Makko 10:1-52 LGCB2014 - Bible AI

¹Awo nʼagolokoka nʼava eyo nʼalaga mu kitundu kya Buyudaaya ku ludda olulala olwa Yoludaani. Ebibiina ne bimuguberera era naye nʼabayigiriza nga bwe yakolanga bulijjo.

²Abamu ku Bafalisaayo ne bajja ne bamubuuza balyoke bamukwase, nga babuuza nti, “Kituufu omusajja okugoba mukyala we?”

³Yesu nʼaddamu nti, “Musa yagamba atya ku nsonga eyo?”

⁴Ne bamuddamu nti, “Musa yawa omusajja olukusa okuwandiikira mukyala we ebbaluwa emugoba.”

⁵Yesu nʼabagamba nti, “Olwʼemitima gyammwe emikakanyavu kyeyava abawandiikira etteeka lino.

⁶ⓗ Naye okuva ku lubereberye yabatonda omusajja nʼomukazi.

⁷Omusajja kyʼanaavanga aleka kitaawe ne nnyina, nʼagenda nʼagattibwa ne mukazi we.

⁸ⓘ Olwo nga tebakyali babiri, wabula nga bafuuse omubiri gumu.

⁹Kale Katonda kye yagatta, omuntu takyawukanyanga.”

¹⁰Bwe baali mu nnyumba, abayigirizwa be, ne bongera okumubuuza ku nsonga eyo.

¹¹Yesu nʼabagamba nti, “Omusajja bwʼagobanga mukazi we nʼawasa omukazi omulala, aba ayenze.

¹²Nʼomukazi bwʼayawukananga ne bba nʼafumbirwa omusajja omulala naye aba ayenze.”

¹³Awo Yesu ne bamuleetera abaana abato abakwateko, naye abayigirizwa be ne bajunga abaabaleeta.

¹⁴Kyokka Yesu bwe yabiraba nʼanyiigira nnyo abayigirizwa be, nʼabagamba nti, “Abaana mubaleke bajje gye ndi, temubagaana kubanga abali nga bano, be bannannyini bwakabaka bwa Katonda.

¹⁵Ddala ddala mbagamba nti omuntu yenna atakkiriza bwakabaka bwa Katonda ngʼomwana omuto, tagenda kubuyingira nʼakatono.”

¹⁶Awo nʼasitula abaana nʼabassaako emikono gye, nʼabawa omukisa.

¹⁷Awo Yesu bwe yali ngʼatambula, omusajja nʼajja gyʼali ngʼadduka, nʼamufukaamirira nʼamubuuza nti, “Omuyigiriza omulungi, nsaanidde kukola ki okufuna obulamu obutaggwaawo?”

¹⁸Yesu nʼamuddamu nti, “Ompitira ki omulungi? Tewali mulungi nʼomu wabula Katonda yekka.

¹⁹ⓙ Amateeka gano ogamanyi. ‘Tottanga, toyendanga, tobbanga, towaayirizanga, kitaawo ne nnyoko obassangamu ekitiibwa.’ ”

²⁰Nʼamuddamu nti, “Omuyigiriza, ebyo byonna simenyangako na kimu okuva mu buvubuka bwange.”

²¹Yesu nʼamutunuulira enkaliriza, nʼamwagala. Nʼamugamba nti, “Waliwo ekintu kimu kyokka ekikubulako, era kye kino: genda otunde ebintu byonna byʼolina, ensimbi zʼonoggyamu ozigabire abaavu, oliba nʼobugagga mu ggulu, olyoke ojje ongoberere.”

²²Bwe yawulira ebigambo ebyo nʼanyiikaala, nʼagenda ngʼanakuwadde, kubanga yali mugagga nnyo.

²³Yesu nʼamutunuulira ngʼagenda, nʼalyoka akyukira abayigirizwa be, nʼabagamba nti, “Nga kizibu nnyo abagagga okuyingira mu bwakabaka bwa Katonda!”

²⁴Kino ne kibeewuunyisa nnyo. Yesu nʼayongera nʼabagamba nti, “Abaana abaagalwa, nga kizibu abo abeesiga obugagga okuyingira mu bwakabaka bwa Katonda!

²⁵Kyangu eŋŋamira okuyita mu nnyindo yʼempiso okusinga omugagga okuyingira mu bwakabaka bwa Katonda.”

²⁶Ne beewuunya nnyo nga bwe beebuuzaganya nti, “Olwo kale ani ayinza okulokolebwa!”

²⁷Yesu nʼabatunuulira enkaliriza nʼabagamba nti, “Eri abantu tekisoboka nʼakatono. Naye eri Katonda, buli kintu kyonna kisoboka.”

²⁸Awo Peetero nʼagamba Yesu nti, “Tweresa byonna ne tukugoberera.”

