yazaalira Yuda.”

¹³Awo Bowaazi nʼawasa Luusi okuba mukazi we, nʼayingira gyʼali, nʼaba olubuto, Mukama Katonda nʼamusobozesa okuzaala omwana owoobulenzi.

¹⁴Abakyala ne bagamba Nawomi nti, “Mukama Katonda yeebazibwe, oyo atakulese nga tolina mununuzi olunaku lwa leero. Era erinnya lyʼomwana lyatiikirire mu Isirayiri yonna!

¹⁵Kubanga muka mwana wo akwagala, alizza obuggya obulamu bwo nʼakuwanirira mu bukadde bwo; era akusingira abaana omusanvu, be yandizadde.”

¹⁶Awo Nawomi nʼatwala omwana, nʼamuwambaatira mu kifuba kye, nʼamulabirira.

¹⁷Abakyala abʼoku muliraano ne bagamba nti, “Ewa Nawomi ezaaliddwayo omwana.” Ne bamutuuma erinnya Obedi, oyo ye kitaawe wa Yese, era jjajja wa Dawudi.

¹⁸Luno lwe lunyiriri lwa Pereezi: Pereezi yali kitaawe wa Kezulooni,

¹⁹Kezulooni yali kitaawe wa Laamu,

¹⁹Laamu nʼaba kitaawe wa Amminadaabu.

²⁰Amminadaabu yali kitaawe wa Nakusoni,

²⁰Nakusoni nga ye kitaawe wa Salumooni;

²¹Salumooni yali kitaawe wa Bowaazi,

²¹Bowaazi nʼaba kitaawe wa Obedi;

²²Obedi yali kitaawe wa Yese,

²²Yese nʼaba kitaawe wa Dawudi.