Makko 15:1-47 LGCB2014 - Bible AI

¹Amangwago mu makya olukiiko lwa bakabona abakulu, nʼabakulembeze bʼAbayudaaya, nʼabannyonnyozi bʼamateeka lwe Lukiiko Olukulu lwonna, ne bakuŋŋaana ne basiba Yesu, ne bamuweereza ewa Piraato.

²Piraato nʼabuuza Yesu nti, “Ggwe Kabaka wʼAbayudaaya?” Yesu nʼamuddamu nti, “Oyogedde.”

³Awo bakabona abakulu ne bamulumiriza ebintu bingi.

⁴Naye Piraato nʼaddamu nʼamubuuza nti, “Lwaki toliiko kyʼoddamu? Laba bakulumiriza ebintu bingi.”

⁵Naye Yesu nʼasirika busirisi, era Piraato nʼamwewuunya nnyo.

⁶Ku buli mbaga, Piraato yabateeranga omusibe omu gwe baabanga bamusabye.

⁷Omu ku basibe mu kiseera ekyo yali ayitibwa Balaba, eyali asibiddwa ne bajeemu banne olwʼokutta abantu nga bakola obwegugungo.

⁸Awo Piraato nʼagenda eri ekibiina nʼababuuza nga bwe yateranga okukola.

⁹Nʼababuuza nti, “Mwandyagadde mbasumululire kabaka wʼAbayudaaya?”

¹⁰Kubanga yamanya nga bakabona abakulu bamuwaddeyo lwa buggya.

¹¹Naye bakabona abakulu ne bafukuutirira ekibiina babateere Balaba sso ssi Yesu.

¹²Naye Piraato nʼaddamu nʼababuuza nti, “Omuntu ono gwe muyita kabaka wʼAbayudaaya mwandyagadde mmukole ntya?”

¹³Ne bawowoggana nti, “Mukomerere!”

¹⁴Piraato nʼababuuza nti, “Lwaki? Azziza musango ki?” Naye bo ne beeyongera bweyongezi okuleekaana nti, “Mukomerere.”

¹⁵Awo Piraato okusanyusa ekibiina, nʼabasumululira Balaba. Nʼawaayo Yesu akomererwe ngʼamaze okumukuba.

¹⁶Awo Abaserikale ne batwala Yesu mu luggya oluyitibwa Pulayitoliyo, ne bayita bannaabwe bonna abakuuma olubiri, ne bakuŋŋaana.

¹⁷Ne bamwambaza ekyambalo ekya ffulungu, ne bakola engule mu maggwa ne bagissa ku mutwe gwe.

¹⁸Ne balyoka bamulamusa nga bwe bagamba nti, “Mirembe! Kabaka wʼAbayudaaya!”

¹⁹Ne bamukuba omuggo ku mutwe, ne bamuwandulira amalusu, ne bamufukaamirira nga bwe bamuvuunamira.

²⁰Bwe baamala okumuduulira, ne bamwambulamu ekyambalo ekya ffulungu ne bamwambaza engoye ze, ne bamutwala okumukomerera.

²¹Bwe baali bagenda ne basanga omusajja erinnya lye Simooni owʼe Kuleene,[16] kitaawe wa Alegezanda ne Luufo eyali ava mu kyalo, ne bamuwaliriza yeetikke omusaalaba gwa Yesu.

²²Awo ne batwala Yesu ne bamutuusa mu kifo ekiyitibwa Gologoosa, amakulu gaakyo nti Ekifo kyʼEkiwanga.

²³Ne baddira wayini atabuddwamu envumbo ne bamuwa anyweko, naye nʼamugaana.[17]

²⁴Awo ne bamukomerera ku musaalaba.

²⁴Ne bagabana ebyambalo bye nga babikubira akalulu.

²⁵Baamukomerera ku ssaawa ssatu ezʼenkya.

²⁶Ne batimba ekipande waggulu wʼomutwe gwa Yesu, okwawandiikibwa nti, “KABAKA WʼABAYUDAAYA.”

²⁷ⓥ Waaliwo abanyazi babiri abaakomererwa awamu naye, omu ku ludda lwa Yesu olwa ddyo, nʼomulala ku kkono.

