Makko 14:1-72 LGCB2014 - Bible AI

¹Embaga eyʼOkuyitako[13], kwe baliira emigaati egitali mizimbulukuse, yali ebuzaayo ennaku bbiri etuuke. Bakabona abakulu nʼabannyonnyozi bʼamateeka ne basala olukwe engeri gye banaakwata Yesu bamutte.

²Ne bagamba nti, “Si mu kiseera kyʼembaga yʼOkuyitako, kubanga abantu bayinza okuleetawo akeegugungo.”

³Mu kiseera ekyo Yesu ngʼali Besaniya mu nnyumba yʼomusajja eyali amanyiddwa nga Simooni Omugenge, ngʼatudde, omukazi nʼayingira ngʼalina eccupa, eyalimu amafuta agʼakaloosa agʼomuwendo omungi. Nʼayasa eccupa nʼasiiga amafuta ku mutwe gwa Yesu.

⁴Abamu ku abo abaaliwo ne basunguwalira nnyo ekikolwa ekyo, nga beebuuza nti, “Amafuta ago gafudde ki?

⁵Wakiri singa gatundiddwa dinaali ezisukka mu bikumi ebisatu, ne ziweebwa abaavu!” Ne bamwemulugunyiza.

⁶Naye Yesu nʼabagamba nti, “Omukazi mumuleke. Lwaki mumuteganya? Ankoledde ekikolwa kirungi.

⁷Abaavu muli nabo bulijjo, era muyinza okubakolera obulungi buli we mwagalidde, naye Nze sijja kubeera nammwe bulijjo.

⁸Akoze kyʼasobola, omubiri gwange agusiigiddewo amafuta agʼakaloosa nga bukyali, ngʼaguteekateeka okuziikibwa.

⁹Ddala ddala mbagamba nti Buli kifo kyonna Enjiri gyʼeneebuulirwanga mu nsi yonna, ekikolwa kyʼomukazi ono kinajjukirwanga era kinaayongerwangako okumujjukiranga.”

¹⁰Awo Yuda Isukalyoti, omu ku bayigirizwa ba Yesu ekkumi nʼababiri, nʼagenda eri bakabona abakulu alabe bwʼanaalyamu Yesu olukwe amubawe.

¹¹Bakabona abakulu bwe baakiwulira ne bajjula essanyu, ne bamusuubiza okumuwa ensimbi. Bwʼatyo Yuda nʼatandika okunoonyereza engeri entuufu wʼanaaweerayo Yesu.

¹²Awo ku lunaku olusooka olwʼembaga yʼAbayudaaya kwe baliira emigaati egitali mizimbulukuse, nga bawaayo omwana gwʼendiga ogwʼOkuyitako nga ssaddaaka, abayigirizwa be ne bamubuuza nti, “Oyagala tukutegekere wa gyʼonooliira Embaga eyʼOkuyitako.”

¹³Nʼatuma babiri ku bayigirizwa be, nʼabagamba nti, “Mugende mu kibuga munaasanga omusajja eyeetisse ensuwa yʼamazzi, mumugoberere.

¹⁴Muyingire mu nnyumba mwʼanaayingira, mubuuze nnyinimu nti, ‘Ekisenge nze nʼabayigirizwa bange mwe tunaalira Embaga eyʼOkuyitako kiri ludda wa?’

¹⁵Ajja kubatwala mu kisenge ekinene ekya waggulu, ekiwedde okulongoosa nʼokutegeka. Muteekereteekere omwo ekijjulo kyaffe.”

¹⁶Awo abayigirizwa ababiri ne bagenda mu kibuga, ne basanga byonna nga Yesu bwe yabibagamba, ne bategeka Embaga eyʼOkuyitako.

¹⁷Obudde bwe bwawungeera nʼatuuka nʼabayigirizwa be ekkumi nʼababiri.

¹⁸Bwe baali batudde nga balya, Yesu nʼabagamba nti, “Ddala ddala mbagamba nti omu ku mmwe alya nange anandyamu olukwe.”

¹⁹Ennaku nʼebakwata nnyo, ne batandika okumubuuza kinnoomu nti, “Ddala ye nze?”

²⁰Nʼabagamba nti, “Omu ku mmwe ekkumi nʼababiri, akoza nange mu kibya.

²¹Omwana wʼOmuntu agenda ngʼEbyawandiikibwa bwe biri. Naye zimusanze alya mu Mwana wʼOmuntu olukwe. Kyandibadde kirungi singa omuntu oyo teyazaalibwa.”

