Makko 13:1-37 LGCB2014 - Bible AI

¹Awo Yesu bwe yali ngʼava mu Yeekaalu omu ku bayigirizwa be nʼamugamba nti, “Omuyigiriza, laba, amayinja ago, nʼebizimbe ebyo.”

²Yesu nʼamuddamu nti, “Ebizembe ebyo ebyʼekitalo obiraba? Ne bwe kiriba ki tewaliba jjinja na limu wano eririsigala ku linnaalyo.”

³Awo Yesu bwe yali ngʼatudde awo ku lusozi olwa Zeyituuni, okwolekera yeekaalu, Peetero ne Yakobo ne Yokaana ne Andereya ne bamubuuza mu kyama, ne bamubuuza nti,

⁴“Tutegeeze, ebintu byonna we birituukirira, era nʼakabonero akalibaawo ngʼebyo byonna bigenda okutuukirira.”

⁵Yesu nʼabagamba nti, “Mwekuume omuntu yenna tababuzaabuzanga.

⁶Bangi abalijja mu linnya lyange nga bagamba nti Nze nzuuyo era balibuzaabuza bangi

⁷Naye bwe muliwulira entalo, nʼeŋŋambo ezʼentalo, temutyanga. Kyetaaga ebyo byonna okubaawo naye enkomerero eriba tennatuuka.

⁸Kubanga amawanga galirwanagana, nʼobwakabaka bulirwana nʼobwakabaka, era musisi aliyita mu bifo bingi, nʼenjala nnyingi erigwa. Okulumwa ngʼokwʼokuzaala kuliba kutandika butandisi.”

⁹“Mwekuume mmwe. Balibaawo mu mbuga zʼamateeka ne mu makuŋŋaaniro, mulikubibwa, muliyimirira mu maaso ga bakabaka ne bagavana. Muliyimirira ku lwange, okubeera abajulirwa gye bali.

¹⁰Era Enjiri kigigwanira okumala okubuulirwa amawanga gonna.

¹¹Bwe bali bakwata ne babawaayo, temweraliikiriranga kya kuwoza. Kye munaaweebwanga okwogera mu kiseera ekyo kye munaayogeranga kubanga si mmwe muliba mwogera wabula Mwoyo Mutukuvu yʼaliba ayogerera mu mmwe.”

¹²“Owooluganda aliwaayo muganda we okuttibwa, ne kitaawe wʼomwana aliwaayo omwana we. Abaana balijeemera bazadde baabwe ne babatta.

¹³Mulikyayibwa abantu bonna, olwʼerinnya lyange, naye oyo aligumiikiriza okutuusa ku nkomerero yʼalirokolebwa.”

¹⁴ⓢ “Bwe mulabanga ekintu ekyʼomuzizo ekizikiriza, nga kiyimiridde mu kifo we kitasaanira (asoma bino, weetegereze) abali mu Buyudaaya baddukiranga ku nsozi.

¹⁵Nʼoyo alibeera waggulu ku nnyumba takkanga wadde okuyingira okubaako kyʼatwala okuva mu nnyumba ye.

¹⁶Nʼoyo alibeera mu nnimiro, taddanga kutwala bintu bye, wadde okukima yo olugoye lwe.

¹⁷Naye ziribasanga abaliba embuto nʼabaliba bayonsa mu nnaku ezo.

¹⁸Naye musabe ekiseera ekyo kireme kuba kya butiti.

¹⁹Kubanga ekiseera ekyo kiriba kya ntiisa etebeerangawo kasookedde Katonda atonda eggulu nʼensi, nʼokutuusa kaakano nʼemirembe egigenda okujja.

²⁰Era singa Mukama teyakendeeza ku nnaku ezo, tewandiwonyeewo muntu yenna, naye olwʼabalonde be, ennaku ezo yazikendeezaako.

²¹Era omuntu yenna singa abagamba nti, ‘Mulabe, Kristo wuuli,’ temumukkirizanga.

²²Kubanga walibaawo bakristo bangi abʼobulimba, ne bannabbi bangi abʼobulimba abalikola ebyʼamagero nʼebyewuunyo, nga bagenderera okulimba nʼabalonde bennyini bwe kiriba kisoboka.

²³Naye mwekuume! Kubanga mbalabudde ngʼebintu bino byonna tebinnabaawo.”

²⁴“Ennaku ezʼentiisa eyo nga ziweddeko, ‘enjuba eriggyako ekizikiza, era nʼomwezi ne gulekeraawo okwaka,

²⁵ⓣ era, emmunyeenye zirikunkumuka, nʼaboobuyinza abʼomu bbanga balikankana.’ ”

²⁶“Olwo muliraba Omwana wʼOmuntu ngʼajjira ku bire nʼamaanyi mangi nʼekitiibwa kinene,

²⁷Era alituma bamalayika okukuŋŋaanya abalonde be okuva eri empewo ennya, nʼokuva ensalo zʼensi gye zikoma okutuuka ensalo zʼeggulu gye zikoma.”

²⁸“Muwulire omuti omutiini kye guyigiriza. Bwe gutandika okutojjera, mumanya nti amakungula ganaatera okutuuka.

²⁹Noolwekyo nammwe bwe muliraba ebintu bino nga bibaawo, mulimanyira ddala ngʼekiseera kisembedde.

³⁰Ddala ddala mbagamba nti Omulembe guno tegugenda kuggwaako okutuusa ngʼebintu byonna bimaze okubaawo.

³¹Eggulu nʼensi biriggwaawo, naye ebigambo byange biribeerera emirembe nʼemirembe.”

³²“Naye ebyʼolunaku olwo oba ekiseera ekyo tewali nʼomu abimanyi, newaakubadde bamalayika mu ggulu wadde Omwana okuggyako Kitaffe.

³³Mwekuume, mutunule[12] kubanga temumanyi kiseera we kirituukira.

³⁴Ngʼomusajja eyatambula olugendo nʼategekera abaddu be, buli omu nʼamuwa obuyinza ngʼomulimu gwe bwe guli, nʼalagira omuggazi wʼoluggi atunule alindirire.”

³⁵“Noolwekyo mwekuume kubanga temumanyi mukama wa nnyumba wakomerawo oba kawungeezi, oba mu ttumbi, oba ngʼenkoko zikookolima, oba ngʼobudde bukya,

³⁶si kulwa ngʼakomawo nga temumanyiridde, nʼabasanga nga mwebase.

³⁷Kye mbagamba mmwe, kye ŋŋamba buli muntu, mwekuume.”