²⁸Bwe kityo Ekyawandiikibwa ne kituukirira ekigamba nti, “Yabalirwa wamu nʼabamenyi bʼamateeka.”

²⁹Awo abaali bayitawo, ne bakoteka ku mitwe gyabwe nga bamuduulira, nga bwe bagamba nti, “Mumulaba! Wagamba okumenya Yeekaalu nʼokugizimbira ennaku ssatu,

³⁰weerokole, oveeyo ku musaalaba.”

³¹Bakabona abakulu nʼabannyonnyozi bʼamateeka nabo baali bayimiridde awo nga baduulira Yesu, nga bagamba nti, “Yalokola balala, naye ye tasobola kwerokola!”

³²“Ggwe! Kristo, Kabaka wa Isirayiri! Kale kka ove ku musaalaba naffe tunaakukkiriza!” Nʼabanyazi ababiri abaakomererwa naye, nabo ne bamuvuma.

³³Okuva ku ssaawa mukaaga ezʼomu ttuntu okutuukira ddala ku ssaawa mwenda ezʼolweggulo, ekizikiza ne kikwata ensi yonna.

³⁴ⓦ Awo Yesu nʼakoowoola nʼeddoboozi eddene nti, “Eroi, Eroi, lama, sabakusaani?” Amakulu nti, “Katonda wange, Katonda wange, Lwaki onjabulidde?”

³⁵Abamu ku bantu abaali bayimiridde awo bwe baamuwulira ne bagamba nti Ayita Eriya.

³⁶Awo ne wabaawo eyadduka nʼaddira ekyangwe nʼakijjuza wayini omukaatuufu, nʼakisonseka ku luti, nʼakiwanika eri Yesu anyweko, nga bwʼagamba nti, “Mumuleke, ka tulabe obanga Eriya anajja nʼamuwannulayo!”

³⁷Awo Yesu nʼakoowoola nʼeddoboozi ddene, nʼawaayo obulamu bwe.

³⁸Eggigi[18] eryʼomu Yeekaalu ne liyulikamu wabiri okuviira ddala waggulu okutuuka wansi.

³⁹Omuserikale Omuruumi eyakuliranga ekibinja kyʼabaserikale ekikumi eyali ayimiridde okwolekera omusaalaba gwa Yesu, bwe yalaba enfa gye yafaamu, nʼagamba nti, “Ddala ddala, omusajja ono abadde Mwana wa Katonda!”

⁴⁰Waaliwo abakazi abaali bayimiridde awo nga beesuddeko akabanga nga balengera, okwali Maliyamu Magudaleene, ne Saalome ne Maliyamu nnyina Yakobo omuto ne Yose.

⁴¹Abo baayitanga naye mu Ggaliraaya era nga bamuweereza, nʼabalala bangi abajja naye e Yerusaalemi.

⁴²Awo bwe bwawungeera, kubanga lunaku lwa kuteekateeka, olunaku olukulembera Ssabbiiti,

⁴³Yusufu owʼe Alimasaya, nga mukungu mu Lukiiko Olukulu olwʼAbayudaaya, naye eyali alindirira obwakabaka bwa Katonda, nʼaba muvumu nʼagenda eri Piraato okusabayo omulambo gwa Yesu.

⁴⁴Piraato ne yeewuunya nnyo okuba nti Yesu yafudde dda. Nʼatumya omuserikale Omuruumi eyali akulembera banne ekikumi, nʼamubuuza obanga Yesu yafudde dda.

⁴⁵Bwe yakikakasa okuva eri omuserikale, Piraato nʼawa Yusufu omulambo.

⁴⁶Awo Yusufu nʼagula olugoye olwa linena, nʼamuggya ku musaalaba, nʼamuzinga mu lugoye olwa linena, nʼamuteeka mu ntaana eyali etemeddwa mu lwazi, nʼayiringisa ejjinja nʼaggalawo omulyango gwʼentaana.

⁴⁷Maliyamu Magudaleene ne Maliyamu nnyina Yose baaliwo era baalaba Yesu we yateekebwa.