²²Awo bwe baali balya, Yesu nʼaddira omugaati, ne yeebaza, nʼagumenyaamenyamu, nʼagabira abayigirizwa be, nʼabagamba nti, “Mutoole mulye, guno gwe mubiri gwange.”

²³Ate nʼaddira ekikompe ne yeebaza nʼakibawa; bonna ne banywa.

²⁴Nʼabagamba nti, “Guno musaayi gwange ogwʼendagaano, oguyiika ku lwʼabangi.

²⁵Ddala ddala mbagamba nti Siriddayo kukomba ku kibala kya muzabbibu okutuusa ku lunaku luli lwe ndikinywa nga kisingawo obulungi mu bwakabaka bwa Katonda.”

²⁶Awo ne bayimbayo oluyimba, ne balyoka bagenda ku lusozi olwa Zeyituuni.

²⁷ⓤ Yesu nʼabagamba nti, “Buli omu ku mmwe ajja kunjabulira, kubanga kyawandiikibwa nti, ‘Ndikuba omusumba, endiga ne zisaasaana.’

²⁸Naye bwe ndimala okuzuukizibwa, ndibakulembera okugenda e Ggaliraaya.”

²⁹Peetero nʼamugamba nti, “Abalala bonna ne bwe banaakwabulira, nze siikwabulire!”

³⁰Yesu nʼamugamba nti, “Ddala ddala nkugamba nti ekiro kya leero, enkoko eneeba tennakookolima mirundi ebiri, onooneegaana emirundi esatu.”

³¹Peetero nʼakiggumiza nnyo ngʼagamba nti, “Ne bwe kinanneetaagisa okufiira awamu naawe, siikwegaane.” Nʼabalala bonna ne beerayirira bwe batyo.

³²Awo Yesu nʼabayigirizwa be ne batuuka mu kifo ekiyitibwa Gesusemane, nʼagamba abayigirizwa be nti, “Mugira mutuula wano, ŋŋende nsabe.”

³³Nʼatwala Peetero, ne Yakobo ne Yokaana; nʼatandika okweraliikirira nʼokuteganyizibwa mu mutima.

³⁴Nʼabagamba nti, “Omwoyo gwange guliko ennaku nnyingi nnyo zaagala na kunzita, kale mubeere wano mukuume.”

³⁵Ne yeeyongerako mu maaso katono, nʼagwa wansi nʼasaba obanga kisoboka, essaawa eyo, ereme kutuuka.

³⁶Nʼasaba nti, “Aba, Kitange, ebintu byonna bisoboka gyʼoli. Nzigyako ekikompe kino. Naye si nga Nze bwe njagala, wabula nga ggwe bwʼoyagala.”

³⁷Nʼakomawo gye bali, nʼabasanga nga beebase. Nʼagamba Peetero nti, “Simooni! Weebase? Tosobodde kutunulako nange wadde essaawa emu?

³⁸Mutunule musabe, muleme kukemebwa. Omwoyo gwagala, naye omubiri munafu.”

³⁹Ate nʼabaleka awo nʼaddayo, nʼasaba ebigambo bye bimu na biri bye yasaba olubereberye.

⁴⁰Nʼakomawo we bali, nʼabasanga nga beebase, kubanga amaaso gaabwe gaali gakambira. Ne batamanya kya kumuddamu.

⁴¹Bwe yadda gye bali omulundi ogwokusatu nʼabagamba nti, “Kale mwebakire ddala. Kinaamala, laba ekiseera kituuse Omwana wʼOmuntu aweebweyo mu mikono gyʼabalina ebibi.

⁴²Musituke! Tugende, laba andyamu olukwe anaatera okutuuka.”

⁴³Yesu yali akyayogera, amangwago Yuda (omu ku batume be ekkumi nʼababiri) nʼajja ngʼali nʼekibiina kinene, ekyava ewa bakabona abakulu, nʼabakulembeze bʼAbayudaaya, nga balina ebitala era nga bakutte emiggo.

⁴⁴Yuda yali abagambye nti, “Gwe nnanywegera, ye wuuyo mumukwate, mumutwale nga mumunywezezza.”

⁴⁵Awo baali baakatuuka Yuda nʼalaga eri Yesu, bwe yamutuukako nʼagamba nti, “Omuyigiriza!” Nʼamugwa mu kifuba.

⁴⁶Ne bavumbagira Yesu ne bamukwata, ne bamunyweza.

⁴⁷Naye omu ku baali bayimiridde awo nʼasowolayo ekitala nʼasalako okutu kwʼomuddu wa Kabona Asinga Obukulu.

⁴⁸Yesu nʼababuuza nti, “Lwaki munzijjidde ngʼomunyazi, nʼebitala nʼemigo okunkwata?

