Makko 1:1-45 LGCB2014 - Bible AI

¹Entandikwa yʼEnjiri ya Yesu Kristo, Omwana wa Katonda.

²ⓐ Kyawandiikibwa mu kitabo kya nnabbi Isaaya nti, “Laba ntuma omubaka wange akukulembere, ateeketeeke ekkubo lyo;

³ⓑ eddoboozi lyʼoyo ayogelera waggulu mu ddungu nti, ‘Muteeketeeke ekkubo lya Mukama, mutereeze amakubo ge.’ ”

⁴Yokaana yajja ngʼabatiriza mu ddungu, ngʼabuulira okubatiza okwʼokwenenya olwʼokusonyiyibwa ebibi.

⁵Ensi yonna eyʼe Buyudaaya nʼabantu bonna abʼomu Yerusaalemi, ne bagendanga gyʼali, nʼababatiza mu mugga Yoludaani nga baatula ebibi byabwe.

⁶Yokaana yayambalanga ekyambalo ekyʼobwoya bwʼeŋŋamira, ne yeesibanga olukoba olwʼeddiba mu kiwato kye, era yalyanga nzige na mubisi gwa njuki.

⁷Yabuuliranga ngʼagamba nti, “Waliwo omuntu omukulu era ansinga amaanyi ajja okujja, gwe sisaanira na kusumulula bukoba bwa ngatto ze.

⁸Nze mbabatiza na mazzi, naye ye alibabatiza na Mwoyo Mutukuvu.”

⁹Awo olwatuuka mu nnaku ezo Yesu nʼava e Nazaaleesi mu Ggaliraaya nʼajja, Yokaana nʼamubatiza mu mugga Yoludaani.

¹⁰Awo Yesu bwe yali yaakava mu mazzi, nʼalaba eggulu nga libikkuse, ne Mwoyo ngʼali ngʼejjiba ngʼamukkako.

¹¹Eddoboozi ne liva mu ggulu nga ligamba nti, “Ggwe Mwana wange omwagalwa, ggwe, gwe nsanyukira ennyo.”

¹²Amangwago Mwoyo nʼamutwala mu ddungu.

¹³Nʼamalayo ennaku amakumi ana ngʼali nʼensolo ezʼomu nsiko, ngʼakemebwa Setaani, kyokka nga bamalayika bamuweereza.

¹⁴Oluvannyuma nga Yokaana Omubatiza amaze okusibwa mu kkomera, Yesu nʼajja mu Ggaliraaya okubuulira Enjiri ya Katonda,

¹⁵ngʼagamba nti, “Ekiseera kituukiridde, nʼobwakabaka bwa Katonda busembedde! Mwenenye mukkirize Enjiri.”

¹⁶Awo Yesu yali ngʼayita ku lubalama lwʼennyanja yʼe Ggaliraaya, nʼalaba Simooni ne muganda we Andereya nga basuula obutimba bwabwe mu nnyanja; kubanga baali bavubi.

¹⁷Yesu nʼabagamba nti, “Mujje mungoberere nange ndibafuula abavubi bʼabantu!”

¹⁸Amangwago ne baleka obutimba bwabwe ne bamugoberera.

¹⁹Bwe yeeyongerayo katono, nʼalaba Yakobo ne Yokaana batabani ba Zebbedaayo, nga bali mu lyato baddaabiriza obutimba bwabwe.

²⁰Amangwago nʼabayita ne baleka kitaabwe Zebbedaayo mu lyato nʼabapakasi, ne bagoberera Yesu.

²¹Awo ne bayingira mu Kaperunawumu. Amangwago nʼayingira mu kuŋŋaaniro ku Ssabbiiti, nʼabayigiriza.

²²Ne beewuunya okuyigiriza kwe, kubanga yabayigiriza nga nannyini buyinza, so si ngʼabannyonnyozi bʼamateeka bwe baakolanga.

²³Amangwago ne walabika omusajja eyaliko omwoyo omubi mu ssinzizo, nʼawowoggana,

²⁴ngʼagamba nti “Otwagaza ki Yesu Omunnazaaleesi? Ozze okutuzikiriza? Nkumanyi gwe Mutukuvu wa Katonda.”

²⁵Awo Yesu nʼaguboggolera ngʼagamba nti, “Sirika era muveeko.”

²⁶Awo omwoyo omubi ne gumusikambula nnyo, ne gumuvaako.

²⁷Buli omu ne yeewuunya, ne beebuuzaganya nti, “Kuyigiriza kwa ngeri ki kuno okuggya okujjudde obuyinza? So nʼemyoyo emibi agiragira ne gimugondera.”

²⁸Amangwago amawulire agamukwatako ne gasaasaana wonna mu byalo ebyetoolodde Ggaliraaya.

²⁹Amangwago ne bava mu kkuŋŋaaniro ne bagenda mu nnyumba ya Simooni ne Andereya nga bali ne Yakobo ne Yokaana.

³⁰Ne basanga nga nnyina muka Simooni agalamidde mulwadde omusujja. Amangwago ne bakitegeeza Yesu.

³¹Bwe yamusemberera, nʼamukwata ku mukono nʼamuyimusa, omusujja ne gumuwonako, nʼabaweereza!

³²Awo obudde bwe bwali buwungeera, ngʼenjuba egwa, ne bamuleetera abalwadde bonna, nʼabaaliko dayimooni.

³³Ekibuga kyonna ne kikuŋŋaanira ku luggi.

³⁴Era Yesu nʼawonya abalwadde bangi abaalina endwadde ezʼenjawulo era nʼabaaliko baddayimooni bangi nʼababagobako, ne baddayimooni teyabaganya kwogera, kubanga baali bamumanyi.

³⁵Enkeera ngʼobudde tebunnalaba yesu nʼazuukuka nʼagenda yekka mu kifo ekyekusifu, okusaba.

³⁶Awo Simooni ne be yali nabo ne bamunoonya,

³⁷bwe baamulaba ne bamugamba nti, “Buli muntu akunoonya.”

³⁸Naye Yesu nʼabagamba nti, “Tugende awalala mu byalo ebituliraanye, nʼabeeyo mbabuulire, kubanga ekyo kye najjirira.”

³⁹Awo nʼabuulira mu makuŋŋaaniro agʼomu kitundu kyonna ekyʼe Ggaliraaya, era nʼagoba ne baddayimooni.

⁴⁰Awo omugenge[1] nʼajja eri Yesu ne yeegayirira ngʼafukamidde mu maaso ge, nʼamugamba nti, “Bwe kuba nga kwe kusiima kwo, oyinza okunnongoosa.”

⁴¹Yesu nʼamusaasira, nʼagolola omukono gwe, nʼamukwatako, nʼamugamba nti, “Nsiimye, longooka!”

⁴²Amangwago ebigenge ne bimuwonako, nʼaba mulongoofu.

⁴³Awo Yesu nʼamukuutira nnyo nʼamusiibula,

⁴⁴ngʼagamba nti, “Kino tokibuulirako muntu nʼomu, wabula genda weeyanjule eri kabona, oweeyo nʼekirabo Musa kye yalagira okuweebwangayo, okuba obujulirwa gye bali.”

⁴⁵Naye omusajja nʼatandika okwogera ku ebyo ebyamubaako, nʼokubibunyisa. Yesu nʼatasobola kuyingira mu kibuga mu lwatu, naye nʼabeeranga mu bifo ebyekusifu. Abantu ne bajjanga gyʼali okuva mu njuyi zonna.