Makko 16:1-20 LGCB2014 - Bible AI

¹Oluvannyuma lwa Ssabbiiti, Maliyamu Magudaleene, ne Saalome ne Maliyamu nnyina Yakobo, ne bagula ebyakaloosa ebyʼokusiiga omulambo gwa Yesu.

²Mu makya nnyo ku lunaku olusooka olwa wiiki ngʼenjuba yaakavaayo, ne bagenda nabyo ku ntaana.

³Awo ne bagenda nga bwe beebuuzaganya gye banaggya omuntu anaabayiringisiza ejjinja eddene lityo okuliggya ku mulyango gwʼentaana.

⁴Naye bwe baatuukawo, ne balaba ngʼejjinja lyayiringisiddwa. Ejjinja lyali ddene nnyo.

⁵Bwe baayingira mu ntaana, ne balaba omusajja omuvubuka, ngʼayambadde engoye enjeru, ngʼatudde ku ludda olwa ddyo! Ne bawuniikirira nnyo!

⁶Naye nʼabagamba nti, “Temutya. Munoonya Yesu, Omunnazaaleesi eyakomererwa. Wano taliiwo! Azuukidde. Mulabe, omulambo gwe we gwali gugalamiziddwa.

⁷Kale mugende mutegeeze abayigirizwa be, ne Peetero, ebigambo bino nti, ‘Yesu abakulembeddemu okugenda e Ggaliraaya. Eyo gye mulimulabira nga bwe yabagamba.’ ”

⁸Awo abakazi abo ne badduka emisinde mingi okuva ku ntaana, nga batidde nnyo, nga bwe bakankana, ne batabaako nʼomu gwe bategeeza olwʼokutya.

⁹Ku lunaku olusooka olwa wiiki, Yesu kwe yazuukirira, nʼasooka okulabikira Maliyamu Magudaleene, omukazi gwe yagobako baddayimooni omusanvu.

¹⁰Maliyamu nʼagenda eri abayigirizwa, nʼabasanga nga bakaaba era nga bakungubaga.

¹¹Nʼababuulira nti Yesu amulabyeko era mulamu! Naye ne batamukkiriza!

¹²Oluvannyuma lwʼebyo, Yesu ngʼali mu kifaananyi kirala nʼalabikira abayigirizwa babiri bwe baali nga batambula mu kkubo nga bagenda mu kyalo.

¹³Oluvannyuma nabo ne bagenda ne bategeeza abalala, naye nabo tebaakikkiriza.

¹⁴Oluvannyuma Yesu nʼalabikira abayigirizwa ekkumi nʼomu bwe baali nga balya. Nʼabanenya olwʼobutakkiriza bwabwe, nʼolwʼobukakanyavu bwʼemitima gyabwe kubanga tebakkiriza abo abaali bamulabyeko ngʼamaze okuzuukira.

¹⁵Nʼabagamba nti, “Mugende mu nsi yonna mubuulire Enjiri eri abantu bonna.

¹⁶Abo bonna abakkiriza ne babatizibwa balirokolebwa, naye abo abatakkiriza balisalirwa omusango ne gubasinga.

¹⁷Era abo abakkiriza baligoba baddayimooni ku bantu mu linnya lyange, era balyogera ennimi empya.

¹⁸Banaakwatanga ku misota, era bwe banaanywanga ekintu kyonna ekyobutwa tekiibakolengako kabi, era banasanga emikono gyabwe ku balwadde ne babawonya.”

¹⁹Awo Mukama waffe Yesu bwe yamala okwogera nabo, nʼatwalibwa mu ggulu nʼatuula ku mukono ogwa ddyo ogwa Katonda.

²⁰Abayigirizwa ne bagenda buli wantu nga babuulira; era Mukama nʼabeeranga nabo, nʼanywezanga buli kye baayogeranga mu bubaka bwabwe, ngʼabakozesanga ebyʼamagero.