⁴⁹Mbadde nammwe ennaku nnyingi mu yeekaalu nga njigiriza, naye temwankwata. Naye kino kikoleddwa ebyawandiikibwa bituukirire.”

⁵⁰Bonna ne bamwabulira ne badduka.

⁵¹Naye waaliwo omulenzi omuvubuka eyali agoberera ngʼavaako ennyuma, nga yeebikkiridde olugoye, lumu lwokka, ne baagezaako okumukwata,

⁵²nʼabeesumattulako, ne basigaza olugoye nʼadduka bwereere.

⁵³Awo Yesu nʼatwalibwa eri Kabona Asinga Obukulu, bakabona abakulu nʼabakulembeze bʼAbayudaaya nʼabannyonnyozi bʼamateeka.

⁵⁴Peetero nʼavaako walako ennyuma ngʼajja agoberera, nʼayita mu luggya lwa Kabona Asinga Obukulu, nʼatuula ku kyoto nʼabaweereza we baali bootera omuliro.

⁵⁵Bakabona abakulu, nʼOlukiiko Olukulu olwʼAbayudaaya,[14] baali banoonya obujulizi kwe banaasinziira okutta Yesu, naye ne bubabula.

⁵⁶Bangi baayogera ebyʼobulimba ku ye, naye obujulizi bwabwe nga bukoonagana bukoonaganyi.

⁵⁷Abamu ku bo ne bamuwaayiriza nga bagamba nti,

⁵⁸“Twamuwulira ngʼayogera nti, ‘Ndizikiriza Yeekaalu eno eyazimbibwa nʼemikono gyʼabantu, naye oluvannyuma lwʼennaku ssatu ndizzaawo endala etazimbiddwa na mikono gyʼabantu.’ ”

⁵⁹Naye era nʼolwo ebigambo byabwe tebyatereera bulungi.

⁶⁰Awo Kabona Asinga Obukulu nʼayimirira, nʼabuuza Yesu nti, “Tolina kyʼoddamu ku bino bye bakwogerako?”

⁶¹Yesu nʼatamuddamu kintu. Ate Kabona Asinga Obukulu nʼamubuuza nti, “Ggwe Kristo, Omwana wʼoyo atenderezebwa?”

⁶²Yesu nʼaddamu nti, “Ye Nze, era mugenda kulaba Omwana wʼOmuntu ngʼatudde ku mukono ogwa ddyo ogwa Katonda Ayinzabyonna, ngʼakomawo mu bire ebyʼeggulu.”

⁶³Awo Kabona Asinga Obukulu nʼayuza ebyambalo bye, nʼagamba nti, “Ate twetaagira ki abajulizi?

⁶⁴Muwulidde obuvvoozi. Musala mutya omusango guno?”

⁶⁴Bonna ne bamusalira gwa kufa.

⁶⁵Abamu ne batandika okumuwandulira amalusu, ne bamusiba kantuntunu ku maaso, ne bamukuba empi mu maaso, nga bwe bamuduulira nga bagamba nti, “Lagula.” Nʼabaserikale nabo ne bamukuba ebikonde nga bamufulumya.

⁶⁶Peetero yali ali wabweru mu luggya, omu ku bawala abaweereza ba Kabona Asinga Obukulu nʼajja.

⁶⁷Bwe yalaba Peetero nʼamwetegereza ngʼayota omuliro, nʼamugamba nti, “Ggwe, wali ne Yesu, Omunnazaaleesi.”

⁶⁸Peetero ne yeegaana ngʼagamba nti, “Simanyi wadde okutegeera byʼoyogerako!” Nʼafuluma nʼalaga ebweru mu kisasi, enkoko nʼekookolima.

⁶⁹Omuwala oli nʼalengera Peetero, nʼategeeza banne abaali bayimiridde awo nti, “Ono ali omu ku bo.”

⁷⁰Peetero nʼayongera okwegaana.[15]

⁷⁰Bwe waayitawo akabanga, abantu abalala abaali bayimiridde awo ne bagamba Peetero nti, “Ddala ddala oli omu ku bo, kubanga oli Mugaliraaya!”

⁷¹Peetero nʼatandika, okukolima nʼokulayira nga bwʼagamba nti, “Omusajja ono gwe mwogerako, simumanyi.”

⁷²Amangwago enkoko nʼekookolima omulundi ogwokubiri, Peetero nʼajjukira ebigambo Yesu bye yali amugambye nti, “Enkoko eneeba tennakookolima mirundi ebiri, onoonneegaana emirundi esatu.” Awo Peetero nʼatulika nʼakaaba amaziga.