²⁹Yesu nʼamuddamu nti, “Njagala okubakakasiza ddala nti, Tewali muntu nʼomu eyali yeeresezza ekintu kyonna, ngʼamaka, abooluganda, bannyina, nnyina, kitaawe, abaana be, oba ettaka nʼamayumba olwʼokunjagala nʼokubuulira Enjiri,

³⁰ataliddizibwawo emirundi kikumi mu mulembe guno amaka, abooluganda, bannyina, nnyina, abaana, ettaka awamu nʼokuyigganyizibwa! Ebyo byonna biriba bibye ku nsi kuno, ate ne mu nsi egenda okujja afunemu obulamu obutaliggwaawo.

³¹Naye bangi aboolubereberye baliba abooluvannyuma, nʼabʼoluvannyuma baliba aboolubereberye.”

³²Awo bwe baali nga bali mu kkubo, nga bagenda e Yerusaalemi, Yesu ngʼakulembeddemu, abayigirizwa be ne bamuvaako emabega nga bamugoberera naye nga bajjudde okutya nʼokweraliikirira. Yesu nʼabazza wa bbali, nʼabannyonnyola byonna ebyali bijja okumutuukako nga batuuse mu Yerusaalemi.

³³Nʼababuulira nti, “Bwe tunaatuuka eyo, Nze, Kristo, Omwana wʼOmuntu nzija kukwatibwa, ntwalibwe mu maaso ga bakabona abakulu nʼabannyonnyozi bʼamateeka. Bajja kumpaayo mu Baruumi bansalire ekibonerezo ekyʼokufa.

³⁴Bajja kunduulira bampandire nʼamalusu bankube embooko era banzite, naye nga wayiseewo ennaku ssatu ndizuukira.”

³⁵Awo Yakobo ne Yokaana, batabani ba Zebbedaayo ne bajja eri Yesu ne boogera naye mpola mu kyama nti. “Omuyigiriza, waliwo ekintu kye tukusaba otukolere.”

³⁶Nʼababuuza nti, “Kiki ekyo?”

³⁷Ne bamuddamu nti, “Tusaba mu bwakabaka bwo tutuule ku ntebe eziriraanye eyiyo, omu atuule ku mukono gwo ogwa ddyo nʼomulala ku gwa kkono?”

³⁸Naye Yesu nʼabaddamu nti, “Kye musaba temukitegeera! Musobola okunywa ku kikompe ekyʼokubonaabona kye ŋŋenda okunywako? Oba okubatizibwa mu kubonaabona nga bwe ŋŋenda okubatizibwa?”

³⁹Ne bamuddamu nti, “Tusobola.” Yesu nʼabagamba nti, “Okunywa ku kikompe kyange mugenda kunywako era mulibatizibwa ne mu kubatizibwa kwange.

⁴⁰Naye sirina buyinza kubatuuza ku ntebe eziriraanye eyange. Enteekateeka eyo yamala dda okukolebwa.”

⁴¹Abayigirizwa abalala bwe baategeera Yakobo ne Yokaana kye baasaba, ne babanyigira nnyo.

⁴²Yesu nʼabayita nʼabagamba nti, “Mukimanyi bulungi nga bakabaka nʼabakulembeze abʼoku nsi bakuluusanya abantu,

⁴³naye mu mmwe si bwe kiri bwe kityo. Yenna ayagala okuba omukulembeze mu mmwe, asaanira abeerenga muweereza wa banne.

⁴⁴Ne buli ayagala okuba omwami asinga bonna obukulu nʼekitiibwa, asaana abeere muddu wa banne bonna.

⁴⁵Nange kennyini, Kristo, sajja ku nsi kuweerezebwa, wabula Nze okuyamba abalala, era nʼokuwaayo obulamu bwange ngʼomutango okununula abangi.”

⁴⁶Awo Yesu nʼabayigirizwa be ne batuuka mu Yeriko. Oluvannyuma bwe baali bava mu kibuga ekibiina kinene ne kibagoberera. Waaliwo omusajja omuzibe wʼamaaso, erinnya lye Battimaayo (mutabani wa Timaayo) eyasabirizanga, eyali atudde ku mabbali gʼoluguudo.

⁴⁷Awo Battimaayo bwe yategeera nga Yesu Omunnazaaleesi ajja okuyita we yali, nʼatandika okuleekaana nti, “Yesu, Omwana wa Dawudi, onsaasire!”

⁴⁸Abamu ku bantu abaali mu kibiina ne bamuboggolera nti, “Sirika! Totuleekaanira!” Naye ye ne yeeyongera bweyongezi okukoowoola ngʼaddiŋŋana nti, “Ayi Omwana wa Dawudi, onsaasire!”

⁴⁹Yesu nʼayimirira nʼayogera nti, “Mumuyite.” Ne bayita omuzibe wʼamaaso nti, “Guma omwoyo, situka akuyita!”

⁵⁰Battimaayo nʼasuula eri ekikooti kye, nʼasituka mangu nʼajja eri Yesu.

⁵¹Yesu nʼamubuuza nti, “Oyagala nkukolere ki?” Omuzibe wʼamaaso nʼaddamu nti, “Ayi Omuyigiriza, njagala nsobole okulaba!”

⁵²Awo Yesu nʼamugamba nti, “Ggenda, okukkiriza kwo kukuwonyezza.” Amangwago omusajja nʼazibuka amaaso, nʼagoberera Yesu.