Makko 11:1-33 LGCB2014 - Bible AI

¹Awo Yesu nʼabayigirizwa be, bwe baali basemberedde Besufaage ne Besaniya ebiriraanye Yerusaalemi, nga batuuse ku lusozi olwa Zeyituuni, Yesu nʼatuma abayigirizwa be babiri babasooke mu maaso.

²Nʼabalagira nti, “Mugende mu kyalo ekituli mu maaso, bwe munaaba mwakakituukamu mujja kulaba omwana gwʼendogoyi oguteebagalwangako nga gusibiddwa awo. Mugusumulule mugundeetere wano.

³Era omuntu yenna bwʼababuuza gye mugutwala, mumuddamu nti, ‘Mukama waffe yʼagwetaaga, era tujja kugukomyawo mangu.’ ”

⁴Abaatumibwa ne bagenda, ne balaba omwana gwʼendogoyi nga guyimiridde ku luguudo, naye nga gusibiddwa ku muguwa wabweru wʼennyumba. Bwe baali bagusumulula,

⁵abamu ku bantu abaali bayimiridde awo ne bababuuza nti, “Abange, omwana gwʼendogoyi, musumulula gwa ki?”

⁶Abayigirizwa ne baddamu nga Yesu bwe yabagamba, ne balyoka babakkiriza okugutwala.

⁷Omwana gwʼendogoyi ne baguleetera Yesu. Abayigirizwa be ne baddira ebyambalo byabwe ne babyaliira ku mugongo gwayo, Yesu nʼagwebagala.

⁸Awo abantu bangi abaali mu kibiina ne baaliira engoye zaabwe mu luguudo mwe yali agenda okuyita, abalala ne bamenya amatabi gʼemiti mu nnimiro ezaali okumpi, nago ne bagaalira mu luguudo.

⁹ⓚ Abaali mu maaso ge nʼabaali emabega we, bonna ne baleekaanira waggulu nti: “Atenderezebwe oyo ajja mu linnya lya Mukama![7]”

⁹“Ozaana!”

¹⁰“Atenderezebwe olwʼokukomyawo obwakabaka bwa jjajjaffe Dawudi nʼokubuwa omukisa!” “Ozaana! Ayi ali waggulu ennyo!”

¹¹Awo Yesu nʼatuuka mu Yerusaalemi, nʼayingira mu Yeekaalu. Nʼatunula, ne yeetoolooza amaaso wonna, naye obudde bwali buyise, nʼafuluma nʼagenda e Besaniya nʼabayigirizwa be ekkumi nʼababiri.

¹²Enkeera bwe baali bava e Besaniya, Yesu nʼalumwa enjala.

¹³Nʼalengera omutiini, nga guddugazza bulungi amalagala, nʼagendayo alabe obanga anaasangako ebibala. Yagenda okugutuukako nga kuliko malagala meereere, kubanga si kye kyali ekiseera kyagwo okubaako ebibala.

¹⁴Awo Yesu nʼagamba omuti nti, “Omuntu yenna alemenga okuddayo okulya ekibala kyo!” Abayigirizwa be ne bamuwulira ngʼakyogera.

¹⁵Bwe baatuuka mu Yerusaalemi nʼayingira mu Yeekaalu, nʼatandika okugobamu abaali batundiramu nʼabaali baguliramu, nʼavuunika emmeeza zʼabaali bawaanyisa ensimbi, nʼavuunika nʼentebe zʼabatunzi bʼamayiba.

¹⁶Era nʼataganya muntu kuyisa kintu kyonna.

¹⁷ⓛ ⓜ Nʼabayigiriza ngʼagamba nti, Naye mmwe mugifudde mpuku yʼabanyazi.”

¹⁷“Tekyawandiikabwa nti, ‘Ennyumba yange eneebanga nnyumba ya kusabiramu amawanga?’

¹⁸Bakabona abakulu nʼabannyonnyozi bʼamateeka bwe baakiwulira, ne batandika okusala amagezi balabe bwe bayinza okumuzikiriza. Baali bamutya engeri ekibiina kyonna bwe kyali kyewuunya okuyigiriza kwe.

¹⁹Obudde bwe bwawungeera Yesu nʼabayigirizwa be ne bafuluma mu kibuga.[8]

²⁰Awo enkeera mu makya abayigirizwa be ne balaba omuti omutiini Yesu gwe yakolimira nga gukaze okuviira ddala ku kikolo!

²¹Peetero nʼajjukira nʼagamba Yesu nti, “Omuyigiriza, laba omuti omutiini gwe wakolimira gukaze!”

²²Yesu nʼagamba abayigirizwa be nti, “Mukkiririze mu Katonda.

²³Ddala ddala mbagamba nti buli aligamba olusozi luno nti, ‘Situka ogwe mu nnyanja,’ nʼatabuusabuusa mu mutima gwe, naye nʼaba nʼokukkiriza, kyʼayogedde kirituukirira.

²⁴Noolwekyo mbagamba nti buli kye munaasabanga, mukkirize nti mukiweereddwa, era kinaabanga bwe kityo gye muli.

²⁵Bwe mubanga mugenda okusaba musonyiwenga omuntu yenna gwe mulinako ensonga, ne Kitammwe ali mu ggulu alyoke abasonyiwe ebyonoono byammwe.

²⁶Naye bwe mutaasonyiwenga, ne Kitammwe ali mu ggulu talibasonyiwa byonoono byammwe.”

²⁷Yesu nʼabayigirizwa be bwe baakomawo mu Yerusaalemi yali atambulatambula mu Yeekaalu, bakabona abakulu nʼabannyonnyozi bʼamateeka nʼabakulembeze bʼAbayudaaya ne bajja gyʼali

²⁸ne bamubuuza nti, “Buyinza ki obukukoza bino? Era ani yakuwa obuyinza okukola bino?”

²⁹Naye Yesu nʼabaddamu nti, “Bwe munaamala okunziramu ekibuuzo kyange kimu, nange nʼababuulira eyampa obuyinza obwo!

³⁰Okubatiza kwa Yokaana kwava mu ggulu oba kwava eri bantu? Munziremu!”

³¹Ne bakubaganya ebirowoozo bokka na bokka nti, “Bwe tuddamu nti, ‘Kwava mu ggulu,’ ajja kutubuuza nti, ‘Kale, lwaki temwamukkiriza?’

³²Naye, ate bwe tuddamu nti, ‘Kwava eri bantu.’ ” Baali batya ekibiina kyʼabantu. Kubanga buli muntu yalowooza Yokaana okuba nnabbi.

³³Ne baddamu Yesu nti, “Tetumanyi.” Awo Yesu nʼabaddamu nti, “Nange sijja kubabuulira obuyinza obunkoza ebintu ebyo gye mbuggya.”