Makko 2:1-28 LGCB2014 - Bible AI

¹Awo bwe waayitawo ennaku nnyingi Yesu nʼakomawo mu kibuga Kaperunawumu, ne kiwulirwa nti ali ka.

²Abantu bangi ne bakuŋŋaana, ne wataba kafo wayinzika kuyisibwa kigere ku mulyango; nʼababuulira Enjiri.

³Omulwadde eyali akoozimbye ne bamuleeta eri Yesu ngʼasituliddwa abasajja bana.

⁴Naye bwe balemwa okuyingiza omulwadde eyali akoozimbye olwʼekibiina ekinene ne baseluukulula ku kasolya ne bassa omulwadde ngʼali ku katanda ke.

⁵Yesu bwe yalaba okukkiriza kwabwe, nʼagamba omulwadde eyali akoozimbye nti, “Mwana wange ebibi byo bikusonyiyiddwa.”

⁶Naye abamu ku bannyonnyozi bʼamateeka abaali batudde awo nga balowooza ku bintu bino mu mitima gyabwe ne boogera nti,

⁷“Ono ayinza atya okwogera bwʼatyo? Avvodde! Ani ayinza okusonyiwa ebibi okuggyako Katonda?”

⁸Amangwago Yesu nʼamanya mu mutima gwe bye baali boogerako bokka ne bokka nʼababuuza nti, “Lwaki mwebuuzaganya ebintu bino mu mitima gyammwe?

⁹Ekyangu kye kiruwa, okugamba akoozimbye nti ebibi byo bikusonyiyiddwa oba nti yimirira ositule akatanda ko otambule?

¹⁰Naye mmwe okusobola okutegeera ngʼOmwana wʼOmuntu alina obuyinza okusonyiwa ebibi ku nsi;” nʼagamba eyali akoozimbye nti,

¹¹“Yimirira ositule akatanda ko oddeyo ewuwo.”

¹²Awo omusajja nʼasituka, amangwago nʼasitula akatanda ke nʼafuluma nga bonna balaba. Bonna ne bawuniikirira era ne bagulumiza Katonda, nga bagamba nti, “Kino tetukirabangako.”

¹³Awo Yesu nʼaddayo nate ku lubalama lwʼennyanja ekibiina kyʼabantu ne bajja gyʼali, nʼabayigiriza.

¹⁴Awo bwe yali ngʼatambula nʼalaba Leevi mutabani wa Alufaayo ngʼatudde we yasoloolezanga omusolo, nʼamugamba nti, “Ngoberera.” Awo Leevi nʼasituka nʼamugoberera.

¹⁵Awo Yesu bwe yali mu nnyumba ya Leevi nga bali ku mmere, ngʼali wamu nʼabawooza, nʼabalina ebibi, nʼabayigirizwa be, ngʼabantu bangi bamugoberedde,

¹⁶abannyonnyozi bʼamateeka nʼAbafalisaayo ne baalaba Yesu ngʼalya nʼabalina ebibi nʼabawooza, ne bagamba abayigirizwa be nti, “Lwaki alya nʼabawooza nʼabalina ebibi?”

¹⁷Yesu bwe yakiwulira nʼabagamba nti, “Abalamu tebeetaaga musawo, wabula abalwadde! Sajja kuyita batuukirivu wabula abalina ebibi.”

¹⁸Abayigirizwa ba Yokaana nʼabʼAbafalisaayo baali basiiba. Abantu ne bajja eri Yesu ne bamubuuza nti, “Lwaki abayigirizwa ba Yokaana nʼabayigirizwa bʼabafalisaayo basiiba, naye abayigirizwa bo ne batasiiba?”

¹⁹Awo Yesu nʼabaddamu nti, “Ddala ddala abali nʼawasiza omugole bayinza batya okusiiba, ngʼawasizza omugole ali nabo?

²⁰Naye ekiseera kirituuka awasizza omugole bwʼalibaggibwako; okuva olwo ne balyoka basiiba.

²¹Teri muntu atunga kiwero kiggya mu lugoye olukadde kubanga ekiwero ekiggya kiyuza olugoye olukadde, nʼekituli ne kyeyongera okugaziwa.

²²Teri muntu ateeka mwenge musu mu nsawo zʼamaliba nkadde kubanga omwenge omusu gwabya ensawo enkadde, omwenge ne guyiika, nʼensawo ne ziyulika. Naye omwenge omusu baguteeka mu nsawo mpya.”

²³Awo mu biro ebyo Yesu yali ayita mu nnimiro yʼemmere eyʼempeke ku Ssabbiiti, abayigirizwa be ne batandika okunoga ku birimba byʼemmere eyʼempeke.

²⁴Abafalisaayo ne bagamba Yesu nti, “Lwaki abayigirizwa bo bakola ekitakkirizibwa ku Ssabbiiti.”

²⁵Yesu nʼabaddamu nti, “Temusomanga ku Dawudi kye yakola bwe yalina okwetaaga nʼenjala ngʼemuluma, ye ne be yali nabo,

²⁶bwe yayingira mu nnyumba ya Katonda mu biro bya Abiyasaali kabona omukulu, nʼalya emigaati egyʼokulaga nʼawaako nʼabo be yali nabo, egitakkirizibwa kuliibwako bantu balala okuggyako bakabona.”

²⁷Nʼabagamba nti, “Ssabbiiti yateekebwawo lwa muntu, so si omuntu ku lwa Ssabbiiti.

²⁸Noolwekyo Omwana wʼOmuntu ye Mukama wa Ssabbiiti.”