Makko 3:1-35 LGCB2014 - Bible AI

¹Awo Yesu nʼayingira nate mu kkuŋŋaaniro, nga mulimu omusajja eyalina omukono ogukaze.

²Baali balindirira okulaba obanga anaamuwonya ku Ssabbiiti balyoke bamuwawaabire.

³Yesu nʼagamba omusajja eyalina omukono ogukaze nti, “Yimirira wakati.”

⁴Nʼabagamba nti, “Kikkirizibwa okukola ekirungi ku Ssabbiiti oba okukola ekibi? Okuwonya bulamu oba okubuzikiriza?” Naye ne batamuddamu.

⁵Yesu nʼabatunuulira ngʼakambuwadde era nga munakuwavu nnyo olwʼobukakanyavu bwʼemitima gyabwe, nʼagamba omusajja nti, “Golola omukono gwo.” Nʼagolola omukono gwe, ne guwona.

⁶Amangwago Abafalisaayo ne bafuluma ne bateesa nʼAbakerodiyaani nga bwe banaamuzikiriza.

⁷Awo Yesu nʼabayigirizwa be ne bagenda ku nnyanja. Ekibiina kinene ekyava mu Ggaliraaya ne mu Buyudaaya ne kimugoberera.

⁸Nʼabalala ne bava mu kibuga Yerusaalemi, nʼabalala mu Idumaya, nʼabalala ne bava emitala wʼomugga Yoludaani nʼokwetooloola Ttuulo ne Sidoni ne bamugoberera. Ekibiina kyʼabantu bwe baawulira bye yali akola ne bajja gyʼali.

⁹Yesu nʼagamba abayigirizwa be eryato limubeere kumpi olwʼekibiina ekinene, ekibiina kireme kumunyigiriza.

¹⁰Kubanga yawonya bangi, bangi ne baagala okumugwira bamukwateko olwʼendwadde zaabwe.

¹¹Awo emyoyo emibi bwe gyamulaba ne gigwa mu maaso ge nga gireekaana nga gigamba nti, “Ggwe Mwana wa Katonda.”

¹²Naye nʼagikomako gireme okumwatuukiriza.

¹³Awo Yesu nʼalinnya ku lusozi, nʼayita abo be yayagala, ne bajja gyʼali.

¹⁴Nʼalonda kkumi na babiri mu abo, be yafuula abatume babeerenga naye, era abatumenga okubuulira.

¹⁵Nʼabawa nʼobuyinza okugobanga baddayimooni. Ekkumi nʼababiri be yalonda be bano:

¹⁶Awo nʼalonda ekkumi na babiri era be bano: Simooni, gwe yatuuma “Peetero” ne

¹⁷Yakobo ne Yokaana, batabani ba Zebbedaayo, Yesu be yatuuma “Bowanerege” amakulu nti, “Abaana bʼOkubwatuka.”

¹⁸Andereya, ne Firipo, ne Battolomaayo, ne Matayo, ne Tomasi, ne Yakobo, omwana wa Alufaayo ne Saddayo, ne Simooni, Omukananaayo,

¹⁹ne Yuda Isukalyoti eyamulyamu olukwe.

²⁰Awo Yesu nʼayingira mu nnyumba ekibiina kinene ne bakuŋŋaanira nate wʼali, ye ne be yali nabo ne batasobola kulya.

²¹Awo baganda be bwe baakiwulira ne bagenda bamuggyeyo, kubanga baalowooza nti alaluse.

²²Naye abannyonnyozi bʼamateeka abaava e Yerusaalemi ne bagamba nti, “Aliko Beeruzebuli omukulu wa baddayimooni, era obuyinza bwe bwʼakozesa okugoba baddayimooni.”

²³Awo Yesu nʼabayita nʼayogera nabo mu ngero ngʼagamba nti, “Setaani ayinza atya okugoba Setaani?

²⁴Obwakabaka bwe bwawukana tebuyinza kubaawo.

²⁵Nʼennyumba eyawukanye, teyinza kubeerawo.

²⁶Ne Setaani bwʼatyo bwʼalwanagana yekka na yekka tayinza kubaawo. Wabula yeezikiriza yekka.

²⁷Naye tewali ayinza kuyingira mu nnyumba ya muntu wʼamaanyi, okunyaga ebintu bye nga tasoose kumusiba nʼalyoka anyaga ebintu bye.

²⁸Ddala ddala mbagamba nti buli kintu kyonna omuntu kyʼakola kirisonyiyibwa abaana bʼabantu, ebibi nʼokuvvoola kwonna kwe bavvoola.

²⁹Naye buli alivvoola Mwoyo Mutukuvu talisonyiyibwa, emirembe nʼemirembe naye alisingibwa omusango olwʼekibi ekyʼemirembe nʼemirembe.”

³⁰Yayogera atyo gye bali kubanga baagamba nti, “Aliko omwoyo omubi.”

³¹Awo baganda ba Yesu ne nnyina ne bajja gyʼali ebweru nga baagala okumulaba. Awo ne bamutumira bamuyite ajje ayogere nabo.

³²Ekibiina kyʼabantu kyali kimwetoolodde, ne bamugamba nti, “Nnyoko ne baganda bo ne bannyoko bali wabweru bakunoonya.”

³³Naye nʼabaddamu nti, “Mmange ye ani, ne baganda bange be baani?”

³⁴Awo bwe yeetoolooza amaaso abo abaali batudde nga bamwebunguludde, nʼabagamba nti, “Bano be mulaba be bammange era be baganda bange!

³⁵Kubanga buli muntu akola Katonda byʼasiima ye muganda wange, ye mwannyinaze era ye mmange.”